MUS raspačało 135 kryminalnych spraŭ u dačynieńni da biełaruskich hramadzian, jakija vajavali va Ukrainie
U dačynieńni da biełaruskich bajevikoŭ, jakija vajavali va Ukrainie, raspačata 135 kryminalnych spraŭ. Pra heta ŭ intervju haziecie «Źviazda» paviedamiŭ načalnik hałoŭnaha ŭpraŭleńnia pa baraćbie z arhanizavanaj złačynnaściu i karupcyjaj MUS Biełarusi pałkoŭnik milicyi Mikałaj Karpiankoŭ.
«Važna nie prapuścić u Biełaruś zamiežnych bajevikoŭ-najmitaŭ, radykalna nastrojenych musulman, udzielnikaŭ vajennych apieracyj va Ukrainie, na Blizkim Uschodzie. My farmirujem apieratyŭny ŭlik biełaruskich bajevikoŭ, jakija vajavali va Ukrainie, a ciapier viartajucca dadomu. Usio heta robicca dziela taho, kab ludzi, jakija mohuć nieści vajennuju pahrozu dziaržavie, znachodzilisia pad kantrolem. Užo raspačata 135 kryminalnych spraŭ u dačynieńni da takich biełarusaŭ», — skazaŭ jon.
U Śledčym kamitecie Biełarusi hetuju infarmacyju nie kamientujuć.
Varta adznačyć, što padobnyja ličby ahučvajucca ŭpieršyniu.
Na pres-kanfierencyi 1 sakavika kiraŭnik MUS Biełarusi hienierał-lejtenant milicyi Ihar Šunievič paviedamiŭ, što biełaruskija orhany papiaredniaha rasśledavańnia buduć nakiroŭvać va Ukrainu daručeńni ab akazańni pravavoj dapamohi dla zboru infarmacyi ab biełaruskich hramadzianach, jakija vajujuć u Danbasie.
«My źbirajem, atrymlivajem, zdabyvajem materyjały, faktyčnyja danyja, śviedčańni ź lubych krynic, dastupnych siońnia pravaachoŭnaj sistemie. Heta adkrytyja krynicy, zakrytyja krynicy, praviadzieńnie apieratyŭna-vyšukovych mierapryjemstvaŭ, raźviedvalnych mierapryjemstvaŭ (elektronnaja raźviedka). Heta ceły kompleks pracesualnych dziejańniaŭ, jakija my vykonvajem pa daručeńni śledčych», — skazaŭ Šunievič.
Pavodle infarmacyi kiraŭnika MUS, jość śpis asob, jakija znachodziacca ŭ zonie ŭzbrojenaha kanfliktu, prymajuć udzieł u bajavych dziejańniach «u toj ci inšaj formie na tym ci inšym baku kanfliktu». Źviestki jość prykładna ab 140 hramadzianach Biełarusi.
«Viadziecca śledstva pa kryminalnaj spravie. My, Ministerstva ŭnutranych spraŭ, vykonvajem daručeńni śledčych pa dakumientavańni hetych faktaŭ. I śledstva budzie davać pravavuju acenku hetym asobam», — skazaŭ Šunievič.
Siłaviki śćviardžajuć, što zatrymali dvuch mužčyn za hałasavańnie na vybarach u KR. Ale ci možna hetamu vieryć?15
Kamientary