Kampanija Sumsub, zadziejničanaja ŭ apracoŭcy pašpartoŭ biełarusaŭ, jakija hałasujuć na vybarach u KR, adreahavała na publikacyju «NN»

Ułasnaść i kantrol nad Sumsub

«U vašym artykule śćviardžajecca: «Siońnia kampanija pazicyjanuje siabie jak brytanskaja, ale ŭ realnaści brytanskaja jurydyčnaja asoba Sum and Substance Ltd naležyć kiprskaj Raritex Trade Ltd. Chto ŭ realnaści kantraluje kampaniju, my nie viedajem».

Hetaje śćviardžeńnie ŭvodzić u zman i źjaŭlajecca faktyčna niapravilnym.

Sumsub — heta hłabalny brend, a Raritex Trade Ltd — zarehistravanaja na Kipry kampanija — na hety momant źjaŭlajecca adnačasova i chołdynhavaj kampanijaj hrupy Sumsub, i jaje asnoŭnaj apieracyjnaj strukturaj.

Braty Sieviery publična zarehistravanyja jak kančatkovyja bienieficyjarnyja ŭłaśniki ŭ kiprskim rejestry UBO (rejestry kančatkovych bienieficyjarnych ułaśnikaŭ — NN). Z momantu zasnavańnia kampanii ŭ 2015 troje jaje zasnavalnikaŭ — Andrej Sievier, Jakaŭ Sievier i Piotr Sievier — źjaŭlajucca adzinymi kančatkovymi bienieficyjarnymi ŭłaśnikami biznesu.

Dadatkovaja infarmacyja adnosna struktury ŭłasnaści i kiravańnia kampanijaj dastupnaja ŭ našaj publičnaj zajavie, apublikavanaj 22 krasavika».

Niapravilnaje pradstaŭleńnie incydentu ź biaśpiekaj 2024 hoda

«U vašym artykule dalej śćviardžajecca:

«U pačatku 2026 hoda kampanija paśla publikacyj na chakierskich forumach vymušana była pryznać, što ŭ 2024 hodzie ŭ jaje sistemie byli trecija asoby …»

Takaja charaktarystyka źjaŭlajecca faktyčna niapravilnaj.

Publikacyja ŭ sacyjalnych sietkach, na jakuju vy spasyłajeciesia ŭ svaim artykule, była apublikavanaja paśla taho, jak Sumsub užo aficyjna raskryła infarmacyju pra incydent ź biaśpiekaj 2024 hoda praz svaje ŭłasnyja kanały. Incydent byŭ vyjaŭleny i rasśledavany samoj kampanijaj Sumsub, a nie «vyciahnuty» ŭ publičnuju prastoru praz staronnija publikacyi ci aktyŭnaść na chakierskich forumach.

Vaša ciapierašniaja farmuloŭka łžyva namiakaje na ŭtojvańnie infarmacyi i źniešniaje vykryćcio jak na pryčynu raskryćcia infarmacyi, što źjaŭlajecca niedakładnym i ŭvodzić u zman».

Vykarystańnie paklopnickich krynic i krynic, zakonnaść jakich asprečvajecca

«Vaš artykuł spasyłajecca na papiarednija publikacyi i «rasśledavańni», jakija tyčacca Smart Engines i minułaj dziejnaści Sumsub.

My chacieli b źviarnuć vašu asablivuju ŭvahu na toj fakt, što artykuł vydańnia Incrypted Media, jaki cytujecca ŭ vašaj publikacyi, hruntujecca na materyjałach, pieršapačatkova apublikavanych Rekt. Jak možna pierakanacca tut, zhadanaja publikacyja ŭžo vydalenaja na padstavie sudovaj pastanovy ab pryniaćci časovych mier.

Dla vašaha aznajamleńnia my prykładajem adpaviednyja sudovyja dakumienty.

Kali kazać bolš šyroka, mnohija z hetych materyjałaŭ, pradstaŭlenych jak «rasśledavańni», abapirajucca na kambinacyju publična dastupnaj infarmacyi, vybaračnych zamoŭčvańniaŭ, manipulatyŭnaj padačy i, u niekatorych vypadkach, adkryta łžyvych abvinavačańniaŭ, kab stvaryć naratyŭ, jaki nie adlustroŭvaje realnaha stanu rečaŭ adnosna struktury ŭłasnaści Sumsub, jaje apieracyjnaj dziejnaści, praktyk vykanańnia patrabavańniaŭ zakanadaŭstva abo technałahičnaj infrastruktury.

U pryvatnaści, u mnohich vypadkach:

da Sumsub nie źviartalisia pa kamientar pierad publikacyjaj;

faktyčnyja ŭdakładnieńni, pradstaŭlenyja kampanijaj, ihnarujucca abo skažajucca;

vykarystoŭvajucca ananimnyja płatformy dla publikacyj biez redakcyjnaj adkaznaści;

a značnyja častki analizu, imavierna, stvoranyja z dapamohaj vialikich moŭnych madelaŭ abo pachodziać z krynic, źviazanych z vydaleńniem niehatyŭnaha kantentu ŭ abmien na finansavuju ŭznaharodu.

Heta nie adpaviadaje standartam, jakija čakajucca ad adkaznaj žurnalistyki, i vyklikaje surjoznuju zaniepakojenaść adnosna abjektyŭnaści i redakcyjnaj dobrasumlennaści.

My jašče raz kateharyčna admaŭlajem lubuju suviaź pamiž Sumsub i rasijskaj dziaržavaj, rasijskimi śpiecsłužbami abo rasijskimi ŭzbrojenymi siłami.

Sumsub vielmi surjozna stavicca da svajoj reputacyi, sumlennaści, abaviazacielstvaŭ u śfiery biaśpieki i adkaznaści za vykanańnie narmatyŭnych patrabavańniaŭ. Kampanija zastajecca prychilnaj pryncypam faktyčnaj dakładnaści, prazrystaści i adkaznaha ŭzajemadziejańnia z klijentami, partniorami, rehulatarami, miedyja i hramadskaściu.

U toj ža čas Sumsub budzie praciahvać abaraniać siabie ad iłžyvych, paklopnickich i ŭvodziačych u zman zajavaŭ usimi dastupnymi zakonnymi srodkami, uklučajučy, kali heta darečna, sudovyja pazovy za paklop, naŭmysnuju chłuśniu i niesumlennuju kankurencyju.

My prosim nieadkładna vypravić vyjaŭlenyja vyšej niedakładnaści i zabiaśpiečyć, kab lubyja budučyja materyjały pra Sumsub adpaviadali naležnym žurnalisckim standartam, utrymlivali pravierku faktaŭ i praduhledžvali spraviadlivuju mahčymaść dla kamientara».

Ad Redakcyi

1) U pačatkovaj viersii artykuła havaryłasia «Siońnia kampanija pazicyjanuje siabie jak brytanskaja, ale ŭ realnaści brytanskaja jurydyčnaja asoba Sum and Substance Ltd naležyć kiprskaj Raritex Trade Ltd. Chto ŭ realnaści kantraluje kampaniju, my nie viedajem». U abnoŭlenaj viersii my dadali tłumačeńnie, chto jaje bienieficyjary, atrymanaje ad samoj kampanii.

Kiprski rejestr nie publičny, my nie mahli atrymać hetuju infarmacyju sami, jak i nie možam pravieryć infarmacyju, atrymanuju ad kampanii ciapier.

2) U pačatkovaj viersii artykuła havaryłasia, što ŭ «pačatku 2026 hoda kampanija paśla publikacyj na chakierskich forumach vymušana była pryznać …».

U svaim liście kampanija patłumačyła, što incydent byŭ vyjaŭleny i rasśledavany samoj kampanijaj Sumsub i heta nie było vymušana publikacyjami na chakierskich forumach.

3) Publikacyja z Incrypted Media, pracytavanaja ŭ pačatkovaj viersii artykuła, sapraŭdy hruntujecca na publikacyi vydańnia Rekt, jakaja była paźniej vydalenaja sa staronki hetaha vydańnia pa pastanovie suda ab pryniaćci časovych mier da momantu kančatkovaha sudovaha rašeńnia.

• 16
• 1
• 8
• 13
• 1
• 0
• 0
• 0