Elitnyja kupalniki, trusy i paścielnaja bializna: što Fiederalnaja słužba achovy (FSA) zakuplaje dla rezidencyi prezidenta RF «Ruś».
Jość na Rusi miesca, jakoje tak i nazyvajecca — «Ruś», dziaržaŭnaja rezidencyja prezidenta RF. I adkazvaje za jaje biaśpieku kankretnaja arhanizacyja — Dziaržaŭny kompleks «Zavidava» Fiederalnaj słužby achovy. Uklučaje ŭ siabie hety kompleks i samu rezidencyju, i nacyjanalny park, u jakim taja raźmieščana, — usio 125 tysiač hiektaraŭ. Hałoŭny budynak (u dva pavierchi, z kaminam i dubovaj meblaj) znachodzicca na ŭskrainie ćviarskoj viosački Kazłova. Pobač — haściavy domik, palihon dla palavańnia, dva voziera dla rybałki. Možna i dzika ź miadźviedziem zavalić, i jakuju-niebudź ścierladź abo ščupaka padčapić, piša Sobesednik.ru.
Miescy hetyja zakrytyja dla starońnich — ujezd stroha pa śpiecprapuskach. Ale ŭ haściach u Pucina ź Miadźviedzievym tut pabyvali i Toni Błer, i italjaniec Bierłuskoni, i karol Ispanii Chuan Karłas I, i Raul Kastra, nie kažučy ŭžo pra Alaksandra Łukašenku. U apošni čas znakamitych haściej u «Zavidavie», praŭda, nie nazirajecca, ale heta nie značyć, što žyćcio na «Rusi» spyniłasia. Prosta, jak vyśvietliŭ Sobesednik.ru, tam ciapier poŭnym chodam zaviaršajecca rekanstrukcyja. Niahledziačy na ramont, tolki za apošnija paŭhoda tutejšaja FSA zaklučyła dziaržkantraktaŭ bolš čym na 120 młn rubloŭ. Siarod zakupak Sobesednik.ru znajšoŭ niekalki cikavych.
Ličba: 996.722.589 rubloŭ 80 kapiejek vykłała vajskovaja čaść 48405 FSA za rekanstrukcyju rezidencyi «Ruś», jakaja pavinna zaviaršycca 20 śniežnia hetaha hoda.
Ścieluć pa-karaleŭsku
Da prykładu, u vieraśni minułaha hoda «Zavidava» amal na 2,5 młn rubloŭ zakupiła dla važnych dziaržaŭnych patreb pradukcyju brenda Frette… Jašče raz: Frette. Ni pra što nie kaža? Nu, značyć, vy — nie karaleŭskaja asoba. Na paścielnaj bialiźnie hetaj firmy śpiać u asnoŭnym jeŭrapiejskija manarchi dy ŭładalniki ŭsialakich supierjacht. Ach tak, jašče pasažyry ciahnika «Uschodni ekspres», taksama nie samyja biednyja ludzi. Jašče hetaja kampanija vypuskaje ŭsiakija ručniki, survetki, abrusy, dy takija, što adzin ź ich upryhožvaje vatykanski ałtar.
To bok Frette — heta, viadoma, nie ivanaŭski parkal, ale tekstyl taksama prystojny. Handlovaja marka kłasa luks. Ciapier Frette nakryła i zavidaŭskuju «Ruś»: 7 koŭdraŭ, 10 padušak, 12 sacinavych praścin, pa 20 navałačak i padkoŭdranikaŭ. Usie — koleru čystaj słanovaj kości abo ŭ spałučeńni ź biełym. Da paścieli prykładajucca 4 prašytyja bavaŭnianyja pakryvały i 3 kašmirovyja pledy.
Akramia taho, FSA zakupiła 4 machrovyja mužčynskija chałaty hetaj firmy, taksama koleru słanovaj kości — ich asablivaść u tym, što zrobleny jany z čystaha bavaŭnianaha vałakna biez usialakaj sintetyki. Što jašče … 80 ručnikoŭ: łaźnievych, asabistych, pracedurnych i dla noh. Jašče — machrovyja łaźnievyja praściny ad Frette, takija ž dyvanki dla noh i 3 biełyja žakardavyja abrusy (mietr dvaccać na try) z paŭsotniaj survetak. Heta kab na «Rusi» było pryjemna nie tolki paspać, ale jašče i pajeści.
Płaŭki pamieru XXL
Paścielnaja bializna — sprava zrazumiełaja (nie na sałomie ž układvać hanarovych pastajalcaŭ). Ale ž dla rezidencyi kuplajuć i bializnu inšaha rodu. Pad Novy hod zavidaŭskaja FSA zamoviła takuju kuču abutku i adzieńnia, što łopnieš ad zajzdraści.
Akramia chatnich tapak, krasovak i žanočych spartyŭnych kaściumaŭ, u śpisie kantraktu — salidny nabor kupalnych pryładaŭ i navat škarpetak. Dźvie pary čornych mužčynskich škarpetak hiermanskaj firmy Kunert pa paŭtary tysiačy. Žanočyja škarpetki dla biehu marafonskaj liniejki Adidasadizero. Mužčynskija i žanočyja termaškarpetki Norveg. Karotkija škarpetki AdidasAnkleRibbedThin na 35-y pamier. Niamieckija bežavyja škarpetki kłasa luks FalkeLhasaRib (41-y pamier) ź miakkaha kašmiru ŭ spałučeńni z vysakajakasnaj mierynosavaj voŭnaj, jakija, jak zapeŭnivaje vytvorca, «dazvalajuć adčuć mužčynam piaščotu, ciapło i kłopat».
Inšyja marki i pamiery pančochava-škarpetkavych vyrabaŭ. Da pasłuh dziaŭčynak u «Zavidavie» — spartyŭnyja trusiki i biusthaltary Sportsbraextremecontrol troch koleraŭ: aranžava-čorny, fijaletava-šery i čorna-šery. Uličvajučy, što pamiery ŭ hetych troch kamplektaŭ roznyja (46, 48 i 50), dziaŭčynak na «Rusi» taksama, vierahodna, praduhledžana try. Da ich pasłuh — šeść italjanskich kupalnikaŭ Solymar i David.
Dla chłopčykaŭ, akramia termatrusoŭ NorvegHunterShorts z voŭny mierynosaŭ, FSA raskašeliłasia na kłasičnyja płaŭki Guess, płaŭki-šorty toj ža firmy, płaŭki-baksiory Grigioperla i płaŭki Parahuomo. Uličvajučy, što pamiery ich taksama roznyja, až da XXL, nie ŭsie jany pryznačany piersanalna dla Pucina. Tady dla kaho? I čamu naohuł biudžet pavinien apłačvać kuplu čyichści kupalnych trusoŭ?
— Padobnaja praktyka rečavaha zabieśpiačeńnia isnuje jašče z savieckich časoŭ. Prosta raniej takoha rodu dziaržzakupki nie abnarodavalisia, — rastłumačyŭ Sobesednik.ru supracoŭnik FSA, jaki prapracavaŭ u joj šmat hadoŭ. — I žanočyja kupalniki — heta taksama absalutna narmalna. U nas słužać i žančyny, im ža taksama treba ŭ čymści zajmacca fizičnaj śpiecpadrychtoŭkaj. U tym liku i ŭ vadzie. I pracavać taksama prychodzicca ŭ roznych umovach. Tak što kupalniki — častka słužbovaj uniformy supracoŭnic našaj słužby, jakija achoŭvajuć rezidencyi prezidenta.
Što jašče zakuplaje prezidenckaja achova
— Kałhotki na 928 tysiač, namordnik z łancužkom i skuranaja plotka.
— Struny dla arfy.
— 6 viaślarnych łodak.
— Akazańnie adukacyjnych pasłuh pa kursie navučańnia «Valščyk lesu».
— Niamiecki dvuchpadviesny rovar Cube 2015 Stereo za 212 tysiač.
— Piečka dla łaźni za 2 miljony ź lišnim.
— Italjanskaja šafa z rakavinaj firmy MiglioreKantri za 355 tysiačaŭ (na fota)
Daśje
I restaŭracyjaj rezidencyi «Ruś», i pastaŭkaj kupalnikaŭ u «Zavidava» zajmajecca kampanija «Budkamplekt», nazva jakoj siońnia milhaje ŭ materyjałach kryminalnaj spravy ab kradziažach u Minkulcie RF.
Kamientary