Były šef-redaktar «Narodnaj voli» pierachodzić pracavać na telekanał «Biełsat». Pra heta jana raspaviała padčas žurnalisckaha majstar-kłasu ŭ minskaj kniharni «Halijafy» 28 krasavika.
Sustreča z zorkaju biełaruskaj žurnalistyki prajšła ŭ miežach cykłu publičnych razmovaŭ ź viadoŭcami telekanału.
Nie ŭsich možna zaprašać na TB
«Adnojčy ŭ mianie była aniekdatyčnaja situacyja, padčas intervju z Francam Mińkom. Kali Łukašenka staŭ prezidentam, Franca Mińka nakiravali ŭ Ministerstva sielskaj haspadarki. Jon adkazvaŭ za miechanizacyju i ŭznačalvaŭ upraŭleńnie techničnaha prahresu, byŭ namieśnikam ministra. Cudoŭny čałaviek. Ale na maje pytańni adkazvaŭ zadam napierad. To niešta ŭzhadaje, paśla viartajecca da papiaredniaha pytańnia, karaciej, čort nahu złomić. Ale ŭ hazietnym intervju žurnalist moža niešta dadać, adkarektavać, i ŭ vyniku ŭ nas atrymałasia davoli dobraje intervju.
Paśla apublikavańnia jon mnie telefanuje i kaža, maŭlaŭ, takoje fajnaje intervju ŭ nas atrymałasia, usie mnie ŭ ministerstvie ruku paciskajuć i navat z telebačańnia patelefanavali dy zaprasili na razmovu. Ja jamu paraiła nie iści. Jość ludzi, ź jakimi zrabić televizijnaje intervju amal niemahčyma».
Samyja ciažkija surazmoŭcy
«Ciažka rabić intervju ź jurystami, dypłamatami dy ekanamistami. Ekanamisty zakidvajuć ciabie ličbami. Maja razmova ź Michałam Zaleskim – heta sapraŭdny prykład trolinhu žurnalista».
«Kali zdaryłasia trahiedyja na Niamizie, mnie patelefanavali z Maskvy i paprasili zrabić siužet, bo ŭ hetaha vydańnia nie było svajho karespandenta ŭ Miensku.
I voś ujavicie situacyju, što treba niešta zapytacca ŭ ludziej, jakija pa morhach šukajuć svaich dziaciej dy vychodziać adtul źbialełyja. A ty, jak prafiesijanał, musiš z hetym niešta zrabić. Mnie było ciažka pierastupić praź siabie, bo padychodzić da ludziej u hety momant ź niejkimi pytańniami padavałasia mnie antyhumannym».
«U mianie jość adno intervju, jakoje tak i nie było apublikavanaje. Heta razmova z doktaram, jaki z hrupaj entuzijastaŭ teściravaŭ u Miensku nietradycyjnyja mietady lačeńnia raku.
Jon nie vieryŭ, što chimijaterapija moža dapamahčy, tamu sprabavaŭ inšyja mietady. Ciapier jon žyvie ŭ Izraili, dzie pracuje ŭ ekśpierymientalnych klinikach. I ŭ mianie niama adnaznačnaha adkazu na pytańnie, dobra ci drenna, što hetaje intervju nie vyjšła. U razmovie jon faktyčna pryznavaŭsia ŭ ździajśnieńni kryminalnaha złačynstva. Ja davała pačytać hetuju razmovu ankołaham, i šmat chto pahadžaŭsia z arhumientami hetaha doktara. Ale intervju nie vyjšła, bo padumała: a što kali niekamu chimijaterapija patrebnaja, ale, pračytaŭšy hetuju razmovu, čałaviek ad jaje admovicca?»
Prymityvizm, kliše i pustasłoŭje
«Razmova ź Dźmitryjevym — heta prykład, kali ty hutaryš z čałaviekam, jaki abychodzić tvaje pytańni to sprava, to źleva abo adkazvaje pry dapamozie kliše. Z prafiesijnymi dypłamatami dy palitykami razmaŭlać vielmi ciažka».
Chaču zrabić intervju z Łukašenkam paśla jahonaj adstaŭki
«Ciapier mnie nie cikava rabić intervju z Łukašenkam. Ja chaču zrabić ź im intervju paśla jahonaj adstaŭki. Chaču, kab jon syšoŭ na svaich nahach, kab nie było ŭ nas kryvi dy hetak dalej, kab jon moh razmaŭlać i adkazvać na pytańni. Mnie padajecca, što pieraasensavańnie taho, što ź im adbyłosia i što pieražyła kraina, było b cikavaje. Pamiataju, kali ŭ Miensk pryjechaŭ Savik Šuster, tady jon jašče pracavaŭ na NTV, kab zapisać razmovu z Čubajsam i Łukašenkam. Ad imia Anatola Čubajsa mianie zaprasili na zapis hetaj prahramy.
Paśla zdymkaŭ Łukašenka padyšoŭ da mianie i kaža: «Što vy, Śviatłana, takaja złaja?» A ja tady była hałoŭnym redaktaram «Biełaruskaj dziełavoj haziety», jakuju zakryvali, i adkazvaju jamu, što nie maju nahodaŭ vam uśmichacca. I dadała, što «kali vy sydziecie, Alaksandr Ryhoravič, ja pryjdu da vas brać intervju, a voś Pavał Izotavič — nie».
Ciapier čytajuć
«Jana nie vyhladała ščyraj, była ŭ mascy». Paŭlučenka pra sustreču Kaleśnikavaj ź biełaruskimi žurnalistami21
Kamientary