Vybary-2008. Chto pa jakoj akruzie idzie?

Kalakin pa Kołasaŭskaj akruzie, Labiedźka — u Sucharavie, Volha Kazulina - pa Frunzenskaj akruzie, hienerał Frałoŭ - u Słucku. Na Radzimie Zianona Paźniaka ŭ Iŭi kandydatam maje być były palitviazień Ivan Kruk z AHP. U Miensku pieravažajuć kandydaty ad Partyi BNF, u Bieraści — sacyjał-demakrataŭ, a na Homielščynie — Partyi kamunistaŭ. Tak vyhladaje adziny śpis kandydataŭ ad Abjadnanych demakratyčnych siłaŭ na vybary ŭ pałatu pradstaŭnikoŭ. Statkievič tym časam choča iści na vybary asobna, a «Chartyja-97» i «Małady front» bajkatujuć.

Mnoha niajasnaha zastajecca vakoł udziełu apazycyi ŭ vybarach u pałatu pradstaŭnikoŭ. Naprykład, «Małady front» jak arhanizacyja abviaściła pra bajkot parlamenckich vybaraŭ. Ale vyłučanyja pa kvocie MF Dzianis Sadoŭski i Viktar Jančurevič (abodva — Miensk) i Źmicier Kuchlej (Masty, Haradzienščyna) — majuć namier uziać udzieł u vybarach jak niezaležnyja kandydaty. U čym tady sutnaść bajkotu MF, niezrazumieła.

Z svajho boku, Anatol Labiedźka, pakolki MF aficyjna nia jdzie na vybary, prapanavaŭ zapoŭnić hetyja vakansii ŭ śpisie ADS viadomym u krainie palitykam — Alaksandru Milinkieviču, Stanisłavu Šuškieviču, Alaksandru Jarašuku ci niekamu jašče, chto pakul nia vykazaŭsia ab svaim udziele ŭ vybarach.

Tak ci inakš, a adziny śpis ADS składzieny i pad im padviedziena rysa.

Chto z apazycyjaneraŭ idzie na vybary pa jakoj akruzie?

Najbolšaja kolkaść apazycyjnych lideraŭ nazirajecca, što i nia dziŭna, u Miensku. Tak, lider AHP Anatol Labiedźka źbirajecca balatavacca ŭ Sucharaŭskaj vybarčaj akruzie. Na heta svoj pohlad maje siabar «Ruchu «Za Svabodu» palitolah Aleś Łahviniec, jaki prapanavaŭ Labiedźku pravieści «prajmeryz» pa hetaj akruzie, pieramožca jakoha i budzie pradstaŭlać apazycyju na vybarach. U svaju čarhu, Labiedźka ličyć, što «prajmeryz» nie adlustroŭvajuć usiaho spektaru dumak vybarcaŭ, i prapanuje sacyjalahičnaje daśledavańnie. Pakul pytańnie tak i nia vyrašyłasia.

Lider PKB Siarhiej Kalakin budzie sprabavać dastać deputacki mandat u Kołasaŭskaj akruzie. Były staršynia Partyi BNF Vincuk Viačorka — va Ŭschodniaj. Supiernik Viačorki na apošnim źjeździe BNF Aleś Michalevič źbirajecca ahitavać za siabie vybarcaŭ Uručča. Uvohule, BNF lider pa svaich vyłučencach u Miensku. Ad partyi pa staličnych akruhach taksama iduć Alaksiej Janukievič (Aŭtazavodzkaja), Siarhiej Karpovič (Kastryčnickaja), Jury Karetnikaŭ (Paŭdniova‑Zachodniaja), Valancina Śviackaja (Jasieninskaja).

Piać čałaviek u Miensku buduć pradstaŭlać AHP. Aproč užo nazvanaha Anatola Labiedźki, heta były staršynia Nacbanku Biełarusi Stanisłaŭ Bahdankievič (Čkałaŭskaja), Alaksandar Dabravolski (Śvisłackaja), a taksama dźvie žančyny — Valancina Palevikova (Kupałaŭskaja), Ludmiła Hraznova (Partyzanskaja).

Staršynia źlikvidavanaj letaś Partyi žančyn «Nadzieja» Alena Jaśkova pojdzie ŭ Sierabrancy, a lider jašče adnoj źlikvidavanaj partyi — Pracy — Alaksandar Buchvostaŭ budzie vyłučacca ŭ Šabanach.

Adzinuju vakansiju ad BCHD zaniaŭ u Staravilenskaj akruzie Vital Rymašeŭski. Były advakat Alaksandra Kazulina Ihar Rynkievič zabiŭ za saboj Puškinskuju akruhu. Pojdzie na vybary i starejšaja dačka palitviaźnia i eks‑kandydata ŭ prezydenty Volha Kazulina, jana źbirajecca balatavacca ŭ Frunzenskaj akruzie.

U Bieraści budzie balatavacca vykanaŭca abaviazkaŭ staršyni BSDP Anatol Laŭkovič, jon doŭhi čas žyŭ i pracavaŭ akurat u horadzie nad Buham. Darečy, Bieraście za saboj amal całkam pakinuli sacyjał‑demakraty. Pa druhoj haradzkoj akruzie na vybary ad apazycyi idzie Ihar Masłoŭski. Kančajučy temu BSDP, adznačym, što ŭ Ivacevičach budzie balatavacca namieśnik staršyni partyi Ivan Antaškievič, a pa Biełavieskaj akruzie — Valancin Łazarenka.

Apazycyjnyja kamunisty pakinuli za saboj na Bieraściejščynie adnu z Baranavickich akruh, Muchavieckuju, Pinskuju i Stolinskuju. Pa Pinskaj viaskovaj akruzie ŭ śpisach kandydataŭ značycca Andrej Suchavierchi z BNF. Namieśnik staršyni hetaj samaj partyi Juraś Hubarevič pasprabuje prabicca ŭ pałatu ŭ rodnym Biełaaziorsku, dzie ŭžo niekali byŭ deputatam miascovaha savietu.

Pra žadańnie ŭdziełu ŭ vybarach zajavili šeść pradprymalnikaŭ — Mikałaj Čarnavus (Baranavičy), Iryna Jaskievič (Viciebskaja Čkałaŭskaja akruha), Alena Miadźviedzieva (Babrujskaja Leninskaja), Alaksandar Cacura (Salihorsk), Viktar Kryval (Stoŭpcy), Viktar Harbačoŭ (Barysaŭskaja haradzkaja).

Najchutčej, što pa Barysaŭskaj viaskovaj akruzie pojdzie Siarhiej Sałaš. U Vialejcy i Miadzieli vyłučacca budzie staršynia abłasnoj arhanizacyi Partyi BNF Źmicier Vinahradaŭ. Prychilnik biełaruska‑rasiejskaj intehracyi hienerał Valery Frałoŭ pojdzie na vybary ŭ Słucku. Peŭna, heta źviazana z tym, što ŭ horadzie BNRaŭskaha paŭstańnia ŭ svoj čas asadzili šmat vajskoŭcaŭ, jakija mohuć padtrymać hienerała.

Taciana Vanina (Partyja pracy) idzie pa Kojdanaŭskaj akruzie, były likvidatar Čarnobylskaj katastrofy Alaksandar Vałčanin (AHP) — u Žodzina, lider «Maładych demakrataŭ» Alaksandar Šumkievič — u Maładečna, Ludmiła Nasanovič («Nadzieja») — u Salihorsku.

Redaktar niedziaržaŭnaj hazety «Volny horad» Siarhiej Niaroŭny balatujecca ŭ rodnym Kryčavie. Były nastaŭnik historyi z Babrujsku Aleś Čyhir adziny, chto budzie pradstaŭlać na vybarach «Ruch «Za Svabodu».

Andrej Jurkoŭ z Partyi BNF źbirajecca balatavacca ŭ Horackim rajonie, dzie chočuć pabudavać biełaruskuju AES.

Čatyry haradzienskija akruhi papałam padzialili siabry AHP (Jarasłaŭ Ramančuk ź Viktaram Padčanienkavym) i BNF (Vadzim Sarančukoŭ ź Siarhiejem Antusievičam).

Na Radzimie Zianona Paźniaka ŭ Iŭi kandydatam maje być były palitviazień Ivan Kruk z AHP.

Frontaŭcy vydaviec «Našaha słova» Stanisłaŭ Sudnik budzie balatavacca ŭ Lidzie, a doktar Ivan Šeha — u Słonimie.

Ci nia samaje mocnaje pradstaŭnictva PKB na Homielščynie. Ažno siem čałaviek — Viktar Chomič (Homielskaja Jubilejnaja), Uładzimier Siakierka (Homielskaja Sialmašaŭskaja), Siarhiej Siarhiejenka (Homielskaja Pramysłovaja), Michaił Silivoniec (Žytkavičy), Valer Rybčanka (Žłobin), Viktar Nazaranka (Kalinkavičy), Siarhiej Dajneka (Śvietłahorsk).

Tolki na adnaho štycha mienš za kamunistaŭ na Homielščynie maje AHP. Kandydat na staršyniu partyi Mikałaj Haŭrylenka zojmie Paleskuju akruhu, Viktar Palakoŭ — Homielskuju Savieckuju, Adam Varaniec — Homielskuju viaskovuju, Leanid Sudalenka — Chojnickuju, Leanid Arłoŭ — Mazyrskuju.

Valery Pucicki z BNF budzie balatavacca ŭ Rečycy, a Kastuś Žukoŭski z BCHD — u Buda‑Kašalovie.

Hałoŭny redaktar «Tovariŝa» Siarhiej Vaźniak idzie na vybary na Tałačynščynie, Vital Broŭka (BNF) — na Pastaŭščynie, Aleh Tyčyna (AHP) — na Lepielščynie, Jarasłaŭ Biernikovič (BNF) — na Hłyboččynie.

Jak bačym, apazycyja vyznačyła svaich kandydataŭ va ŭsich akruhach. Zastajecca niemahčymaje — choć dzieści arhanizavać paralelny padlik hałasoŭ.

* * *

«Eŭrapiejskaja Biełaruś» abiacaje vystavić 60 kandydataŭ, choć pałova jaje zasnavalnikaŭ vybary bajkatujuć.

Staršynia arhkamitetu Narodnaj hramady Mikoła Statkievič abiacaje, što na vosieńskich parlamenckich vybarach jahonaja «Eŭrapiejskaja kaalicyja» vystavić kala 60 kandydataŭ. I heta niahledziačy na toje, što «Chartyja‑97» i «Małady front», inšyja elementy kaalicyi, vykazalisia za bajkot. Čamu siabry partyjaŭ Statkieviča i Navasiada nie iduć pa ahulnym śpisie kandydataŭ ADS?

«Pačynajučy ź minułaha leta, my nieadnarazova źviartalisia da kiraŭnictva ADS z prapanovaj vypracavać ahulnuju vybarčuju platformu, jakaja b hruntavałasia na idei eŭraintehracyi. Adnak namahańniami prarasiejskich siłaŭ unutry apazycyjnaj kaalicyi našy prapanovy byli adrynutyja», — kaža M.Statkievič.

«Usio, što raskołvaje ADS, — destruktyŭnaja pazycyja», — adkazvaje Statkieviču namieśnik staršyni PKB Valery Ŭchnaloŭ.

«Naš udzieł u vybarach — heta sproba zmahańnia z apatyjaj i rasčaravańniem, — paryruje M.Statkievič. — Asabista ja chaču pajści na vybary ŭ Miensku pa akruzie, dzie bieź mianie nie było dastatkovaj ahitacyi za dałučeńnie Biełarusi da ES», — padsumoŭvaje palityk.

Źmicier Pankaviec

Fota photo.bymedia.net

• 0
• 0
• 0
• 0
• 0
• 0
• 0
• 0