Paŭlučenka pra hulniu Mackieviča: Papachvaje palityčnym machlarstvam

Były palitviazień Uładzimir Mackievič dabivajecca praviadzieńnia mietadałahičnaj hulni z udziełam asnoŭnych fihur demakratyčnaha ruchu Biełarusi. Zhodu ŭžo nibyta dali hałoŭny savietnik Cichanoŭskaj Franak Viačorka, Viktar Babaryka, pradstaŭniki pałka Kalinoŭskaha, «Bajsoła», «Kibierpartyzan» i mnohija inšyja. Mackievič hałoŭnym vynikam praviadzieńnia hulni bačyć raspracoŭku ahulnaj stratehii dla biełaruskaj dyjaspary. 

Skažu adrazu, i sam farmat, i arhanizatary, i infakampanija pa prasoŭvańni idei asabista ŭ mianie vyklikali hłuchoje supraciŭleńnie. Ci to asoba Uładzimira Mackieviča, ci to šlejf mietadałahičnaha vučeńnia, ci to niedavier da tych palityčnych hrup, jakija adrazu pačali «tapić» za «dźviž», ci to jašče niešta nieŭśviadomlenaje. Zachaciełasia razabracca ŭ sabie, u sihnałach intuicyi, tamu i pišu hety tekst.

Chto taki Uładzimir Mackievič?

Sam siabie jon nazyvaje mietadołaham, a ź niadaŭniaha času i palityčnym fiłosafam. Klučavoje tut «sam siabie», ale pra heta paźniej.

Aktyŭnaje hramadskaje žyćcio ŭ Biełarusi jon pačaŭ u 1993 hodzie, kali jamu było 37 hadoŭ. Viarnuŭsia z Rasii i, zdajecca, zaśviaciŭsia ŭsiudy: Minadukacyi, Soras, Chartyja'97, AHP, ANT i navat u BCHD z «Daktrynaj biełaruskaha kansiervatyzmu».

Ale hałoŭnaj spravaj jaho žyćcia była «sistema-myśleńnie-dziejnasnaja mietadałohija». Heta taki fiłasofska-mietadałahičny kirunak, jaki zaradziŭsia ŭ paślavajennym SSSR. Jaho ideołahami nazyvajuć Hieorhija Ščadravickaha i Alaksandra Zinoŭjeva.

Kamunistyčnyja ŭłady ŭbačyli ŭ ruchu patencyjał i pasprabavali ź jaho dapamohaj krychu akulturyć sistemu. Darečy, kanśpirołahi śćviardžajuć, što litara Z padčas napadu Rasii na Ukrainu źjaviłasia ŭ honar zasnavalnika škoły fiłosafa Zinoŭjeva.

Heta nie značyć, što «mietadołahi» — prychilniki kamunizmu ci «ruskaha śvietu». Zusim nie. Heta chutčej takoje staŭleńnie da žyćcia, kali, nasamreč, plavać, u jakoj ideałahičnaj ramcy «mietadałožyć». Žycharu poźniaha SSSR tłumačyć pryrodu takoha śvietapohladu nie treba. U pucinskaj Rasii hety typ ludziej pryniata nazyvać technakratami.

Heta nie pieršaja arhanizacyjna-dziejnasnaja hulnia (ADH), jakuju arhanizuje biełaruski paśladoŭnik Ščadravickaha. Pieršaja adbyłasia roŭna 22 hady tamu i pryviała da raspracoŭki (uvaha!) pieramožnaj palityčnaj stratehii dla Biełarusi (Stratehija-2006).

Jana praduhledžvała stvareńnie ŭ biełaruskim hramadstvie ŭpeŭnienaści ŭ nieabchodnaści likvidacyi režymu Łukašenki svaimi siłami, vyznačeńnie lidara, zdolnaha pieramahčy i źmianić Łukašenku na čale dziaržavy, i pryviadzieńnie vyłučanaha lidara na pasadu prezidenta.

I tady mnohija ŭ demakratyčnym ruchu stavilisia da idej Mackieviča sa skiepsisam, tamu valić režym było vyrašana samastojna praz stvareńnie ruchu «Ruch». Spojler — režym zavaleny nie byŭ.

Što ž heta za hulnia takaja?

«Toj, chto robić staŭki ŭ hulni, vyjhraje. Chto nie robić — prajhraje jašče da pačatku. Admova ad udziełu aznačaje jak minimum, što ty nie atrymaješ ničoha. A ŭ maksimumie — možaš apynucca za bortam pracesu. Kali hulnia budzie paśpiachovaj i sapraŭdy pačnie mianiać kirunak dziejnaści palityčnych i hramadskich sił, to tyja, chto nie ŭdzielničaŭ, zastanucca pa-za miežami hetaha pracesu. Tamu ja kažu prosta: nie chočacie — nie ŭdzielničajcie. Ale ja vas papiaredziŭ», — žorstka sfarmulavaŭ svaju pazicyju ŭ kamientary «Našaj Nivie» Uładzimir Mackievič.

Udzielnikaŭ vyvoziać u cichaje miesca na tydzień. Praces składajecca, kali vielmi spraščać, ź niekalkich etapaŭ — samavyznačeńnie, kanflikt, stvareńnie «abjektyŭnaj karciny» i novaje samavyznačeńnie. Hulnia doŭžycca bieź pierapynku pa 10—12 hadzin, z deficytam snu i pastajannym psichałahičnym i refleksiŭnym ciskam. Usio heta, viadoma, treba, kab «prarvać rucinu».

Zatym vuzkaja hrupa zamacoŭvaje vynik. Kirujuć pracesam hulniatechniki i ich lidar. Nie, navat nie tak — «Hulniatechniki» i «LIDAR».

Viedajecie, na što heta padobna? Na praktyki tatalitarnaj siekty abo sieminary pa asobasnym roście, dzie hałoŭnaje — vyšturchnuć udzielnika na psichałahičnyja areli «prynižeńnie-adabreńnie», jakija vyklikajuć mahutnyja prylivy dafaminu i žorstkuju zaležnaść. U paŭsiadzionnym žyćci z hetym možna sutyknucca ŭ siamji, dzie muž i žonka čarhujuć skandały i prymireńni pa śpirali, usio bolš nakručvajučy adzin adnaho na kožnym novym etapie.

Samazvaniec

Pamiatajecie, my ŭžo sutykalisia z samavyznačeńniem. Mackievič licha zapisaŭ siabie ŭ palityčnyja fiłosafy sam. Heta cikavy fienomien. U «mietadałohii» samavyznačeńnie nievypadkovaje. Meta hulniatechnika — złamać zvykłyja praviły hulni, vyjści za ramki, kab znajści niečakanaje rašeńnie, tamu zvykłyja instytuty škodziać pracesu. Ale jość u samavyznačeńnia i advarotny bok — u hramadstvach, dzie razburana abo nie stvorana tradycyja, instytucyi, sistema filtraŭ, ijerarchija, pierajemnaść, luby staršynia saŭhasa moža skarystacca chvilinnaj słabaściu i nalić u vušy ludziam usio što zaŭhodna.

Kali pieravieści samavyznačeńnie na pole mietadałahičnaj hulni, to vychodzić, što nie stolki ŭdzielniki samavyznačajucca, a chutčej arhanizatar hulni stanovicca carom i boham dla ŭdzielnikaŭ.

Pry hetym hulniatechnika-lidara nichto nie vybiraje, nikoha jon nie pradstaŭlaje i naohuł usio trymajecca tolki na daviery i zhodzie ŭdzielnika na časovaje padparadkavańnie.

U kłasičnaj ADH arhanizatary maksimalna addalenyja ad realnaha žyćcia ŭdzielnikaŭ hulni, vystupajuć niezacikaŭlenym źniešnim bokam. U advarotnym vypadku ŭvieś sens hulni razburajecca — zanadta šmat ułady atrymlivaje arhanizatar u pracesie.

I, badaj, mienavita heta biantežyć mianie bolš za ŭsio, bo Uładzimir Mackievič źjaŭlajecca lidaram adnoj z palityčnych hrup u demruchu.

Što atrymlivajem u vyniku? Adzin z palityčnych subjektaŭ, jakija pretendujuć na lidarstva, abviaščaje ab praviadzieńni mietadałahičnaj hulni i ŭltymatyŭna patrabuje ad lehitymnych lidaraŭ pryniać u joj udzieł.

Vałodajučy nikčemnaj lehitymnaściu, sumnieŭnaj ekśpiertnaściu, abapirajučysia na manipulatyŭnyja praktyki, Uładzimir Mackievič pretenduje na bieśpiarečnaje padparadkavańnie, a Cichanoŭskaja, Babaryka, Kaleśnikava, Łatuška — heta tolki fihury na šachmatnaj došcy myślara. Nu takoje…

Uładzimir Uładzimiravič, jość inšaja prapanova. Chutka buduć vybary ŭ Kaardynacyjnuju radu, praz paru dzion zavieršycca pryjom śpisaŭ błokaŭ dla ŭdziełu ŭ vybarach. Moža, vy b schadzili na vybary, atrymali padtrymku vybarščykaŭ i z vyšyni maralnaj i elektaralnaj pieravahi prapanavali ŭsim astatnim paŭdzielničać u hulni. Inakš heta ŭsio pachnie palityčnym machlarstvam. Jak kažuć, albo kryžyk źnimicie, albo…

Z usioj pavahaj, i bieź niehatyvu.

• 19
• 4
• 3
• 4
• 2
• 0
• 0
• 0