Minčuku patelefanavali ašukancy, a jon ich davioŭ. Dajcie heta pasłuchać svaim blizkim

Akt pieršy. Na provadzie «kamunalniki»

— Telefanavali z łatvijskaha numara, tamu ja adrazu zrazumieŭ, što budzie razvod, i ŭklučyŭ dyktafon. Samaje cikavaje, što ŭ nas sapraŭdy stary dom i my praŭda staim u čarzie na zamienu ličylnikaŭ vady. I mienavita pa hetym pytańni mnie i telefanavali, — kaža minčuk.

Razmovu «dziaŭčyna z ŽKH» pačała ź nievialikaha «najezdu»: nibyta surazmoŭca tak i nie zapoŭniŭ zajaŭku na biaspłatnuju zamienu ličylnika i ciapier jamu pryjdziecca pravodzić usie manipulacyi za svoj košt. Ale dobra, što ŭsio možna vypravić prosta zaraz. Treba tolki zapoŭnić tuju samuju zajaŭku, heta značyć, pradyktavać pašpartnyja danyja.

— Padkažycie, pa jakim adrasie zamiena? U mianie dźvie kvatery, — vyrašyŭ pravieryć tych, chto telefanuje, čytač. Ale ŭ tych, vidać, na ŭsie pytańni pradumanyja piarečańni.

— Pa sistemie baču, što majstar pryjedzie pa adrasie faktyčnaha pražyvańnia. U dalejšym vy jamu daście infarmacyju pa druhim adrasie — usio pierapravierycie.

— Dyk zaraz pa jakim adrasie budzie zamiena?

— Pa vašym faktyčnym adrasie pražyvańnia. Ja prosta dyśpietčar, mnie nie vyśviečvajecca hetaja infarmacyja. Ale baču pa sistemie, što pa faktyčnym. U nas kožny ličylnik idzie pad spravazdačnaść, — praciahvaje dziaŭčyna. — Voś pryviadu vam prykład: vy, dapuścim, vadoj karystajeciesia, naprykład, hazam albo ž śviatłom. I vy ŭsiudy dajacie vaš asabisty numar jak spažyviec. I dakładna hetak ža, pakolki vam zaraz buduć pravodzić zamienu ličylnika na biazvypłatnaj asnovie, my budziem paznačać vas jak spažyŭca. U suviazi z tym, što nam nieabchodna paznačyć vas jak spažyŭca, nam treba napisać taksama infarmacyju datyčna vašaha asabistaha numara albo ž pašparta. Padkažycie, Pavieł Ivanavič, za jakim dakumientam ja mahu paznačyć vas jak spažyŭca hetaha ličylnika?

Tut užo dama sabrała ŭsio fiłałahičnaje komba: «asabisty», «za jakim dakumientam». Raniej ža jana ŭžyvała farmuloŭku «vam zručniej na pieršuju pałovu dnia abo na druhuju». Našy ludzi tak nie kažuć. Uvohule, ašukancy prakołvajucca navat na linhvistyčnym uzroŭni — uvažliva słuchajem i nie vierym.

Naprykancy, kab zusim užo rassłabić surazmoŭcu, «dyśpietčar» prapanavała aformić ilhoty na apłatu kamunalnych pasłuh u pamiery 17%. Nazaŭždy! «Heta źviazana: kali pa adrasie pražyvajuć piensijaniery, chtości ź invalidnaściu albo niechta, pracaŭładkavany zvyš 15 hadoŭ». Kab raźličyć pracentnuju staŭku, «kamunalščycy» nieabchodna vyśvietlić pamier zarabotnaj płaty surazmoŭcy. Moža, nibyta navat atrymajecca pavialičyć ilhotnuju staŭku.

Akt druhi. Na provadzie «śledčy»

Dalej, viadoma ž, rušyŭ kłasičny praciah: maładoha čałavieka nabraŭ užo «śledčy», jaki byŭ u kursie pieradačy pašpartnych danych «vodakanału».

Maŭlaŭ, chutka nadydzie biada: asabistyja danyja buduć vykarystanyja dla vyvadu skradzienych hrošaj. Ale, kab hetaha nie zdaryłasia, pryjdziecca arhanizavać tatalnuju błakiroŭku rachunkaŭ. Praŭda, źlić usie svaje rachunki čałaviek pavinien sam.

Tut užo čytač Onliner vyrašyŭ pazabaŭlacca i prydumaŭ «Viełamotabank», u jakim braŭ kredyt. Ašukaniec i vokam nie mirhnuŭ. Zatoje vyrašyŭ pazapałochvać surazmoŭcu hučnymi słovami «terarystyčnaja dziejnaść», «uzłom bankaŭskaj sistemy», «abarona dziaržaŭnaj finansavaj sistemy», «supraćdziejańnie źniešnim pahrozam i kibierhrupoŭkam».

Taksama ŭ pracesie razmovy vyśvietliłasia, što ŭ nas u krainie jość «čornyja nataryusy», jakija za tysiaču rubloŭ jakija zaŭhodna dakumienty zrobiać.

— Dyk a što mnie rabić? — zadaŭsia łahičnym pytańniem minčuk.

— Kali ŭ miežach hetych dziejańniaŭ na vas zaviaduć «kryminałku», pryjduć z vobšukam i znojduć niezadekłaravanuju najaŭnuju valutu, suma budzie aŭtamatyčna kanfiskavanaja jak kryminalny dachod da zakančeńnia śledstva.

Kab hetaha nie adbyłosia, my pravodzim praceduru dziaržaŭnaha dekłaravańnia. Nazavicie dakładnuju sumu najaŭnych hrošaj, jakaja ŭ vas znachodzicca, — patłumačyŭ śledčy i pačaŭ zadavać mnostva ŭdakładniajučych pytańniaŭ až da adrasoŭ bankaŭ, dzie nabyvałasia valuta, što zachoŭvajecca doma.

Skončyłasia ŭsio tym, što baki damovilisia nakont kodavaha słova — «fakieł».

Maralny cisk, adznačym, akazvajecca davoli istotny (až da ahučvańnia «padpiski ab nierazhałošvańni» i vierahodnaści stać pryśpiešnikam ašukancaŭ). Ułasna, tak i razvodzili ŭsich našych suajčyńnikaŭ i navat samu Łarysu Dolinu.

Akt treci. Na provadzie Nacbank

Razmova sa śpiecyjalistam Nacbanka pačałasia z kodavaj frazy «fakieł». Maksimum surjoznaści.

Zatym pačałasia «forma pierapravierki i dyjahnostyka».

Asabliva było padkreślena, što razhałošvać infarmacyju trecim asobam nielha.

— My nie kažam pra fakty mahčymaha kradziažu srodkaŭ. Kali jany znachodziacca na aščadnym rachunku, jaki terminovy pa ŭmovach absłuhoŭvańnia, to my prosta pierapravierym status pachodžańnia hetych srodkaŭ i pastavim da dahavora adznaku, što Nacyjanalny bank pierapravieryŭ finansy, što jany zdabyvalisia zakonnym čynam. Što tyčycca najaŭnych srodkaŭ, to nieabchodna z boku milicyi atrymać rasparadžeńnie, jak budzie prachodzić forma dekłaracyi. I ci patrabujecca jana vam naohuł, — patłumačyła «śpiecyjalistka».

U vyniku razmova źviałasia da taho, što supracoŭnikam Nacbanka treba asabista pierapravieryć kožnuju kupiuru — źvieryć naminał i sieryjny numar. I tolki paśla hetaha budzie zrazumieła, ci ŭ sumlennym «bai» byli zdabytyja kupiury, jakija zachoŭvajucca doma. Ale ŭsio biaśpiečna: zamiest hrošaj čytaču ŭručać «formu dekłaracyi», jakaja ŭ dalejšym jaho abaronić.

Jašče krychu paźniej vyśvietliłasia, što najaŭnyja hrašovyja srodki, jakija zachoŭvajucca doma, treba budzie sfatahrafavać i dasłać u Nacbank. Pa Viber. Heta, mahčyma, źbieraže dom ad vobšuku.

Zrešty, dasłanaje čytačom «stokavaje» fota hrošaj Nacbanku nie spadabałasia: stali patrabavać aryhinał, zrobleny tut i zaraz. I zaadno pryhrazili artykułam za łžyvyja pakazańni.

Pierakanać čałavieka, što fota sapraŭdy patrebnaje, ašukancam tak i nie ŭdałosia. Tamu śpiecyjalistka «Nacbanka» psichanuła.

— Moža, vy ašukancy ŭsio ž taki, a?

— Nu ŭsio, Pavieł Ivanavič. Ja vam niešta dakazvać budu? Dahavor absłuhoŭvańnia skasoŭvajecca. Nie budu marnavać ni vaš, ni svoj čas. Davajcie. Nie davajcie. Vam tam nudna doma, ja tak heta rasceńvaju. I vy nie razumiejecie, ź jakoj arhanizacyjaj kamunikujecie. Ja zaraz inicyjuju skasavańnie dahavora absłuhoŭvańnia i prymusovy aryšt vašych rachunkaŭ, — skazała Viktoryja Viktaraŭna z Nacbanka i kinuła słuchaŭku.

— Naohuł ja dumaŭ dačakacca kurjera, jaki pavinien pryjechać za hrašyma, — navat škaduje, što «śpiecapieracyja» nie dajšła da kanca, minčuk. I papiaredžvaje: telefanavali jamu z nastupnych numaroŭ:

+375 44 554-62‑05 — KDB;

+375 44 500-94‑64 — Nacbank z Viber.

Paŭłu Ivanaviču praciahvajuć da hetaha času telefanavać «śpiecyjalisty» z roznych struktur. Minčuk žartuje, što «złamaŭ im skrypty» i ciapier jany sami nie viedajuć, što rabić. Mužčyna ŭžo adkryta kpić z ašukancaŭ, a jany ŭsio jašče imknucca jaho «dacisnuć» i paralelna «ŭskryvajucca»: na niervach užo vylezła rodnaja «palicyja», a nie «milicyja».

Pa stanie na poŭdzień vyśvietliłasia, što na minčuka ŭžo ŭziali vialiki kredyt. I ŭvohule jaho chutka aryštujuć, tamu što jon «padazronaja asoba».

Što skazać, apracoŭvajuć znatna. U momancie razhubicca i pavieryć u praŭdzivaść usiaho, što adbyvajecca, vielmi lohka. Tym bolš što telefon praktyčna nie zmaŭkaje: na provadzie ŭvieś čas visić chtości sa «śpiecyjalistaŭ» i syple hroznymi terminami i artykułami Kryminalnaha kodeksa.

• 12
• 0
• 15
• 14
• 3
• 1
• 6
• 0