Biełaruś nie hałasavała pa rezalucyi PA ABSIE ab parušeńniach pravoŭ i svabod čałavieka ŭ Krymie
Delehacyja Biełarusi nie hałasavała pa rezalucyi Parłamienckaj asamblei (PA) ABSIE «Parušeńni pravoŭ čałavieka i asnoŭnych svabod u Aŭtanomnaj Respublicy Krym i horadzie Sievastopali». Hety dakumient źjaŭlajecca adnoj z dadatkovych rezalucyj da Tbiliskaj dekłaracyi, pryniataj na 25-j siesii PA ABSIE, jakaja prachodziła 1—5 lipienia.
«Pa rezalucyi, jakaja tyčycca Ukrainy, my nie brali ŭdziełu ŭ hałasavańni», — paviedamiła BiełaPAN člen pastajannaj kamisii Pałaty pradstaŭnikoŭ Nacyjanalnaha schodu pa mižnarodnych spravach Valancina Lavonienka, jakaja ŭdzielničała ŭ asamblei.
Pavodle słoŭ parłamientaryja, pa astatnich pytańniach biełaruskaja delehacyja hałasavała.
Na pasiadžeńni PA ABSIE byli pryniatyja try asnoŭnyja rezalucyi, jakija datyčacca palityčnych pytańniaŭ i biaśpieki; ekanamičnych pytańniaŭ, navuki, technałohij i navakolnaha asiarodździa; demakratyi, pravoŭ čałavieka i humanitarnych pytańniaŭ.
Akramia taho, parłamientaryi pryniali 16 dadatkovych rezalucyj, jakija datyčacca mier reahavańnia na kryzisy i kanflikty ŭ rehijonie, pašyreńnia supracoŭnictva ŭ Bałtyjskim rehijonie, procidziejańnia karupcyi, nasillu, u tym liku sieksualnamu, u adnosinach da žančyn i dziaciej, pravoŭ biežancaŭ. Asobna byli pryniatyja rezalucyi pa situacyi ŭ Hruzii, Małdovie i Ukrainie. Akramia taho, byŭ pryniaty dakumient, pryśviečany 30-j hadavinie avaryi na Čarnobylskaj AES.
***
U rezalucyi pa Krymie PA ABSIE rašuča asudziła «niezakonnuju anieksiju Rasijskaj Fiederacyjaj Aŭtanomnaj Respubliki Krym i horada Sievastopala» i parušeńni pravoŭ čałavieka na Krymskim paŭvostravie, u tym liku ŭ dačynieńni da Miedžlisa krymskich tataraŭ, zaklikała dziaržavy — udzielnicy asamblei ŭstrymlivacca ad lubych dziejańniaŭ abo kantaktaŭ, jakija prama ci ŭskosna mohuć razumieć pryznańnie źmieny statusu Kryma. Asambleja «nastojliva zaklikaje Rasijskuju Fiederacyju pakłaści kaniec ahresii suprać Ukrainy» i jak «dziaržavu, što akupuje i ažyćciaŭlaje faktyčny kantrol nad Krymskim paŭvostravam, vykonvać svaje abaviazacielstvy pa mižnarodnym pravie».
Taksama ŭ rezalucyi vykazvajecca hłybokaja zaniepakojenaść tym, što «ŭ Krymie źnikaje mahčymaść atrymańnia adukacyi na ŭkrainskaj movie i jaje vyvučeńnia ŭ vyniku akazańnia nacisku na administracyju škoł, nastaŭnikaŭ, baćkoŭ», asudžajucca abmiežavańni svabody ŚMI.
Akramia taho, PA ABSIE «vykazvaje hłybokuju zaniepakojenaść z nahody rostu militaryzacyi Krymskaha paŭvostrava i namieru Rasijskaj Fiederacyi raźmiaścić u hetym rehijonie jadziernuju zbroju, padryvajučy mir i biaśpieku ŭ hłabalnym, ahulnajeŭrapiejskim i rehijanalnym maštabie».
Jak paviedamlali ŚMI, rasijskaja delehacyja vystupiła rezka suprać prajekta rezalucyi pa Krymie i ŭ znak pratestu pakinuła pasiadžeńnie.
Kamientary