Беларусь не галасавала па рэзалюцыі ПА АБСЕ аб парушэннях правоў і свабод чалавека ў Крыме
Дэлегацыя Беларусі не галасавала па рэзалюцыі Парламенцкай асамблеі (ПА) АБСЕ «Парушэнні правоў чалавека і асноўных свабод у Аўтаномнай Рэспубліцы Крым і горадзе Севастопалі». Гэты дакумент з'яўляецца адной з дадатковых рэзалюцый да Тбіліскай дэкларацыі, прынятай на 25-й сесіі ПА АБСЕ, якая праходзіла 1—5 ліпеня.
«Па рэзалюцыі, якая тычыцца Украіны, мы не бралі ўдзелу ў галасаванні», — паведаміла БелаПАН член пастаяннай камісіі Палаты прадстаўнікоў Нацыянальнага сходу па міжнародных справах Валянціна Лявоненка, якая ўдзельнічала ў асамблеі.
Паводле слоў парламентарыя, па астатніх пытаннях беларуская дэлегацыя галасавала.
На пасяджэнні ПА АБСЕ былі прынятыя тры асноўныя рэзалюцыі, якія датычацца палітычных пытанняў і бяспекі; эканамічных пытанняў, навукі, тэхналогій і навакольнага асяроддзя; дэмакратыі, правоў чалавека і гуманітарных пытанняў.
Акрамя таго, парламентарыі прынялі 16 дадатковых рэзалюцый, якія датычацца мер рэагавання на крызісы і канфлікты ў рэгіёне, пашырэння супрацоўніцтва ў Балтыйскім рэгіёне, процідзеяння карупцыі, насіллю, у тым ліку сексуальнаму, у адносінах да жанчын і дзяцей, правоў бежанцаў. Асобна былі прынятыя рэзалюцыі па сітуацыі ў Грузіі, Малдове і Украіне. Акрамя таго, быў прыняты дакумент, прысвечаны 30-й гадавіне аварыі на Чарнобыльскай АЭС.
***
У рэзалюцыі па Крыме ПА АБСЕ рашуча асудзіла «незаконную анексію Расійскай Федэрацыяй Аўтаномнай Рэспублікі Крым і горада Севастопаля» і парушэнні правоў чалавека на Крымскім паўвостраве, у тым ліку ў дачыненні да Меджліса крымскіх татараў, заклікала дзяржавы — удзельніцы асамблеі ўстрымлівацца ад любых дзеянняў або кантактаў, якія прама ці ўскосна могуць разумець прызнанне змены статусу Крыма. Асамблея «настойліва заклікае Расійскую Федэрацыю пакласці канец агрэсіі супраць Украіны» і як «дзяржаву, што акупуе і ажыццяўляе фактычны кантроль над Крымскім паўвостравам, выконваць свае абавязацельствы па міжнародным праве».
Таксама ў рэзалюцыі выказваецца глыбокая занепакоенасць тым, што «ў Крыме знікае магчымасць атрымання адукацыі на ўкраінскай мове і яе вывучэння ў выніку аказання націску на адміністрацыю школ, настаўнікаў, бацькоў», асуджаюцца абмежаванні свабоды СМІ.
Акрамя таго, ПА АБСЕ «выказвае глыбокую занепакоенасць з нагоды росту мілітарызацыі Крымскага паўвострава і намеру Расійскай Федэрацыі размясціць у гэтым рэгіёне ядзерную зброю, падрываючы мір і бяспеку ў глабальным, агульнаеўрапейскім і рэгіянальным маштабе».
Як паведамлялі СМІ, расійская дэлегацыя выступіла рэзка супраць праекта рэзалюцыі па Крыме і ў знак пратэсту пакінула пасяджэнне.
23‑гадовага афіцэра брыгады спецназа асудзілі на 19 гадоў за «здраду дзяржаве»17
23‑гадовага афіцэра брыгады спецназа асудзілі на 19 гадоў за «здраду дзяржаве»
«Людзі каментавалі, што сальманела ўвайшла ў чат». Беларус паехаў працаваць у Крэмніевую даліну — і стаў кулінарным блогерам на 28 мільярдаў праглядаў88
Каментары