«Ja suprać usich voś hetych, chto pa-biełarusku razmaŭlaje. Ničoha dobraha ź imi nia budzie», zajaviŭ biełarus-bajavik tak zvanaj ŁNR karespandentu Svabody.
Na minułym tydni Svaboda pisała, što błohiera Antona Matolku vyklikali ŭ Mahiloŭskaje ŭpraŭleńnie pa baraćbie z arhanizavanaj złačynnaściu ŭ jakaści śviedki. Raniej Matolka nieadnarazova źviartaŭsia da pravaachoŭnikaŭ z metaj vyśvietlić, čamu letaś tyja spačatku zatrymali, a paśla adpuścili biełarusa-bajevika ŁNR Ivana Jaravoha.
Upieršyniu pra 27-hadovaha naradženca Mahiloŭščyny, jaki pajechaŭ vajavać na Danbas na baku separatystaŭ pad pazyŭnym «Puškin», paviedamiła dziaržaŭnaja hazeta «SB Biełaruś siehodnia» u numary ad 11 lutaha 2016 hodu. Aŭtar artykułu «Hastarbajtary vajny» padkreślivaje: źviestki dakładnyja, bo byli atrymanyja ź milicejskich daviedak.
Jaravy raspavioŭ u interviju Svabodzie, jak ŭ Mahiloŭskim SIZA śledčy staviŭsia da jaho «pa-čałaviečy»: prynosiŭ ježu, dazvalaŭ hulacca ŭ kamputarnyja hulni. Praz tydzień Ivana vypuścili pad raśpisku, što jon viedaje pra kryminalnuju adkaznaść za najomnictva.
Nahadajem, u červieni Mahiloŭski UBAZ adreahavaŭ na zapyt Antona Matolki nakont bajevika. Pavodle milicyjantaŭ, Ivan Jaravy nie ŭtrymlivaŭsia ŭ Mahiloŭskim SIZA ŭ peryjad z 01.01.2014 pa 26.02.2016, i na jaho nie była zaviedzienaja adpaviednaja kryminalnaja sprava.
Paśla publikacyi Svabody «Puškin» sam pa telefonie vyjšaŭ na suviaź z našym karespandentam.
«Kaniečnie, ja byŭ u SIZA! A jak vy dumajecie, adkul tady ŭ «SB» pra maje isnavańnie daviedalisia? — kaža Ivan. — I kali mianie adtul vypuścili, nijakaha asablivaha dakumentu nie dali. Prosta pastaviŭ podpis…»
Ciapier «Puškin» viarnuŭsia ŭ Łuhanskuju vobłaść paśla lačeńnia ŭ rasiejskim špitali i praciahvaje vajavać, adnak nie ŭdakładniaje nazvu ŭzbrojenaha farmavańnia.
Na pytańnie, ci źbirajecca jon u budučyni viartacca na radzimu, «Puškin» adkazvaje:
«Viarnusia, kali ŭ Biełarusi pačniecca majdan, budu razhaniać. Ja suprać usich voś hetych… chto pa-biełarusku razmaŭlaje. Ničoha dobraha ź imi nia budzie. A pakul za 300 metraŭ ad nas — pazycyi ŭkraincaŭ. Ja ich baču».
Na abiedzie Łukašenki i Si Czińpina prysutničała i adzinaja dačka kitajskaha lidara11
Kamientary