U ANB źjaviŭsia novy Snoŭden? U internecie vystaŭlenyja na prodaž špijonskija prahramy amierykanskaj vyviedki

15 žniŭnia hrupa chakieraŭ «ShadowBrokers» anansavała aŭkcyjon pa prodažy špijonskaha prahramnaha zabieśpiačeńnia, jakim karystajecca amierykanskaje Ahienctva nacyjanalnaj biaśpieki (ANB).

Vydańnie The Intercept paćvierdziła, što ANB sapraŭdy karystajecca prapanavanymi prahramami, bo jany ŭzhadvalisia ŭ niekatorych dakumientach Edvarda Snoŭdena, jakija raniej nikoli nie publikavalisia.

Jak chakiery atrymali dostup za sakretnaha prahramnaha zabieśpiačeńnia, pakul nieviadoma. Niekatoryja kibierekśpierty abvinavacili va ŭciečcy Rasiju. 

Chakiery «ShadowBrokers» atrymali dostup da niekalkich špijonskich prahram. Bolš za ŭsio infarmacyi jość pra dadatak SECONDDATE. Hetaja prahrama pierachoplivaje zapyty internet-karystalnikaŭ i pieranakiroŭvaje ich na veb-siervier ANB FOXACID, a karystalnik pra heta navat nie zdahadvajecca. Potym veb-siervier zaražaje kampjutary škodnasnymi prahramami, jakija dazvalajuć amierykanskim śpiecsłužbam sačyć za karystalnikami. Dakładna viadoma, što takim čynam ANB nazirała za pakistanskim telekamunikacyjnym apierataram i za kampjutarnaj sistemaj livanskaj arhanizacyi «Chizbała», źbirajučy infarmacyju pra patencyjnyja terarystyčnyja pahrozy.

Vykarystańnie amierykanskimi śpiecsłužbami padobnych prahram možna apraŭdać imknieńniem da biaśpieki. Ale zaraz, kali špijonskaje prahramnaje zabieśpiačeńnie patrapiła ŭ ruki chakieraŭ, naadvarot, uźnikaje surjoznaja niebiaśpieka. Im mohuć skarystacca terarysty, kibieranarchisty z metaj kradziažu albo kab prosta vyklikać hłabalny chaos.

Z dakumientaŭ Snoŭdena možna zrabić vysnovu, što SECONDDATE źjaŭlajecca kampanientam bolš hłabalnaj prahramy BADDECISION. Hety instrumient sačeńnia pracuje ŭ biespravadnych sietkach. Apieratary ANB vykarystoŭvajuć śpiecyjalnuju antenu, jakaja absłuhoŭvajecca prahramaj BLINDDATE. BLINDDATE zapuskaje BADDECISION, što robić mahčymym ažyćciaŭlać ataki na kampjutary pry dapamozie SECONDDATE.

Treba adznačyć, što SECONDDATE — heta tolki adzin ź mietadaŭ nakiravańnia karystalnika na veb-siervier ANB FOXACID. Siarod inšych mietadaŭ — rassyłka spamu sa spasyłkami, jakija viaduć naŭprost na FOXACID.

Jak chakiery atrymali dostup da hetych prahram, možna tolki zdahadvacca. Mahčyma, u ANB źjaviŭsia novy «snoŭden», albo ŭciečka stała vynikam chakierskaj ataki. Ale Edvard Snoŭden maje inšaje mierkavańnie. Jak jon adznačyŭ, ANB časta vykarystoŭvaje kampjutary inšych arhanizacyi bieź ich viedama. Mahčyma, ANB skarystałasia čužym kampjutaram i prosta nie «prybrała» za saboj. Takim čynam hrupa chakieraŭ albo śpiecsłužba atrymała dostup da fajłaŭ.

• 0
• 0
• 0
• 0
• 0
• 0
• 0
• 0