4 vieraśnia ŭ Padlašskaj opiery Biełastoka adbudziecca premjera jubilejnaj viersii «Narodnaha alboma». U internecie źjaviłasia pieršaje videa z repietycyj, na jakim možna pabačyć anoŭleny skład prajekta i ŭpieršyniu pačuć uryŭki anoŭlenych aranžyravańniaŭ.
Jubilejnaja viersija «Narodnaha alboma» stvarajecca ź inicyjatyvy telekanała «Biełsat» pry niepasrednym udziele aŭtaraŭ prajekta: Lavona Volskaha i Michała Aniempadystava. U joj taksama biaruć udzieł inšyja vakalisty i muzyki aryhinalnaha składu: Źmicier Vajciuškievič, Kasia Kamockaja, Alaksandr Pamidoraŭ, Siarhiej Achramovič.
Da ich dałučylisia hitaryst Siarhiej Kananovič (eks-«Krambambula»), muzyki hurta Apple Tea, strunny kvartet Aquarelle, duchavaja siekcyja pad kiraŭnictvam Pafnucija Kuziukiana (eks-«Lapis Trubiacki») i trya bek-vakalistak.
— Ja vielmi zadavoleny, bo prajekt zaraz uzbahaciŭsia farbami, na jakija raniej prosta nie chapała mahčymaściaŭ: haboj, truba, strunnyja, kłavišnyja i šykoŭnyja bek-vakalistki, — kaža Lavon Volski. — Dziakujučy hetamu zaraz źjaviŭsia taki cikavy kantrast pamiž pieśniami, jakija vykonvajuć adzin-dva čałavieki, i tymi, dzie hraje ŭvieś ansambl — atrymlivajecca vielmi dynamična.
Značnaje palepšańnie čakajecca i pa vizualnaj častcy prajekta, za jakuju adkazvaje viadomy polski televizijny režysior Konrad Smuha. Nad elemientami mastackaha azdableńnia, scenahrafijaj i kaściumami pracujuć mastačka Alena Ihruša i Michał Aniempadystaŭ.
Premjera televizijnaj viersii prajekta maje adbycca na telekanale «Biełsat» i aficyjnym kanale YouTube naprykancy vieraśnia. Kvitki na mierapryjemstva možna było atrymać za słušnyja adkazy na pytańni pra «Narodny albom» — biełaruskaja kvota z 300 kvitkoŭ razyjšłasia za 2 hadziny. Pry hetym 63% hledačoŭ nie zamaŭlali biaspłatnuju vizavuju padtrymku.
Pašpart Novaj Biełarusi pačnuć vydavać z 26 studzienia. Što viadoma i jak atrymać?90
Kamientary