Movananoŭcy sa školnikami naviali paradak la doma Baradulina i naviedali dom Bykava FOTAREPARTAŽ
1 kastryčnika «Mova Nanova» zładziła tałaku va Ušačach. Achvotnych davieści da ładu terytoryju pobač z domam narodnaha paeta naźbirałasia 40 čałaviek.
Adhuknulisia nie tolki słuchačy kursaŭ, ale i dzieviacikłaśniki adnoj sa staličnych škoł. A lidar hurta «Recha» Andruś Takindanh, jaki taksama dałučyŭsia da tałaki, dapamahaŭ nie tolki rydloŭkaj, ale i śpievami.
Vałanciory prybrali hniłyja jabłyki, što dyvanom zasłali ziamlu la doma Baradulina, pafarbavali aharodžu.
Ustalavali novyja stendy, kab možna było tut ža pračytać pra paeta i pabačyć jaho fota.
Dva dziasiatki novych zdymkaŭ źjavilisia i ŭ samim domie, ich raźmierkavali pa pakojach.
Na skryžavańni niepadalok ustalavali stend, jaki pakazvaje, kudy treba jechać, kab ubačyć, dzie žyŭ vybitny biełarus.
La mahiły Ryhora Baradulina pastavili łavu, kab tym, chto pryjdzie ŭšanavać jaho pamiać, možna było prysieści. Pobač taksama ŭstalavali niekalki stendaŭ.
«My mała što možam rabić, pakul dom nie źjaŭlajecca muziejem, — kaža Hleb Łabadzienka, arhanizatar tałaki. — Z dazvołu Valanciny Michajłaŭny my tolki ŭnieśli nievialikija łakaničnyja dadatki, jakija možna lohka prybrać. Kaniečnie, kali siamja Baradulina vyrašyć zrabić tut muziej, to ŭ mianie jość šmat idej, što možna darabić i jak arhanizavać prastoru.
Pobač z domam raście šmat jabłyń, dziadźka Ryhor kazaŭ, što heta «maminy jabłyni». Letaś mastaki zładzili tut plener, varta było b zrabić padobnyja mierapryjemstvy rehularnymi. Siudy možna pryvozić školnikaŭ, kab jany mahli pabačyć toj ža kabiniet, dzie Baradulin napisaŭ šmat svaich vieršaŭ. Tamu kali budzie rašeńnie siamji zrabić muziej, mnie b vielmi chaciełasia paŭdzielničać».
Paśla Ušačaŭ hrupa nakiravałasia ŭ Byčki, dzie mieścicca Muziej-siadziba Vasila Bykava. Adzin z udzielnikaŭ tałaki padaryŭ muzieju televizar, jaki prymacavali da ściany ŭ pakoi.
Ciapier naviedniki zmohuć pabačyć ceły archiŭ fota, a taksama videazapis ekskursii siastry piśmieńnika Valanciny Bykavaj, jaki zrabiŭ Hleb Łabadzienka. U domie raźviesili šmat archiŭnych fotazdymkaŭ.
U muziej pryvieźli adrestaŭravanaje kresła, ź jakim źviazanaja cikavaja historyja.
«Kali pryjšli kamunisty, to ź miascovaj panskaj siadziby zrabili škołu, dzie i vučyŭsia Vasil Bykaŭ. Potym hetuju škołu začynili, i jaje pačali raściahvać, — raspaviadaje Hleb Łabadzienka. — Baćka Vasila Bykava prynios dadomu nastaŭnickaje kresła i zahadaŭ synu, budučamu piśmieńniku, vyrazać na śpincy inicyjały BVCH — Bykaŭ Vładzimir Chviedaravič. Kab dumali, što kresła zaŭsiody i było ŭ domie».
Kali stvaryli Muziej-siadzibu, svajaki Bykava prynieśli hetaje kresła, ale jaho nie ŭziali. U kresła nie chapała nožki, śpinka była pałamanaja, nie było siadzieńnia, voś i vyrašyli takoje «łamačča» nie brać. Kali pra heta daviedaŭsia Siarhiej Šapran, prapanavaŭ jaho adšukać. Kresła znajšłosia ŭ dryvotni bratavaj Bykava Antaniny Alaksandraŭny, jakaja ŭ toj čas była zahadčycaj muzieja.
«Majstar Jaŭhien Zarubajka ŭziaŭsia jaho adnavić i zrabiŭ heta biaspłatna, — praciahvaje Hleb. — Skazaŭ, što heta dla jaho honar, tamu što Vasil Bykaŭ byŭ lubimym piśmieńnikam jaho baćki».
Hetaja tałaka — pieršaja, jakuju zładziła «Mova Nanova». Arhanizatary spadziajucca, što jana budzie nie apošniaj.
«Naša Niva» — bastyjon biełaruščyny
PADTRYMAĆ
Ciapier čytajuć
Stała viadoma, jak zatrymali byłoha kalinoŭca Maksima Ralko6
Kamientary