Andrej Adamovič, u jakoha treciaje miesca premii Hiedrojca: «Ja pajechaŭ u Vilniu, sieŭ i napisaŭ knihu za dziesiać dzion»
12 kastryčnika stali viadomyja imiony pieramožcaŭ štohadovaj litaraturnaj premii Ježy Hiedrojca. Siarod ich — Andrej Adamovič z knihaj «Taŭściła i lešč». Z troch pieramožcaŭ na cyrymonii prysutničaŭ tolki jon.
Knihi ŭsich kankurentaŭ Andrej pračytać nie paśpieŭ, tamu i aceńvać ich nie biarecca, ale pra ŭłasnuju pahutaryć hatovy.
«Naohuł, hetaja kniha — nie pra ryb. Hetaja kniha pra čałavieka, jon jak miera ŭsich rečaŭ. Tut pra adnaho majho siabra, jon rybak, — kaža Andrej. — Uładzimir Arłoŭ kazaŭ pra maju knihu, što ŭ joj bliskučy finał. Valancin Akudovič — što kniha čytajecca, jak chvacki detektyŭ. Valancin Vasiljevič moj nastaŭnik u litaratury, vielmi škada, što jon siońnia nie atrymaŭ nijakaj uznaharody».
Andrej taksama pryhadaŭ, jak jon pisaŭ svaju knihu.
«Ja pračytaŭ na sajcie PEN-centra, što jość rezidencyja dla maładych litarataraŭ, i vyrašyŭ napisać tudy zajaŭku. Pačaŭ jaje tak: «Vy ž maje ŭsie darahija, ja ž vas usich jak abłuplenych viedaju. Hod tamu ja vam užo padavaŭ zajaŭku, vy jaje zhubili, raźbiaryciesia z bardakom». Napisaŭ, što budu na stypiendyju zajmacca i vypivać pa litru «haračycielnaha» ŭ dzień. Tak i napisaŭ, što budu pić jak čort. Karaciej, vioŭ ź imi baraćbu, pahražaŭ, šantažavaŭ, i ŭrešcie jany mnie hetuju stypiendyju dali. Ja pajechaŭ u Vilniu, sieŭ i napisaŭ knihu za dziesiać dzion. A pra što pisać prydumaŭ napiaredadni pajezdki».
Pakul što Andrej pisać novych knih nie płanuje, chacia ciapier, atrymaŭšy ŭ padarunak dvuchtydniovy tvorčy adpačynak u Bierlinskim litaraturnym kałokviumie, usio moža pamianiacca.
Andrej Adamovič — paet, prazaik i pierakładčyk ź japonskaj movy. Naradziŭsia ŭ 1984 hodzie ŭ Minsku. Za knihu paezii «Dzień paezii śmierci dzień», jakaja vyjšła ŭ 2012 hodzie, atrymaŭ premiju «Debiut» Biełaruskaha PEN-centra. Trojčy pieramahaŭ u konkursach maładych litarataraŭ Biełaruskaha Pen-centra (2006, 2010, 2012). Jaho tvory pierakładzieny na litoŭskuju, polskuju, hruzinskuju movy. U 2015 hodzie vydaŭ knihu prozy «Taŭściła i lešč».
Ciapier čytajuć
Topavy pierakładčyk pajechaŭ u Biełaruś mianiać pašpart — i sieŭ za danaty. «KDB pahladzieŭ na sumu i vyrašyŭ, što nichto ŭ zdarovym rozumie nie moža vydatkavać stolki ŭłasnych hrošaj»3
Topavy pierakładčyk pajechaŭ u Biełaruś mianiać pašpart — i sieŭ za danaty. «KDB pahladzieŭ na sumu i vyrašyŭ, što nichto ŭ zdarovym rozumie nie moža vydatkavać stolki ŭłasnych hrošaj»
Vajb-prahramavańnie źmienić rolu raspracoŭščyka, RLVR, i kali łopnie burbałka. Biełarus-inžynier u halinie ŠI, jaki pracuje ŭ ZŠA, raskazaŭ, što nas čakaje ŭ 202633
Kamientary