Sud nad Bandarenkam: baćka vučnia pajšoŭ u KDB, bo dyrektar ź im niavietliva pahavaryŭ
U sudzie Frunzienskaha rajona Minska praciahvajecca praces pa spravie Juryja Bandarenki. 68-hadovaha byłoha dyrektara biełaruskamoŭnaj himnazii №4 Minska abvinavačvajuć u atrymańni chabaru.
Na minułym pasiadžeńni sud słuchaŭ viersiju samoha Bandarenki. Toj pryznaŭ vinu i padkreślivaŭ, što raskazvaje ŭsiu praŭdu. Pa słovach Bandarenki, jon sapraŭdy paprasiŭ $500 u baćki patencyjnaha himnazista — za toje, kab syn mužčyny dakładna trapiŭ u 5 kłas.
A 14 listapada sud vysłuchaŭ Valeryja Ciarleckaha — taho baćku, jaki i daŭ chabar tady jašče dyrektaru himnazii.
U pryncypie, viersija Ciarleckaha spačatku ničym nie adroźnivałasia ad słovaŭ eks-dyrektara: ispyty zdali ŭ himnaziju №20, ale tudy nie prajšli pa bałach. U čaćviortaj himnazii patrabavańni byli nižejšyja — vyrašyli pasprabavać trapić tudy.
Praŭda, śćviardžaje Ciarlecki, Bandarenka razmaŭlaŭ ź im vielmi rezka.
«Dyrektar spytaŭ — jak vy možacie acanić svajho syna? Ja skazaŭ, što nie razumieju, pra što hutarka.
«Tady čaho vy pryjšli siudy? Ustali i vyjšli von adsiul», — adkazaŭ mnie dyrektar, - raśpiavadaje Ciarlecki. — Ja kažu pačakajcie, toje-sioje… Tady idzicie i dumajcie, skazaŭ Bandarenka».
Pa słovach Ciarleckaha, spačatku jon chacieŭ damovicca biez hrošaj. Pamiž im i Bandarenkam nibyta adbyŭsia nastupny dyjałoh:
— A što vy možacie prapavanać? — spytaŭ dyrektar.
— Svaje pasłuhi: ramont, udzieł u hramadskim žyćci škoły…
— Takaja dapamoha nam nie patrebnaja.
«Tady ja zrazumieŭ, što treba hrošy płacić», — kaža Ciarlecki.
Razmova praciahnułasia i na nastupnaj sustrečy.
«Bandarenka spytaŭ: «Vy padumali?». Kažu, ja padumaŭ. Jon mnie daŭ arkuš papiery i ručku. Pišycie, kaža, u kolki aceńvajcie vučobu svajho syna ŭ himnazii. Ja napisaŭ 200 i namalavaŭ znak dalara. Jon skazaŭ, idzicie adsiul, niama pra što havaryć», — uzhadvaje Ciarlecki.
Ale ž pieramovy pradoŭžylisia. Dyrektar napisaŭ 500. Ciarlecki pahadziŭsia.
«Usio, heta inšaja sprava. Nie sumnievajciesia, vaš syn pieršy ŭ čarzie», — paabiacaŭ Bandarenka.
Paśla było jašče niekalki sustreč. Ale ŭžo paśla druhoj sustrečy Ciarlecki pajšoŭ u KDB. Pa jaho słovach, zarablaje jon kala 4-4,5 miljonaŭ «starymi» štomiesiac. Spłacić $500 dyrektaru było b niaprosta, pryjšłosia b pazyčać u svajakoŭ.
Ale ŭ KDB Ciarlecki pajšoŭ nie ad biednaści:
«Bandarenka žorstka sa mnoj pahavaryŭ. Nakont šmatdzietnaj siamji — heta mianie abraziła…
Kožnaje dzicia pavinna vyłazić jak tolki moža, jon mnie tak kazaŭ. A nie padabajecca, kaža — ŭstali i vyjšli z kabinieta, tut dyrektar pracuje. Sa mnoj nikoli tak nichto nie havaryŭ i ja ni z kim nikoli…»
Ciarlecki pakryŭdziŭsia na takoje staŭleńnie i vyrašyŭ zakłaści Bandarenku.
«Ci možna tak, kab tak razmaŭlali?», — aburajecca jon.
Ciarlecki źviarnuŭsia ŭ KDB.
«Paśla da mianie adtul padjechaŭ čałaviek, ja raspavioŭ, jakaja prablema. Pahavaryli na vulicy, potym pajechali ŭ kantoru. Ja napisaŭ zajavu, što dyrektar vymahaje $500».
Na nastupnyja sustrečy Ciarlecki chadziŭ užo «ŭzbrojeny» śpiectechnikaj, jakaja pisała huk i videa. Na piataj sustrečy, kali Ciarlecki pieradavaŭ hrošy, Bandarenku i zatrymali.
Paśla Ciarleckaha vysłuchali nastaŭnikaŭ himnazii, jakija byli paniatymi ŭ dzień zatrymańnia. U kožnaha ź ich advakat Juryja Bandarenki prasiŭ acharaktaryzavać eks-dyrektara. Pra svajho byłoha kiraŭnika nichto ź piedahohaŭ ničoha drennaha nie skazaŭ.
Kamientary