Bajkier Chirurh prapanavaŭ Pucinu źmianić hierb Rasii FOTA

Lidar motakłuba «Načnyja vaŭki» Alaksandr «Chirurh» Załdastanaŭ źviarnuŭsia da prezidenta RF Uładzimira Pucina z prapanovaj razhladzieć mahčymaść dapoŭnić hierb Rasii zorkaj Pieramohi i apraŭleńniem z kałasoŭ, paviedamlaje RT.

Pavialičyć

Chirurh rastłumačyŭ, što ŭžo daŭno ličyć nieabchodnym zajavić ab pierajemnaści i paznačyć patryjatyčny kurs krainy na hieraldyčnych dziaržaŭnych simvałach. Dla ŭvasableńnia prapanovy ŭ žyćcio dastatkova palityčnaj voli prezidenta, upeŭnieny Załdastanaŭ.

Zhodna z pradstaŭlenym im prajektam, dapoŭnieny dziaržaŭny hierb «ujaŭlaje ź siabie vyjavu dvuchhałovaha arła ŭ promniach sonca i ŭ apraŭleńni kałasoŭ. U vierchniaj častcy hierba — piacikancovaja zorka Pieramohi. U kalarovym malunku Dziaržaŭnaha hierba Rasijskaj Fiederacyi dvuchhałovy aroł, sonca i kałasy — załatyja; zorka — čyrvonaja, apraŭlenaja załatoj ablamoŭkaj».

Pa zadumie Załdastanava, abjadnańnie na hierbie carskich i savieckich simvałaŭ — heta simvaličnaje pieraasensavańnie «krymskaha kansiensusu».

«Hierb Rasii — heta simvał dziaržavy, sakralny znak našych minułych i budučych pieramoh. U pieršuju čarhu my pavinny zamacavać pierajemnaść našaj dziaržavy. Ciapierašni hierb — dvuchhałovy aroł — heta pierajemnaść ad Rasijskaj impieryi. Ale my pavinny taksama pakazać, što rodam z SSSR — z haharynskaha skačku ŭ kosmas, pieršaha spadarožnika, mahutnaj Savieckaj armii i, viadoma, tytaničnaj, śviatoj pieramohi ŭ Vialikaj Ajčynnaj vajnie. I simvał hetaha hieraičnaha podźvihu — zorka Pieramohi — znajšoŭ svajo adlustravańnie na našym hierbie», — rastłumačyŭ Załdastanaŭ.

Pa słovach Chirurha, «novy čas patrabuje novych simvałaŭ».

«My padyšli da pytańnia z pazicyi pieraasensavańnia našaj spadčyny. Bo kali prymaŭsia sučasny hierb, usio savieckaje padviarhałasia abstrukcyi. Paśla taho, jak Uładzimir Uładzimiravič Pucin viarnuŭ Rasii jaje žamčužynu — Krym, — da rasijan viarnułasia i pačućcio honaru. My ŭspomnili: tak, my vialiki narod, mienavita my atrymali pieramohu ŭ strašnaj sutyčcy z abjadnanaj hitleraŭskaj armijaj Jeŭropy. Chaj ciapier libierały, najmity CRU, pradstaŭniki nacyjanał-aranžyzmu vyjuć, što heta ŭsio viartańnie da Savieckaha Sajuza. Nazyvajcie jak chočacie. My viartajem Radzimu», — padkreśliŭ Załdastanaŭ.

Tym časam u Kramli zajavili, što ni pra jaki list bajkiera nie viedajuć, paviedamlaje VVS.

«Mnie nieviadoma pakul ni pra jaki list, nakolki mnie viadoma, jon nikudy aficyjna nie ŭvachodziŭ u administracyju», — skazaŭ pres-sakratar rasijskaha prezidenta Dźmitryj Piaskoŭ žurnalistam.

Jon taksama zaŭvažyŭ, što źmiena dziaržaŭnaj simvoliki źjaŭlajecca «nadzvyčaj abjemnaj temaj i, viadoma, jana padlahaje vielmi vyraznaj arhumientacyi».

• 0
• 0
• 0
• 0
• 0
• 0
• 0
• 0