Polski sajt: Finansavańnie Biełsata abrežuć na 2/3, pieraviaduć na rasiejskuju movu

Nieaficyjnyja krynicy paviedamlajuć, što polski ŭrad pryniaŭ rašeńnie pra źmianšeńnie datacyj na dziejnaść telebačańnia «Biełsat» na 2017 hod na dźvie traciny proci sumy, vydzielenaj u 2016-m. Pra heta piša polski sajt wpolityce.pl.

Zamiest 17 miljonaŭ złotych (4,2 młn dalaraŭ) «Biełsat» atrymaje tolki 5 miljonaŭ ($1,2 młn), «takoje rašeńnie rychtujecca ŭ Ministerstvie zamiežnych spraŭ», — paćvierdziła sajtu kiraŭnica kanała Ahnieška Ramašeŭskaja.

«Ja daviedałasia taksama, što my pavinny viaščać pa-rasiejsku, — kaža Ramašeŭskaja. — Heta jašče adzin absurd! Biełaruskaja mova stała našym znakam adroźnieńnia. Bieź biełaruskaj movy my budziem mieć Rasieju ŭ Breście. Praz hod ci praź piać hadoŭ, ale tak ci inakš heta budzie niavyhadna. Ja nie mahu ŭciamić, jak niechta moža hetaha nie razumieć… Biełarusy lubiać svaju movu. Naš kaleha — dyrektar Instytuta Polskaha ŭ Minsku, i jon moža paćvierdzić, što za ŭžyvańnie biełaruskaj movy jaho tam na rukach nosiać — navat rasiejskamoŭnyja biełarusy. Takaja realnaść. Mienavita tamu rašeńnie MZS dla mianie niezrazumiełaje. Ja sprabuju pierakanać siabie, što heta nieparazumieńnie. Ja ličyła siabie prychilnicaj «dobrych pieramien» i navat nie dapuskała, što takoje moža sa mnoju zdarycca», — kaža Ramašeŭskaja, prychilnica kiraŭničaj kansiervatyŭnaj partyi «Zakon i spraviadlivaść».

Baćka Ramašeŭskaj, nahadajem, byŭ sienataram ad «Zakonu i spraviadlivaści».

U sacyjalnych sietkach supracoŭniki kanała vykazvajuć mierkavańnie, što, mahčyma, skaračeńnie biudžetu ŭsio ž składzie tolki 30%, a biełaruskamoŭny farmat jašče moža być zachavany.

«Biełsat» byŭ stvorany ŭ 2008 hodzie i pastupova pavialičvaŭ absiah viaščańnia. Asabliva papularnym byŭ jaho viečarovy navinny błok. U apošnija hady «Biełsat» staŭ zaŭvažny taksama ŭ internecie.

Techničnyja supracoŭniki na kanale pieravažna palaki, ale tvary i hałasy kanała — biełarusy. Siarod ich Śviatłana Kalinkina, Pavieł Mažejka, Valaryna Kustava.

Biełaruskija ŭłady nie spyniali dziejnaści žurnalistaŭ telekanała, ale i nie davali im akredytacyi dy čas ad času štrafavali navinnych reparcioraŭ «Biełsata».

• 0
• 0
• 0
• 0
• 0
• 0
• 0
• 0