«Sumlennych ludziej» abvinavacili ŭ nakrutcy svajho videa da miljona prahladaŭ. Što tłumačyć Alena Žyvahłod?
Prapahandysckija (i nie tolki) kanały źviarnuli ŭvahu na rolik arhanizacyi «Sumlennyja ludzi» z zaklikam hałasavać suprać usich na vybarach 26 studzienia. Maŭlaŭ, zakupili botaŭ na miljon prahladaŭ, a voś na łajki i kamientary hrošaj nie chapiła. Na hety momant videa «Prahnoz na 2025 dla Biełarusi: my vartyja lepšaha» prahladzieła amal 988 tysiač čałaviek, pry hetym tam niama navat sotni łajkaŭ. A z tych niešmatlikich kamientaroŭ, što jość, značnaja častka — kamplimientarnaha charaktaru ŭ bok Alaksandra Łukašenki. Spytali ŭ lidarki «Sumlennych ludziej» Aleny Žyvahłod, z čym moža być źviazanaja takaja niezvyčajnaja statystyka.
«Na rekłamu hetaha videa my vydatkavali $1600»
U kamientary «Našaj Nivie» Alena Žyvahłod adrazu abaznačyła, što pra nakrutku havorki nie idzie — kali b jany zakuplali prahlady, to łahična było b zakuplać zaadno łajki i kamientary. Ale jany nikoli hetym nie zajmalisia, bo ličać «biessensoŭnym i nieetyčnym».
«Kali kazać pra nakrutku, niekatoryja prymianiajuć takuju praktyku. Naprykład, prychilniki režymu realna prybiahajuć da roznych sposabaŭ imitacyi narodnaj padtrymki, kali jaje nasamreč niama. Za nie vielmi vialikija hrošy možna kupić i prahlady, i łajki, i kamientary. Ale kali kazać kankretna pra heta videa, to jano rekłamavałasia praź instrumient Google Ads.
My bačyli, jak reahujuć na naš rolik u prapahandysckich kanałach, tut usio jasna. Im vyhadna kazać, što na samoj spravie našy prahlady kuplenyja — majecca na ŭvazie, što nakručanyja. Ale ja ździviłasia, što padobnyja kamientary jość i ŭ prychilnikaŭ pieramien. Dla mianie žach, što jany nie da kanca razumiejuć, jak pracuje rekłama».
U siarednim pry stvareńni rolikaŭ kala 10% biudžetu «Sumlennyja ludzi» vyłučajuć na rekłamu. Ale na maštabnaj respublikanskaj vybarčaj kampanii hetyja ličby vyšejšyja.
«Kankretna na rekłamu hetaha videa my vydatkavali $1600.
Što ŭ nas atrymałasia? Rekłamny achop rolika skłaŭ prykładna 1,67 miljona pakazaŭ — to-bok naša videa było pakazana ŭ stužcy ludziej stolki razoŭ. Pryčym usie hetyja pakazy — tolki ź Biełarusi: my tarhietujemsia vyklučna na ludziej unutry krainy (u nas 92% aŭdytoryi — ź Biełarusi). Jany bačyli paznaku «rekłama» i sami vyrašali, hladzieć kantent ci nie.
Atrymałasia, što videa prahledzieli amal 988 tysiač čałaviek (niechta hladzieŭ 30 siekund, niechta — dźvie chviliny). Dadam jašče toje, što ja baču sama ŭ kabiniecie: dahladaŭ u nas 292 tysiačy. To-bok stolki biełarusaŭ dahladzieli hety rolik da kanca. I ja mahu skazać, što heta dobry vynik dla takoha kantentu. Tak pracuje huhł-rekłama, tak jutub dazvalaje za našy hrošy pasprabavać dastavić kantent biełarusam».
«My idziom na hetyja vydatki, kab vychodzić za miežy koła jadziernych prychilnikaŭ pieramien»
Alena źviartaje ŭvahu, što siońnia rekłama — adzin z dastupnych sposabaŭ zmahacca za ŭvahu ludziej unutry Biełarusi.
«Sumlennyja ludzi» zmahajucca za ŭvahu biełarusaŭ i biełarusak u katastrafična niavyhadnych umovach. My kankurujem ź dziaržprapahandaj. I kali my chočam vyjści ź infarmacyjnaj burbałki arhaničnych prahladaŭ ad tych, chto moža sabie dazvolić padpisku na «ekstremistaŭ», tady my i źviartajemsia da rekłamy. Ci pakažuć naš kantent u Biełarusi, šmat u čym vyznačajuć ałharytmy płatform, jakija ŭličvajuć uzajemadziejańnie z kantentam — łajki, kamientary, reposty, pierasyłki.
Za padpisku, kamientar ci łajk pad kantentam dziaržaŭnych ŚMI nie aryštoŭvajuć, nie dajuć štrafy i nie zvalniajuć z pracy, tamu nam prychodzicca prykładać bolš namahańniaŭ. Tak, rekłama kaštuje hrošaj, i my idziom na hetyja vydatki, kab vychodzić za miežy koła jadziernych prychilnikaŭ pieramien, kab źviartacca da tych, kaho nazyvajuć niejtrałami».
«My kankurujem z prapahandaj navat nie za vynik, a za mahčymaść pakazać naš kantent»
Paraŭnoŭvajučy statystyku hetaha videa ź inšymi na kanale, Alena adznačaje, što heta siaredni pakazčyk adnosna atrymanych poŭnych dahladaŭ dla kantentu ź vialikim biudžetam na rekłamu. Niedzie praporcyja moža być lepšaj, ale na toje jość svaje tłumačeńni.
«Kaniečnie, my nie možam napramuju spytać u biełarusaŭ u krainie, čamu jany nie pahladzieli naš rolik. Ale my možam zdahadvacca pra peŭnyja pryčyny. Pa-pieršaje, praporcyja łajkaŭ, kamientaroŭ i prahladaŭ zaležyć ad taho, rekłamujecca kantent ci nie, i ŭ jakim abjomie.
Kamientaŭ i łajkaŭ pad videa budzie mienš, kali abjom rekłamnaha trafiku vyšejšy. A tut my vydatkavali na rekłamu $1600 — heta vialiki dla nas biudžet. Ale heta šyrokamaštabny tarhiet, respublikanskaja kampanija».
Taksama Alena dapuskaje, što na intensiŭnaść kamientavańnia mohuć upłyvać hieroi ŭ kadry.
«Dla čałavieka, jaki pryjšoŭ z rekłamy i bačyć umoŭnych Paŭła Łatušku ci Śviatłanu Cichanoŭskuju, bolš vidavočnym robicca toje, što jon maje spravu z ekstremisckim farmavańniem — pa viersii režymu Łukašenki. I jon nie budzie ŭzajemadziejničać z takim kantentam.
My i sami prosim pra heta: nie treba pisać kamientary i stavić łajki, kali vy znachodziciesia ŭ Biełarusi i dla vas heta niebiaśpiečna: «Sumlennyja ludzi» pryznanyja ekstremisckim farmavańniem».
Akramia taho, surazmoŭca adznačaje, što tema vybaraŭ — mienš zachaplalnaja dla hledača ŭ pryncypie.
«Kali my stvarajem kantent pra toje, jak pracuje miedycyna, ci pra turemnuju sistemu, dzie my raskryvajem złačynstvy režymu, to kamientavać tam jość bolš čaho».
«Ja žadaju ŭsim aktaram demakratyčnych siłaŭ navučycca karystacca technałohijami i nie stajać na miescy. Bo z čaho my vybirajem: nie dastavić infarmacyju nijak, niachaj tolki Łukašenka kaža pa temie vybaraŭ, ci ŭsio ž pasprabavać?
My kankurujem z prapahandaj navat nie za vynik, a za mahčymaść pakazać naš kantent. Na žal, my nie trapim na telebačańnie, na biłbordy, tamu nam zastajecca dzidžytał», — padsumoŭvaje lidarka «Sumlennych ludziej».
«Ciabie b baćka praklaŭ»: Maci fihuranta «małočnaj spravy» prabiłasia na spatkańnie ź im, kab ślozna paprasić nie supracoŭničać sa śledstvam3
Kamientary