Biełaruś uvodzić biaźvizavy režym dla hramadzian 80 krain

Alaksandr Łukašenka 9 studzienia padpisaŭ ukaz № 8 «Ab ustanaŭleńni biaźvizavaha paradku ŭjezdu i vyjezdu zamiežnych hramadzian». Dakumientam ustanaŭlivajecca biaźvizavy paradak ujezdu ŭ Biełaruś na termin nie bolš za 5 sutak pry ŭjeździe praz punkt propusku «Nacyjanalny aeraport Minsk» dla hramadzian 80 dziaržaŭ, paviedamlaje pres-słužba kiraŭnika Biełarusi.

Ukaz raspaŭsiudžvajecca na 39 krain Jeŭropy, uklučajučy ŭvieś Jeŭrasajuz, a taksama Braziliju, Indanieziju, ZŠA, Japoniju i inšyja dziaržavy.

U pieršuju čarhu, heta spryjalnyja ŭ mihracyjnym płanie krainy, stratehičnyja partniory Biełarusi i dziaržavy, jakija ŭ adnabakovym paradku ŭstalavali biaźvizavy režym u dačynieńni da biełaruskich hramadzian. Novyja praviły achoplivajuć taksama takuju katehoryju, jak niehramadzianie Łatvii i asoby biez hramadzianstva Estonii.

Dakumient nakiravany na aktyvizacyju padarožžaŭ biznesmienaŭ, turystaŭ, pryvatnych asob, jakija majuć ahulnahramadzianskija pašparty, i nie budzie raspaŭsiudžvacca na zamiežnikaŭ, jakija ažyćciaŭlajuć słužbovyja pajezdki: dypłamatyčnyja, słužbovyja, śpiecyjalnyja i inšyja pryraŭnavanyja da ich pašparty pad uvahu prymacca nie buduć.

Dla ŭjezdu ŭ biaźvizavym režymie nieabchodna mieć pry sabie sapraŭdny pašpart ci inšy dakumient dla vyjezdu za miažu, jaki zamianiaje jaho, hrašovyja srodki (na kožny dzień znachodžańnia sumu ŭ valucie abo ŭ biełaruskich rublach, ekvivalentnuju nie mienš čym dźvium bazavym vieličyniam), miedycynski strachavy polis na sumu nie mienš za 10 tysiač jeŭra, jaki dziejničaje ŭ Biełarusi.

Dla hramadzian Vjetnama, Haici, Hambii, Handurasa, Indyi, Kitaja, Livana, Namibii, Samoa abaviazkovym dadatkovym patrabavańniem źjaŭlajecca najaŭnaść u dakumiencie dla vyjezdu za miažu sapraŭdnaj šmatrazovaj vizy dziaržaŭ ES abo Šenhienskaj zony z adznakaj ab ŭjeździe na ich terytoryju, a taksama avijabiletaŭ z paćviardžeńniem u ich vyletu z Nacyjanalnaha aeraporta Minsk u praciahu 5 dzion z daty ŭjezdu.

Paradak biaźvizavaha pieramiaščeńnia nie raspaŭsiudžvajecca na asob, jakija prybyvajuć u Biełaruś avijarejsami z Rasii, a taksama jakija majuć namier ažyćciavić vylet u aeraporty Rasii (dadzienyja rejsy źjaŭlajucca ŭnutranymi, pamiežny kantrol na ich nie ažyćciaŭlajecca).

Ukaz ustupić u siłu praź miesiac paśla aficyjnaha apublikavańnia.

• 0
• 0
• 0
• 0
• 0
• 0
• 0
• 0