Łukašenka: Śviatkavańnie staroha Novaha hoda — adna ź nievialikich tradycyj suvierennaj Biełarusi
«Na bajavym pastu i na dziažurstvie, u balničnaj pałacie i ŭ televizijnaj studyi, na scenie i spartyŭnaj arenie — kožny pavinien adčuvać adkaznaść za los krainy. U hetym i jość naša siła i naša budučynia», — zajaviŭ Alaksandr Łukašenka 13 studzienia na aficyjnym pryjomie ad svajho imia na stary Novy hod.
Śviatkavańnie staroha Novaha hoda — adna ź nievialikich tradycyj suvierennaj Biełarusi, i hetaja tema — suvierenitetu i niezaležnaści — rehularna zakranajecca apošni čas u ŚMI, skazaŭ Łukašenka, słovy jakoha pryvodzić pres-słužba kiraŭnika dziaržavy. «Heta nie tamu, što nam niechta pahražaje», — zajaviŭ jon. Ludzi, pa jaho słovach, nie pavinny zabyvać, što mahčymaść stvaryć svaju pieršuju niezaležnuju suvierennuju dziaržava los padaryŭ biełaruskamu narodu praz doŭhija hady. «My z vami zrabili jaje», — ličyć aficyjny lidar.
Jon adznačyŭ, što 2016 hod nie byŭ prostym, nie ŭsio ŭdałosia ažyćciavić. «My bačym metu i toje, što treba dla jaje dasiahnieńnia. Jakim budzie zaŭtra našaj krainy, zaležyć tolki ad taho, ź jakoj addačaj my budziem pracavać siońnia», — zajaviŭ Łukašenka.
Biełaruski kiraŭnik uručyŭ dziaržaŭnyja ŭznaharody za «šmathadovuju plonnuju pracu, značny asabisty ŭkład u raźvićcio sistemy achovy zdaroŭja, vysoki prafiesijanalizm pry aśviatleńni najvažniejšych padziej sacyjalna-ekanamičnaj i hramadska-palityčnaj žyćci krainy, dasiahnieńnie vysokich tvorčych i spartyŭnych vynikaŭ».
Miedal «Za pracoŭnyja zasłuhi» atrymała načalnik hałoŭnaha ŭpraŭleńnia arhanizacyi miedycynskaj dapamohi Ministerstva achovy zdaroŭja Alena Bohdan. Miedalom Francyska Skaryny adznačany dyrektar dyrekcyi śpiecyjalnych prajektaŭ ZAT «Druhi nacyjanalny telekanał» Anžeła Mikulskaja, dyrektar dyrekcyi infarmacyjnaha viaščańnia ZAT «Staličnaje telebačańnie» Ihar Paźniak, artyst baleta Nacyjanalnaha akademičnaha Vialikaha teatra opiery i baleta Nadzieja Filipava.
Členu zbornaj pa lohkaj atletycy Volhi Mazuronak nadadzienaje hanarovaje zvańnie «Zasłužany majstar sportu Respubliki Biełaruś».
Padziaki abjaŭlenyja rabotnikam Nacyjanalnaj dziaržaŭnaj teleradyjokampanii: namieśniku staršyni Maratu Markavu, namieśnikam hałoŭnaha dyrektara hałoŭnaj dyrekcyi «Ahienctva televizijnych navin» Dźmitryju Bačkovu i Siarhieju Husačenku, palityčnamu ahladalniku Juryju Prakopavu, namieśniku hałoŭnaha dyrektara hałoŭnaj dyrekcyi telekanała «Biełaruś 1» Volzie Šlahier.
Kamientary