Alaksandr Łukašenka 15 studzienia nakiravaŭsia z aficyjnym vizitam u Arabskuju Respubliku Jehipiet. Pra heta BiełTA paviedamili ŭ pres-słužbie biełaruskaha lidara.
U Kairy kiraŭnik biełaruskaj dziaržavy praviadzie pierahavory z Prezidentam Jehipta Abdel Fatacham al-Sisi, jakija projduć u vuzkim i pašyranym składach. Baki razhledziać aktualny stan dvuchbakovych adnosin i pierśpiektyvy ich vyvadu na bolš vysoki ŭzrovień. U centry ŭvahi buduć temy raźvićcia ŭzajemavyhadnych handlova-ekanamičnych suviaziej, vytvorčaj kaapieracyi. Na paradku dnia taksama pašyreńnie biełaruska-jehipieckich kantaktaŭ u humanitarnaj śfiery, uklučajučy navuku, adukacyju, achovu zdaroŭja, turyzm.
Pa vynikach pierahavoraŭ płanujecca padpisańnie dvuchbakovych dakumientaŭ.
Zapłanavany sustrečy Alaksandra Łukašenki z premjer-ministram Jehipta Šeryfam Ismaiłam i inšymi aficyjnymi asobami hetaj krainy. Akramia taho, Łukašenka voźmie ŭdzieł u adkryćci biełaruska-jehipieckaha dziełavoha forumu.
Zatym kiraŭnik dziaržavy zrobić aficyjny vizit u Respubliku Sudan.
U Chartumie Alaksandr Łukašenka praviadzie pierahavory z Prezidentam Sudana Amaram Chasanam Achmiedam al-Bašyram. Čakajecca zaklučeńnie šeraha damoŭlenaściej ab raźvićci ŭzajemadziejańnia ŭ roznych śfierach.
Płanujucca taksama sustrečy kiraŭnika biełaruskaj dziaržavy ź vice-prezidentam Sudana Chasabu Abdelrachmanam i staršynioj Nacyjanalnaj asamblei Ibrahimam Amieram.
U stalicy Sudana ŭ čas vizitu Alaksandra Łukašenki projdzie biełaruska-sudanski dziełavy forum.
Aficyjnyja vizity ŭ Jehipiet i Sudan zapłanavanyja na 15—17 studzienia.
Kamientary