U staličnym paviljonie BiełEkspa startavała Mižnarodnaja knižnaja vystava-kirmaš. Što na joj prapanujuć biełaruskija niezaležnyja vydaviectvy, daŭnija partniory NN?
Knihi j časopisy vydaviectva Arche možna znajści pad šyldaju TAA «Hajsak»
U ekspazycyi źjaŭlena bolš za 100 publikacyjaŭ. Niekatoryja ź ich možna budzie pabačyć i kupić tolki na vystavie. Na kirmašy možna pieršymi nabyć numary časopisa, što tolki-tolki vyjšli z druku:
ARCHE № 5 (150) — 2016. Ad Jatviazi da Litvy
Na prośby čytačoŭ admysłova da kirmašu vyjšli dadatkovyja nakłady papularnych numaroŭ, papiarovyja nakłady katorych davoli chutka razyšlisia ŭ svoj čas:
ARCHE № 12 (99) — 2010. Paŭstańnie 1863—1864 hh. i losy Biełarusi
ARCHE № 3 (114) — 2012. Historyja biełaruskaj štodzionnaści
Vydaviectva «Januškievič» da hetaj kirmaša vydała šerah navinak
U tym liku ŭ papiarovym vyhladzie vyjšła kniha Uładzimira Sadoŭskaha «1813», jakaja ŭžo try miesiacy zastajecca ŭ lidarach pa vynikach prodažaŭ je-knih na kniharnia.by.
Fłaryjan Čarnyševič «Nadbiarezincy»
Najbolš viadomy tvor Fłaryjana Čarnyševiča — polskaha piśmieńnika, jaki pachodziŭ ź Biełarusi. Hetaja avanturna-mieładramatyčnaja epapieja apaviadaje pra dramatyčny los žycharoŭ šlachieckich zaścienkaŭ na ziemlach pamiž Biarezinaj i Dniaprom u 1911—1920 hadach. Raman Čarnyševiča atrymaŭ vysokija, uźniosłyja vodhuki ad polskich intelektuałaŭ na emihracyi. Nobieleŭski łaŭreat Česłaŭ Miłaš staviŭ «Nadbiarezincaŭ» u adzin šerah z «Panam Tadevušam» Adama Mickieviča i «Patopam» Hienryka Siankieviča, a Michał Kryśpin Paŭlikoŭski nazyvaŭ tvor Čarnyševiča «epasam zaściankovaj šlachty», naŭprost paraŭnoŭvajučy jaho pa sile hučańnia z «Cichim Donam» Michaiła Šołachava.
Knut Hamsun «Hoład»
U knihu narviežskaha piśmieńnika-nabielista Knuta Hamsuna (1859—1952) uvajšli try suśvietna viadomyja ramany. «Hoład» — historyja maładoha vałacuhi, čyja śviadomaść spaznaje strašennuju mietamarfozu ad hałodnaha isnavańnia. Hety navatarski tvor prynios aŭtaru jeŭrapiejskuju viadomaść. «Pan» — liryčny apovied pra vielič pryrody i trahiedyju nieŭzajemnaha kachańnia, u jakim spałučylisia skandynaŭskija sientymientalnaść i nianaviść, dzivactvy i pakuty, a fonam źjaŭlajecca surovaja pryhažość paŭnočnaha ŭźbiarežža. «Viktoryja» — praniklivy raman pra čullivaje i piaščotnaje kachańnie, jakoje supravadžajuć honar i hodnaść, chvaroba i śmierć…
«Jak sučasny psichołah, ja pavinien raskryć i daśledavać dušu. Ja pavinien daśledavać jaje ŭzdoŭž i ŭpopierak, z kožnaha punktu hledžańnia, trapić u samyja patajemnyja hłybini», — charaktaryzavaŭ Hamsun svaju tvorčaść.
Ludmiła Rubleŭskaja «Dahieratyp»
Historyka-pryhodnicki raman Ludmiły Rubleŭskaj «Dahieratyp» maje niezvyčajnuju strukturu: dziejańnie Knihi źniešniaha koła pieraciakaje ŭ Knihu ŭnutranaha koła, z sučasnaści ŭ minułaje ź niepaŭtornaj atmaśfieraj dekadansu. Dva zrezy ŭ časie nieparyŭna źviazanyja miž saboju.
Pierad čytačom paŭstajuć zahadkavyja padziei kanca XIX stahodździa. Uładalniki navamodnaha fotaatelje ŭ pravincyjnym biełaruskim miastečku, pryhažunia Bahusłava i jaje baćka Varaksa Nichiel, vypraŭlajucca fatahrafavać etnahrafičnuju kalekcyju ŭ złaviesny majontak Žuchavičy, haspadara jakoha ličać vaŭkałakam. Dalejšyja padziei prymajuć samy niečakany kirunak.
Uładzimir Sadoŭski «1813»
Pieršy zombi-chorar pa-biełarusku!
Dziejańnie navieły adbyvajecca ŭ 1813 hodzie ŭ apošnija dni zimy. U razburanaje vialikaj vajnoj miastečka na ŭskrajku Minskaj hubierni naviedvajecca hość sa stalicy. Michał Kleafas Ahinski — dypłamat, kampazitar, a ciapier sienatar Rasijskaj Impieryi — pryjazdžaje pahaściavać da svajho dziadźki ŭ familny zamak la Maładziečna. Z nadychodam adlihi ŭ navakollach miastečka pačynajuć adbyvacca niezrazumiełyja rečy: zabityja žaŭniery paŭstajuć z pola minułaj bitvy i napadajuć na žycharoŭ pasielišča. Chutka zamak Ahinskich apynajecca ŭ abłozie chadziačych mierćviakoŭ. Michału Kleafasu nie zastajecca ničoha inšaha, jak znoŭ uziać u ruki zbroju i zmahacca za svabodu rodnaha kraju…
Kniha try miesiacy trymajecca ŭ lidarach pa vynikach prodažaŭ je-knih na kniharnia.by.
Kaciaryna Miadźviedzieva «Razłamaški Majstra Lufta»
Niezvyčajnaja i vielmi cikavaja kniha kazačnych apovieściaŭ i apaviadańniaŭ bieraściejskaj piśmieńnicy. Heta dzivosnaje spałučeńnie anhielskaj stylistyki i słavianskaha falkłoru. Vydatna padychodzić dla čytańnia ŭ lubym uzroście — heta tak zvanyja «kazki dla darosłych», vielmi papularny trend u sučasnaj jeŭrapiejskaj litaratury. Knihu K. Miadźviedzievaj užo zasłužana acanili čytačy i krytyki — jašče ŭ farmacie je-knihi jana stała finalistam prestyžnaj premii «Debiut» imia Maksima Bahdanoviča ŭ 2016 hodzie ŭ naminacyi «Proza».
Ludmiła Ščerba «[email protected]. Adzin dzień nie majho žyćcia»
Padziei ramana Ludmiły Ščerba adbyvajucca ŭ 1642—1654 hh. i ŭ 2012—2014 hh. U horadzie M. sustrakajucca hieroi našaha času — Maks i Hanna, i ŭsie ich pryhody pačynajucca z… jabłyka. Aŭtar prapanoŭvaje niekalki varyjantaŭ raźvićcia situacyi: u našym časie, u vajnu 1654—1667 hh. i ŭ biblejnyja časy, — adnak raman całkam interaktyŭny, i vy možacie stvaryć svoj. Hieroi vyjaŭlajuć, što ŭ ich siemjach zachoŭvajucca staronki Barkałabaŭskaha letapisu, a jakija zahadki toić hety histaryčny dakumient? Ci buduć Maks i Hanna razam u jakim-niebudź ź ich žyćciaŭ?
Dla amataraŭ esteckich apoviedaŭ, prychilnikaŭ postmadernizmu, achvotnikaŭ da luboŭnych histaryčnych i niehistaryčnych ramanaŭ, zaŭziataraŭ fiłasofskaj prozy.
***
Na stendzie vydaviectva «Januškievič» adbuducca aŭtohraf-siesii Uładzimira Sadoŭskaha (10 lutaha, piatnica, a 16.00 i 11 lutaha, subota, a 13.00), Ludmiły Rubleŭskaj (11 lutaha a 11.00), Ludmiły Ščerba (12 lutaha, niadziela, a 12.00).
Vydaviectva «Halijafy» 11 lutaha ładzić prezientacyju biełaruskaha pierakłada «Alisy» Ljuisa Kerała
11 lutaha ŭ 13:30 na Minskaj mižnarodnaj knižnaj vystavie projdzie prezientacyja vydańnia kazki Ljuisa Kerała «Skroź lusterka, i što ŭbačyła tam Alisa» ŭ pierakładzie na biełaruskuju movu. Padzieja adbudziecca na Centralnaj placoŭcy Nacyjanalnaha vystavačnaha centra «BiełEkspa» (pr. Pieramožcaŭ, 14) pry padtrymcy Ambasady Vialikabrytanii ŭ Minsku.
Vialikabrytanija — pačesny hość sioletniaj vystavy.
Suśvietna viadomaja kazka Ljuisa Kerała «Skroź lusterka, i što ŭbačyła tam Alisa» — adzin z samych zahadkavych tvoraŭ kłasičnaj litaratury Vialikabrytanii, jaki ŭžo druhoje stahodździe vabić jak dziaciej, jakim jon niepasredna pryznačaŭsia, tak i darosłych.
U novym vydańni źmieščany pierakład kazki, vykanany Vieraj Burłak (u svoj čas jon byŭ adznačany premijaj časopisa «PrajdziŚviet»).
Bolš za 100 aryhinalnych ilustracyj Kaciaryny Dubovik supravadžajuć u padarožžy ŭ Zalusterkavy śviet i dazvalajuć adčuć siabie ŭdzielnikam fantastyčnaj hulni — šachmatnaj partyi, razyhranaj Ljuisam Kerałam. Sučasnaja mastačka Kaciaryna Dubovik — uładalnica premii imia Ciotki za najlepšaje afarmleńnie dziciačaj knihi (N. Jaśminska, «Siem ružaŭ», 2015).
Mižnarožny knižny kirmaš pracuje da 12 lutaha na pr. Pieramožcaŭ, 14.
Čas pracy:
9-11 lutaha: ad 10:00 da 19:00
12 lutaha: ad 10:00 da 15:00
Dajezd z boku pr. Pieramožcaŭ na aŭtobusach 1, 29, 44, 69, 91, 119 S, 136, tralejbusach 77, 39 (prypynak «Płošča Dziaržaŭnaha Ściaha»). Z boku vuł. Arłoŭskaj — aŭtobus 133, tralejbusy 33,38,54, 55 (prypynak «Vystavačny paviljon»).
Ciapier čytajuć
Łukašenka niervova prakamientavaŭ vizit Cichanoŭskaj u Kijeŭ26
Kamientary