Hramadzianin Biełarusi adsiadzieŭ u Rasii 12 hadoŭ za zabojstva. A kali stali jaho departavać, akazałasia, što jon nie hramadzianin Biełarusi

U Rasii bolš za hod trymali za kratami ŭ centry departacyi mužčynu, jaki razryvaŭsia miž tryma krainami. Rasijskija ŭłady ličać hetaha Mulavičusa hramadzianinam Biełarusi, sam jon nastojvaje, što źjaŭlajecca hramadzianinam Litvy, ale vysłać jaho nie mohuć — u tym liku z-za konsulskaha zboru ŭ 25 jeŭra, jaki niama jak apłacić.

Adsiadzieŭ 12 hadoŭ — i trapiŭ u novaje źniavoleńnie

Recydyvista Mulavičusa ŭ 2012 hodzie asudziŭ rasijski sud za zabojstva na 12 hadoŭ kałonii strohaha režymu. Termin jon adbyŭ całkam i vyjšaŭ na volu ŭ listapadzie 2024 hoda.

Kali zamiežnik vychodzić na svabodu, jaho zvyčajna departujuć na radzimu — bo navošta kryminalnik Rasii?

U vyniku ŭ toj samy dzień, kali Mulavičus vyjšaŭ z kałonii, jaho źmiaścili ŭ śpiecustanovu dla zamiežnikaŭ pad Ćvierju. Z taho času sud padaŭžaje termin utrymańnia znoŭ i znoŭ.

Biełaruś nie paćviardžaje, Litva patrabuje apaznańnie

Hałoŭnaja prablema — u mužčyny niama nijakaha dakumienta, jaki śviedčyŭ by asobu, i niezrazumieła, čyim hramadzianinam jon źjaŭlajecca.

Biełaruskija ŭłady paviedamili rasijskim, što nie majuć danych pra prynaležnaść hetaha čałavieka da hramadzianstva Biełarusi — dla vyśviatleńnia treba pravodzić asobnuju praceduru. Litoŭskaje pasolstva adkazała, što ŭ bazach nasielnictva Litvy jość zapis pra asobu z supadajučymi danymi, ale biez fotazdymka paćvierdzić, što heta toj samy čałaviek, niemahčyma — patrebna pracedura apaznańnia.

Sam mužčyna tłumačyć, što jon žyŭ u Biełarusi z 1981 hoda da 1993 hoda. Paśla pierabraŭsia ŭ Litvu, dzie ŭ 1994‑m atrymaŭ pašpart. Zhubiŭ jaho, a paśla pierajechaŭ u Rasiju, dzie i žyŭ. I pieryjadyčna siadzieŭ.

Rasijski sud, adnak, paličyŭ, što dokazaŭ litoŭskaha hramadzianstva niama, i ŭ vyniku aficyjna paznačyŭ jaho hramadzianinam Biełarusi.

Zbor u 25 jeŭra i bankaŭskaja izalacyja

Kali litoŭski bok usio ž vykazaŭ hatoŭnaść aformić paśviedčańnie na viartańnie, vyśvietliłasia, što za jaho treba zapłacić konsulski zbor — 25 jeŭra. Ułasnych hrošaj u mužčyny niama. Rasijskija ŭłady źviarnulisia ŭ pasolstva z prośbaj vydać dakumient biez apłaty zboru z-za ciažkaha finansavaha stanovišča čałavieka, ale atrymali admovu: padstaŭ dla vyzvaleńnia ad zboru niama.

Dadatkovaja zahvozdka — u tym, što, pavodle adkazu pasolstva, zbor treba apłacić z karty zamiežnaha banka, bo rekvizity nieprydatnyja dla rasijskich bankaŭ. Va ŭmovach adklučeńnia Rasii ad zachodniaj bankaŭskaj sistemy heta robić apłatu 25 jeŭra asobnaj nievyrašalnaj zadačaj. Mienavita tamu, jak vynikaje z materyjałaŭ, z maja 2025 hoda rasijski bok naohuł pierastaŭ rabić kroki pa spravie — prosta niama jak apłacić zbor.

Tupik: navat z dakumientam vyvieźci niama jak

Ale navat kali paśviedčańnie aformiać, uźnikaje nastupnaja prablema: dakumient dziejničaje ŭsiaho 15 dzion, i za hety termin arhanizavać pierajezd praktyčna niemahčyma. Pramych rejsaŭ z Rasii ŭ Litvu niama praz vajnu, jakuju Rasija viadzie va Ukrainie, tamu ŭłady razhladajuć varyjant departacyi praz Kalininhrad.

Sam mužčyna suprać padaŭžeńnia ŭtrymańnia asabliva nie piarečyŭ — skazaŭ, što hatovy jašče krychu pačakać, kali buduć realnyja dziejańni, kab jaho narešcie vyvieźli ŭ Litvu, i navat hatovy sam pajechać u pasolstva, kab chutčej aformić papiery. Blizkich svajakoŭ u Rasii ŭ jaho niama, rehistracyi taksama; byłaja žonka i darosłyja dzieci žyvuć u Biełarusi, ale adnosiny jon ź imi nie padtrymlivaje.

Apošni raz historyja Mulavičusa zhadvajecca ŭ rasijskich sudovych dakumientach u 2025 hodzie. Nieviadoma, ci zmahli jaho ŭsio ž adpravić u Litvu.

• 0
• 0
• 6
• 7
• 2
• 0
• 0
• 0