Hłybockich žurnalistaŭ aštrafavali za videasiužet pra dom biez kapitalnaha ramontu
Tacianu Smotkinu i Źmitra Łupača sud pryznaŭ vinavatymi ŭ niezakonnym vyrabie i raspaŭsiudzie pradukcyi ŚMI.
Niezaležnych žurnalistaŭ sudzili za siužet, pakazany na spadarožnikavym telekanale «Biełsat», dzie apaviadałasia pra dom № 142 pa vulicy Lenina ŭ Hłybokim.
Sudździa Ludmiła Vaščanka pastanaviła pakarać Tacianu Smotkinu štrafam pamieram 25 bazavych (575 rubloŭ), a Źmitra Łupača — na 30 bazavych (690 rubloŭ).
Spravu suprać žurnalistaŭ inicyjavaŭ miascovy adździeł KDB. Mienavita adtul dali rasparadžeńnie razabracca, jakim čynam infarmacyja pra piacipaviarchovik, u jakim 40 hadoŭ nie było kapramontu, trapiła na telekanał «Biełsat».
Na Źmitra Łupača ŭ milicyi skłali ažno dva pratakoły. Pavodle milicyjantaŭ, jon parušyŭ zakanadaŭstva dvojčy, bo žychary domu № 142 zaśviedčyli, što bačyli jaho ŭ dvary dva razy. Pieršy raz adnaho, a druhi — razam z Tacianaj Smotkinaj.
Taciana Smotkina — žycharka domu № 142, u jakim nie było kapitalnaha ramontu ad momantu pabudovy. I jana, i jaje susiedzi nasamreč aburanyja sytuacyjaj, kali hrošy na ramont jany rehularna pieraličvali, a słužby ŽKH ćvierdziać, što niama srodkaŭ. Niezaležnaja žurnalistka Taciana Smotkina padkreślivała ŭ sudzie, što nia maje dačynieńnia da «Biełsatu». Sudździu jaje słovy nie pierakanali.
Źmicier Łupač naohuł admoviŭsia davać pakazańni padčas pracesu,bo byŭ upeŭnieny, što heta nie paŭpłyvaje na pastanovu.
Aboje žurnalistaŭ ŭžo majuć pakarańni za prafesijnuju dziejnaść, ich pryciahvali da administracyjnaj adkaznaści ŭ 2015 hodzie. Tady Hłybocki sud pakaraŭ Tacianu štrafam u 25 bazavych za materyjał «Darohi ŭ Hłybokim stanuć pazytyŭnymi», raźmieščany na sajcie Biełaruskaha Radyjo Racyja (Polšča).
Źmicier Łupač byŭ aštrafavany na takuju ž sumu za artykuł «Znajšlisia svajaki pamiežnika, jaki zahinuŭ na Hłyboččynie 17 vieraśnia 1939 hodu», raźmieščany na sajcie «Eŭraradyjo». Žurnalistaŭ pryznali vinavatymi ŭ parušeńni zakanadaŭstva ab ŚMI za supracoŭnictva z zamiežnymi srodkami masavaj infarmacyi biez akredytacyi. Abskardzić prysud Hłybockaha rajsudu žurnalistam nie ŭdałosia.
Kamientary