Z «Mocnymi navinami Homiela» sudziacca dziaržaŭnaja hazieta i budfirma, Kuźniacoŭ baicca najhoršaha
Jak stała viadoma «Našaj Nivie», najbolš upłyvovaje i čytanaje vydańnie Homielščyny — «Mocnyja naviny» — akazałasia pad pahrozaj zakryćcia.
Vydańnie ŭžo maje dva papiaredžańnia ad Ministerstva infarmacyi, i tut na jaho ŭ sud padali adrazu dziaržaŭnaja hazieta «Homielskaja praŭda» i budaŭničaja firma, niezadavolenaja, jak «MC» aśviatlała ich sprobu pabudavać žyły dom na miescy starych habrejskich mohiłak.
Zasnavalnik «Mocnych navin» Piatro Kuźniacoŭ śćviardžaje, što ataka na vydańnie zrežysiravanaja i maje zadačaj minimum zmusić sajt da samacenzury, a zadačaj maksimum — zakryć jaho.
«Hetyja razborki ŭžo daŭno viaducca, — kaža Kuźniacoŭ. — Startam stała sproba budaŭnictva doma na mierkavanym miescy staražytnych habrejskich mohiłak u abychod zakanadaŭstva — ni raskopak nie było, ni ekśpiertyz. My akcentavali na hetym uvahu, dajučy słova krajaznaŭcam. Heta ŭsio razdražniała zabudoŭščyka, jany inicyjavali sieryju abraźlivych publikacyj suprać aŭtara Siarhieja Lapina, jaki vystupaŭ suprać budaŭnictva. Takaja infarmacyjnaja vajnuška atrymałasia. Paśla pryjšoŭ pazoŭ u sud ad ich, a praz dva dni — ad haziety «Homielskaja praŭda».
Lapin trymaŭ dziaržaŭnuju hazietu nad śmietnicaj i zrabiŭ fota, u «HP» paličyli heta źniavahaj i patrabujuć «abviaržeńnia zdymka».
Što cikava — u vyniku parazy ad Lapina ničoha nie patrabujuć, sankcyi kładucca tolki na «Mocnyja naviny».
«Što kaža pra toje, što heta skaardynavana z adnaho centru? Kožny advakat u svaim styli składaje hetyja pozvy, a što dumać, kali pozvy ad zabudoŭščyka i ad «Homielskaj praŭdy» adnolkavyja pa svajoj struktury? «Prosim sud źniać publikacyju», paśla tearetyčnaja častka, pieralik adnolkavych fraz tekstu, jakija ich nie zadavalniajuć… I ŭ adnolkavaści hetych pozvaŭ dachodzić da marazmu — pozvu ad zabudoŭščyka składaŭ advakat, i jany patrabujuć kampiensavać im vydatki na advakata, a «Homielskaja praŭda» taksama patrabuje kampiensavać vydatki na advakata! Chacia pozvu składała jurydyčnaja słužba, i jany nijakich vydatkaŭ nie niasuć», — dadaŭ taksama Kuźniacoŭ.
Ale ci nie ŭ zajzdraści tut sprava? My paraŭnali naviedvalnaść «Mocnych navin» i usich astatnich ŚMI Homiela — dziaržaŭnyja sajty razam nie buduć mieć i piataj častki ad papularnaści niezaležnaha vydańnia.
Ličby aficyjnych ŚMI vartyja śmiechu: na sajt rajonki «Majak» u miesiac zachodziać z 9 tysiač IR, na sajt «Homielskich viedamaściaŭ» — z 48 tysiač, na sajt toj «Homielskaj praŭdy» — sa 130 tysiač, na sajt «Viečarovaha Homiela» — z 8 tysiač.
Heta ŭsio źviestki z partała acenki papularnaści sajtaŭ SimilarWeb, jaki aceńvaje miesiačnuju naviedvalnaść «Mocnych navin» u 930 tysiač! Tolki hety niedziaržaŭny sajt u Homieli kankuruje pa papularnaści z rasijskimi partałami. I pry hetym «Mocnyja naviny» hrošaj ad dziaržavy nie biaruć.
Maŭlaŭ, takaja situacyja razdražniaje miascovych ideołahaŭ: vykankam užo niekalki hadoŭ ubuchvaje srodki ŭ «Homielskuju praŭdu», navat radyjo pry joj stvaryli, ale ŭsio adno nie mohuć chacia b kankuravać ź niezaležnym vydańniem pa ŭpłyvovaści.
«Mahčyma, tamu jany i atakujuć nas, staviać u takija ŭmovy, kab my zabajalisia i spynili supracoŭnictva z pryncypovymi ludzi, a to i ŭvohule zakrylisia», — padsumoŭvaje Kuźniacoŭ.
Kamientary