17 lipienia spaŭniajecca try hady z taho času, jak rakieta ŭ niebie nad ŭschodniaj Ukrainaj źbiła pasažyrski «Boinh-777» avijakampanii Malaysian Airlines. Zahinuli 298 čałaviek. Jak vyjaviła mižnarodnaje rasśledavańnie, samalot byŭ źbity ź ziamli.
Mižnarodnaja ekśpiertna-žurnalisckaja hrupa Bellingcat apublikavała dakład, što abahulniŭ dokazy datyčnaści da hetaha prarasijskich sieparatystaŭ i asprečyŭ najbolš viadomyja alternatyŭnyja viersii.
U pieryjad z 23 pa 25 červienia 2014 hoda vajskoŭcy 53-j zienitna-rakietnaj bryhady pierahnali niekalki transpartnych srodkaŭ da rasiejska-ŭkrainskaj miažy. U ich liku była rakietnaja ŭstanoŭka «Buk» pad numaram 332.
Ranicaj 17 lipienia 2014 hoda ŭstanoŭka znachodziłasia ŭ Daniecku. Tam «Buk» pahruzili na płatformu hruzavoj mašyny. Adtul jana nakiravałasia na ŭschod praz terytoryju, padkantrolnuju prarasijskim sieparatystam. Numar «Buka» byŭ zamazany, adnak Bellingcat udałosia apaznać ŭstanoŭku pa ŭvahnutaści i śladach farby.
Za pieravozku ŭstanoŭki ŭ Danbas adkazvaŭ adstaŭny rasijski aficer Siarhiej Dubinski z pazyŭnym «Chmury», śćviardžała hrupa. U 2014 hodzie Dubinski byŭ načalnikam raźviedki ŭ padraździaleńni sieparatystaŭ, jakoje ŭznačalvaŭ Ihar Strałkoŭ (sapraŭdnaje proźvišča — Hirkin).
Dniom taho ž dnia hruzavik z «Bukam» prybyŭ u horad Śniežnaje, jaki znachodzicca prykładna za 80 kiłamietraŭ ad Daniecka. Sa Śniežnaha ŭstanoŭka rušyła svaim chodam na poŭdzień.
Kala 16:20 17 lipienia «Buk» źbiŭ «Boinh» avijakampanii Malaysian Airlines, jaki lacieŭ z Amsterdama ŭ Kuała-Łumpur. Na borcie rejsa MH17 było 298 čałaviek. 196 ź ich byli hramadzianami Niderłandaŭ. Usie jany zahinuli.
Ranicaj 18 lipienia «Buk» pad numaram 332 byŭ źniaty na videa. Jon prajazdžaŭ praz padkantrolny sieparatystam Łuhansk. Na ŭstanoŭcy brakavała adnoj rakiety. Pierachoplenyja razmovy sieparatystaŭ śviedčać pra toje, što nieŭzabavie paśla hetaha rakietnaja ŭstanoŭka viarnułasia ŭ Rasiju.
Pryčynaj hibieli pasažyrskaha łajniera stała rakieta «ziamla-pavietra», vypuščanaja z ŭstanoŭki «Buk». Da takoj vysnovy pryjšła Rada biaśpieki Niderłandaŭ i Abjadnanaja śledčaja hrupa, kudy, aproč hałandcaŭ, uvajšli pradstaŭniki pravaachoŭnych orhanaŭ Aŭstralii, Bielhii, Małajzii i Ukrainy.
Rasijskija ŭłady praciahvajuć śćviardžać, što ŭ krušeńni vinavaty ŭkrainski bok.
Pašpart Novaj Biełarusi pačnuć vydavać z 26 studzienia. Što viadoma i jak atrymać?114
Kamientary