Urad Čechii nie ŭchvalaje krytyku Jeŭrapiejskaj kamisii adnosna nievykanańnia kvot pa pierasialeńni mihrantaŭ z Hrecyi i Italii. Pra heta paviedamlaje «JeŭraPraŭda» sa spasyłkaj na Euractiv.
Praha śćviardžaje, što schiema, pryznačanaja dla dapamohi Italii i Hrecyi, nie pracuje i što Jeŭropa pavinna zasiarodzić svaje namahańni na inšych mierach, nakiravanych na pieraadoleńnie mihracyjnaha kryzisu.
Hety arhumient byŭ hałoŭnym u češskim adkazie na aficyjnaje paviedamleńnie Kamisii, jakoje było adpraŭlenaje ŭ siaredzinie červienia paśla taho, jak JEK pačała pracedury suprać Čechii, Vienhryi i Polščy.
«Naš adkaz hruntujecca na tych ža arhumientach, jakija my vykarystoŭvali z samaha pačatku — u schiemie pierasialeńnia jość šmat techničnych niedachopaŭ, jakija nie mohuć być vyrašanyja biez prasoŭvańnia inšych inicyjatyŭ», — zajaviŭ dziaržaŭny sakratar Čechii pa spravach ES Aleš Šmiełarž.
«Miechanizm nie moža efiektyŭna vyrašać kryzis, i heta stvaraje dadatkovyja prablemy biaśpieki i niepraparcyjnaje raźmierkavańnie ryzyk, tady jak my nie kantralujem ahulny abjom ryzyk i vydatkaŭ», — dadaŭ jon.
Ministr unutranych spraŭ Čechii Miłan Chovaniec zajaŭlaje, što ŭ Italii i Hrecyi na dadzieny momant niama biežancaŭ, jakija adpaviadajuć umovam dla pierasialeńnia pa schiemie ES.
Jon taksama adznačyŭ, što ŭrad byŭ hatovy zabrać z Hrecyi 30 čałaviek i 20 čałaviek ź Italii. Praha prainfarmavała Afiny i Rym ab hetym namiery dvojčy ŭ pieršaj pałovie 2016 hoda, dadaŭ ministr.
Pa słovach Chovanca, Italija pieršapačatkova nie dała nieabchodnych dakumientaŭ i naohuł nie reahavała na druhuju prapanovu.
Pa słovach češskaha ŭrada, ES pavinien uziać pad kantrol svaje miežy i kolkaść imihrantaŭ, pierš čym moža być uvasoblenaja lubaja efiektyŭnaja sistema pierasialeńnia.
«Tolki tady my zmožam vyrašać situacyju ludziej, jakija ŭžo prybyli ŭ ES — šlacham intehracyi tych, chto maje prava na atrymańnie prytułku, i viartańnie tych, u kaho jaho niama», — adznačyŭ Šmiełarž.
Ciapier čytajuć
Rasijskaja błohierka-miljońnica, jakaja zhańbiłasia ź biełaruskaj movaj, zapisała videa z tłumačeńniami — ale tak i nie vybačyłasia19
Kamientary