Što było b, kab pra 90-ja i 2000-ja kazali sučasnyja miedyja

Vy tolki nie padumajcie, što ja nyju. Ja ŭsim zadavoleny. Čytaju tyja sajty, što i ŭsie. Bo inšych sajtaŭ u bajnetu dla nas niama. I tak, mnie padabajecca i «Biełsat», i «Svaboda», i «Naša Niva». Ale viedajecie, mianie padkidvaje, kali ludzi pačynajuć hanarycca tym, što jość ciapier, i pradstaŭlać heta vialikim dasiahnieńniem. Bo toje, što jość ciapier, — heta mienavita situacyja «inšych sajtaŭ u bajnetu dla nas niama». Asabista viedaju niekalki čałaviek, jakija na pytańnie, čamu jany čytajuć «Mieduzu» i «Koltu», adkazvajuć: «Tamu što ŭ Biełarusi mała miedyjaŭ, jakija b razmaŭlali sa mnoj pra padziei ŭ hramadstvie intanacyjaj, jakaja mnie padabajecca».

U 90-ja i 2000-ja, viedajecie, byŭ pryncyp: brać hrošy ŭ adnym miescy i tracić ich na zarobki žurnalistaŭ, jakija pišuć pra miescy (i padziei) inšyja. U nulavyja čytańnie kamientaŭ, jakija maderatary nie paśpieli vydalić, nie było adzinym sposabam daznacca, što ž nasamreč adbyvajecca pa-za miežami restaracyjaŭ i šopinh-mołaŭ.

I tamu, pabačyŭšy, tak by mović, «pakalenčaski» dopis Franciška Viačorki pra toje, što raniej usio było horšym i kantent u sacyjalnych sietkach pradukujecca našmat bolš jakasny za žurnalistyku 90-ch i 2000-ch, bo tam «pamyłka na pamyłcy», maju nie pahadzicca.

 Adrazu padkreślu, što ŭdziačny Francišku za zhadku pra maju litaraturnuju tvorčaść, ale jak čałaviek, jaki pracavaŭ u žurnalistycy ŭ 90-ja — 2000-ja, chacieŭ by prademanstravać, čym byli b hetyja bahatyja na dramy hady, kali b pra ich pisali sučasnyja bujnyja elektronnyja miedyi. Pryvodzić budu tolki zahałoŭki:

Červień 1994, vybary prezidenta

— «Rezanansnaja avaryja na Viery Charužaj. Vinavaty ŭładalnik «Miersiedesa»?

— «Kali narešcie adstupić śpioka?»

— «Kali znoŭku čakać ciapło?»

 — «Daždžy ŭznoviacca z novaj siłaj z…»

— «Novyja kalekcyi «Śvitanka» i «Kaminterna». Hladzim razam z ruskim dyzajnieram» (partniorski materyjał bucika «Eskada»).

Lipień 1994, druhi tur vybaraŭ prezidenta, pieramoha Alaksandra Łukašenki

— «Padnoŭlenaje mieniu ŭ kaviarni «Valeryja». Česnyja porcyi, ale miasa paškadavali» (partniorski materyjał dla «Žmerynka Kaśmieciks»: «Antykak ad «Žmerynka Kaśmieciks — najlepšy srodak ad panosu!)

— «Kali skončycca ramont na płoščy la DK «Biełsafprofa»?

— «Materyjały dla padłoh, modnyja ŭ hetym siezonie» (partniorski materyjał łaminatu Toxic Plast)

— «Pryhažunia Karalina raić čatyry najlepšyja fiestyvali hetaha leta» (partniorski materyjał škoły pryhažuń i čatyroch fiestyvalaŭ, što pahadzilisia na rekłamu)

— «Na tusovačnaj vulicy Karła Marksa adkryŭsia druhi restaran. Doraha i ŭboha» (ad partniorstva admovilisia)

Krasavik 1995. Haładoŭka deputataŭ VS suprać refierendumu ab movie i simvałach

— «Što dumajuć minčuki pra padfarbavanyja bareljefy ŭ kafieteryi «Centralnaha»?

— «Špalery ci farba? Što abirać pry ramoncie ŭ panelcy»

— «Ci treba daryć dziaŭčynam darahija padarunki paśla pieršaha seksu? Adkazvajuć psichołah, uładalnik bara i zaŭsiodnica łobi ŭ haścinicy «Jubilejnaja».

— «Smarahd suprać bryljanta: jaki kamień musić być u zaručalnym piarścionku (nu, vy zrazumieli pra partnioraŭ)?»

Travień 1995. Refierendum robić ruskuju movu roŭnaj biełaruskaj, a čyrvona-zialony ściah — dziaržaŭnym simvałam

— «Dvuchbortnyja adychodziać? Intervju ź biełaruskim dyzajnieram, jaki bačyŭ Ału Puhačovu, pra toje, što budzie modnym letam — 1995»

— «Krucicie hałavoj nie mienš za try chviliny ŭ dzień. Doktar raić praktykavańni dla tych, chto hulaje ŭ Doom 2» (partniorski materyjał z kampanijaj «Dajnova»)

— «Ahlad nadmahillaŭ hetaha siezonu. Što modna na Paŭnočnych mohiłkach? Adkazvajuć mahilščyk, seksołah i zaŭsiodnica łobi ŭ haścinicy «Jubilejnaja» (partniorski materyjał, padtrymany Paŭnočnymi mohiłkami)

Listapad 1996 hoda. Premjer-ministr Michaił Čyhir pakidaje pasadu ŭ znak pratestu suprać abvieščanaha novaha refierendumu

— «Vosieńskija łuki minčan. Dziaŭčyna ŭ klatčastym palito i pazityŭny rudy chipi».

— «Najlepšyja knihi dla čytańnia na ekranie manachromnaha sotavaha telefona (tekst padtrymany apierataram «Biełsieł»)

— «Kali narešcie adstupić śpioka?»

— «Kali znoŭku čakać ciapło?»

— «Daždžy ŭznoviacca z novaj siłaj z…»

— «Rubryka «Palityka»: intervju z parykmachieram, jaki stryh Michaiła Čyhira napiaredadni adstaŭki (partniorski materyjał ź sietkaj barbier-šopaŭ «Śvitanak»)

Vosień 1996 — viasna 1997 hoda. Stvareńnie dvuchpałatnaha parłamienta, jaki musić zamianić Viarchoŭny Saviet, pry aktyŭnym supracivie častki deputataŭ VS

— «Hladzicie, jakaja sałata z cybulaj i śmiatanaj źjaviłasia ŭ «Čaburečnaj» (partniorski materyjał kaviarni «Filinz»)

— «Katy suprać sabak. Parady psichołaha, uładalnika bara i zaŭsiodnicy łobi ŭ haścinicy «Jubilejnaja»

— «Biełarus zapisaŭ kasietu «Ranietaje serca», pieśni robiacca papularnymi ŭ kłubie «Adys-Abieba» (intervju ź Siarhiejem Michałkom)

— «Uzory kilimaŭ, papularnych siarod sialan, haradžan i niezamužnich dzievušak» (sponsar — «Bresckija kaŭry»)

Krasavik 1997. Farmavańnie Sajuza Biełarusi i Rasii

— «Q-Zar — vyprabavańnie dla sapraŭdnych mužčyn. Intervju z zaŭsiodnikam hulni ŭ łaziertah u Parku Čaluskincaŭ».

— «Šatłandskija, skuranyja i sada-maza: fotazdymki minčanak, jakija ŭžo nadzieli sukienki»

— «Što lepiej, žančyna ci rybałka? Adkazy fieministki, uładalnika sieks-šopa i kramy vudzilnych pryład» (partniorski materyjał uładalnika seks-šopu i kramy vudzilnych pryład)

— «Dvuška, pieraroblenaja ŭ trošku. Jak zrabić asobny pakoj ź nišy pad ladoŭniu, kab nie ŭźnikła pretenzij ŽESa» (partniorski materyjał chaładzilnikaŭ «Adłand», u tekście kažacca, što pakoj zrabić nie atrymajecca)

2000, vybary ŭ Pałatu pradstaŭnikoŭ

— «Škarpetki nabyvaju ŭ CUMie, majtki — na «Niamizie». Intervju z kandydatami ŭ PPNS.

— «Rubryka «Kultura»: čamu niekatoryja katy byvajuć čornymi, inšyja — čorna-biełymi, a sustrakajucca taksama čarapachavyja?»

— «Minsk, dzie tvaje straŭsinyja stejki? Papularny ŭ ruskim ŽŽ aŭtar źjeździŭ u naš horad i adlinčavaŭ jaho kulinarnuju kulturu» (partniorski materyjał «Stejkchaŭza na Mašerava»: najlepšyja stejki sa straŭsaŭ, zamarožanyja ŭ 1950-ja).

2004, respublikanski refierendum, jaki zdymaje abmiežavańnie na vyłučeńnie adnoj i toj ža asoby ŭ prezidenty trojčy

— «Na tusovačnaj vulicy Karła Marksa adkryŭsia treci restaran. Mieniu i ceny» (pieramovy pra partniorstva ŭ stadyi praviadzieńnia)

— «Kryžovy pachod suprać tych, chto parkujecca nie pa praviłach. Ekałahičny aktyvist abviaściŭ baraćbu suprać parušalnikaŭ PDD, bo ŭ krainie niama inšych prablem»

— «Styl piśmieńnika z prablemami z ałkaholem: «a jašče čas ad času znachodžu ŭ kišeniach dochłych pacukoŭ» (partniorski materyjał, kadavańnie ad ałkahalizmu mietadam Daŭženki)

— «Kali narešcie adstupić śpioka?»
— «Kali znoŭku čakać ciapło?»
— «Daždžy ŭznoviacca z novaj siłaj z…»

• 0
• 0
• 0
• 0
• 0
• 0
• 0
• 0