Sieviaryniec: Varta zrazumieć adnu prostuju reč — jość čas zmaharoŭ i jość čas majstroŭ

«Zmahary», schilnyja da vuličnaj albo zbrojnaj baraćby, majuć hučny hołas, havorać rezkija pramovy, hanaracca tym, što iduć za ideju i da kanca, i časta staviacca hrebliva da tych, chto vybiraje inšyja šlachi.

«Majstry» bolš zajmajucca dypłamatyjaj, biznesam, administravańniem, tvorčaściu, robiać svaju spravu biez šumu i pyłu, lubiać padkreślić svoj prafiesijanalizm, vytrymku i abačlivaść, i nie mienš časta (chacia i mienš hučna) dakarajuć «zmaharoŭ» za biezvynikovaść i biezadkaznaść.

— Vy tolki kryčycie, pravakujecie i škodzicie, — kažuć «majstry» «zmaharam».

— A vy naohuł zdradniki i hrantasmoki! — choram adkazvajuć «zmahary».

Siońniašni padzieł na «hieraičnych łuzieraŭ» i «reśpiektabielnych zdradnikaŭ» napoŭnicu vykarystoŭvajuć usie vorahi Biełarusi.

Za apošnija paru dzion trojčy sutyknuŭsia z takimi acenkami navat siarod biełaruskamoŭnych viernikaŭ — u dačynieńni da viadomych asobaŭ i kiraŭnictva chryścijanskich hramadaŭ.

Darahija maje biełarusy i biełaruski! Varta zrazumieć adnu prostuju reč: jość čas zmaharoŭ i jość čas majstroŭ. Jość čas i abstaviny, jakija patrabujuć adkaznaj i ruplivaj pracy dziela Biełarusi — z poŭnaj addačaju, časam biez asablivaha pijaru i publičnaj padziaki. A jość čas i abstaviny, jakija prosta kryčać: usie — da zmahańnia!

U pačatku 2000‑ch albo ŭ paru tak zvanaj «narmalizacyi» byŭ čas majstroŭ — i navat ad zmaharoŭ patrabavalisia adpaviednyja ŭłaścivaści dy vyniki. A voś u 2020‑m bolšaść była zmaharami — i ciapier zhadvaje toj čas z nastalhijaj.

Masavy turemny dośvied, vajna va Ukrainie z tysiačami dabraachvotnikaŭ i vymušanaja emihracyja pašyryli i pahłybili hety padzieł na samuju aktyŭnuju i tvorčuju častku nacyi, na ŭsie jaje płasty. Svarki na ujaŭnaj i šmat u čym štučnaj miažy «zmahary» — «majstry» pahłynajuć siły i čas, tak patrebnyja biełarusam dla hartu jak adzinaj nacyi.

I zmahary, i majstry adnolkava krytyčna patrebnyja siońniašniamu biełaruskamu ruchu. Biez vuličnych i pravadyroŭ i bajcoŭ my budziem niazdolnyja skarystacca aknom mahčymaściaŭ i prajhrajem režymu albo Rasiei. Biez prafiesijnych dypłamataŭ, štabistaŭ, daśviedčanych mieniedžaraŭ my zavalim paryŭ nacyi da pieramohi.

Navučycca ŭzajemnaj pavazie, supracy, padtrymcy u adpaviednaści z devizam «biełarus biełarusu biełarus» — najpieršaja patreba siońniašniaha času i dla majstroŭ, i dla zmaharoŭ.

Nijakamu čortu łysamu nie ŭdasca złamić narod, jaki adčuvaje siabie adzinym, cełasnym, zładžanym i zdarovym arhanizmam.

Boh daść nam pieramohu — kali my sami budziem hatovyja ŭziać na siabie adkaznaść za Biełaruś.

• 32
• 3
• 0
• 5
• 0
• 0
• 0
• 1