Belsat.eu raspaviadaje, dzie kankretna i pry jakich abstavinach zahinuŭ biełarus Alaksiej Jaraševič, a taksama tłumačyć, jak pracuje sakretnaja hrupoŭka rasiejskich najmitaŭ.
Siońnia jość padstavy śćviardžać: 42-hadovy hamialčuk Alaksiej Jaraševič zahinuŭ u Siryi, dzie vajavaŭ u składzie rasiejskaj pryvatnaj kampanii pad kamandavańniem byłoha padpałkoŭnika śpiecnazu HRU Dźmitryja Utkina, pazyŭny Vahner (dalej — «PVK Vahnera»).
19 vieraśnia — u dzień śmierci Jaraševiča — hałoŭny infarmacyjny partał «Isłamskaj dziaržavy» Amaq Agency raźmiaściŭ fota čatyroch zabitych mužčyn z karotkim podpisam «Rasiejcy, nie padobnyja da kadravych, najmity».
Paźniej u šerahu supołak u sacyjalnych sietkach raspaŭsiudzili toj ža fotazdymak, nazyvajučy čałavieka na fota Alaksiejem Jaraševičam. U redakcyi belsat.eu jość fota biez retušy, na jakim dobra bačna charakternuju formu nosa i brovaŭ zabitaha. Paraŭnaŭšy z fota Alaksieja, zroblenym pry žyćci, my ŭbačyli, što rysy tvaru vielmi padobnyja.
Pierachod praź Jeŭfrat i šturmaviki, pra jakich maŭčyć Minabarony
Pavodle zvodak Minabarony Rasiei, 19 vieraśnia situacyja vyhladała nastupnym čynam: vojska Asada pry padtrymcy rasiejskich daradcaŭ i avijacyi VKS RF farsiravała raku Jeŭfrat i prasunułasia ŭ nasieleny punkt Dejr ez-Zor.
Blizki da siryjskich uładaŭ resurs Al-Masdar paviedamlaŭ, što apieracyju pravodzili «Palaŭničyja na IDziŁ» ci «ISIS Hunters» — nibyta elitnaje padraździaleńnie asadaŭskaha vojska. Jak vyśvietliła vałanciorskaja supołka Conflict Intelligence Team i telekanał RBK, škaleńniem «palaŭničych» zajmalisia rasiejcy z «PVK Vahnera».
U toj ža dzień uzbrojenaja hrupa sprabuje prarvacca dalej na ŭschod ad Dejr-ez-Zora, na terytoryju padkantrolnuju bajevikam ID. Heta adlustravana na mapie, što adnaŭlajecca ŭ režymie onłajn i akumuluje tvity z usiaho internetu.
Naturalna, nijakich rasiejskich šturmavych bryhad tam, pavodle aficyjnaj viersii Minabarony, być nie mahło. Ale jak raz pamiž horadam Chušam, zaniatym asadaŭcami i pasieliščam At-Tabijia, jakoje kantralujuć džychadysty, udzień 19 vieraśnia pry sprobie praryvu byli likvidavanyja čaćviora bajcoŭ słavianskaj źniešnaści, siarod jakich apynuŭsia i biełarus.
U ich na šyi — admietnyja asabistyja žetony. Zvyčajna na žetonie kadravaha vajskoŭca jość numar z šaści ličbaŭ i nadpis «Uzbrojenyja siły Rasiei». Ale na mietaličnych płaścinkach u zabitych nie paznačanaja prynaležnaść da krainy, a tolki litara «M» i čatyry ličby.
Na pačatku kastryčnika Słužba biaśpieki Ukrainy apublikavała sabranyja vyviedkaj dadzienyja datyčna «PVK Vahnera»: va ŭsich bajcoŭ struktury, uklučajučy kiraŭnictva, žetony vyhladajuć mienavita takim čynam.
Hetyja fakty amal nie pakidajuć sumnievu: Alaksiej Jaraševič byŭ «žaŭnieram udačy» «Vahnera».
U hetym taksama nie sumniajecca Bonda Daroŭskich — viadomy rasiejski pradprymalnik, jaki ŭ 2014 hodzie pad upłyvam prapahandy pajechaŭ vajavać suprać Ukrainy, ale rasčaravaŭsia, i potym nieadnarazova vystupaŭ z publičnaj krytykaj rasiejskich uładaŭ.
«Ja Jaraševiča nie viedaŭ, ale mahu dakładna skazać — kali jen zahinuŭ u Siryi, to heta vahneraviec. U Siryi niama inšych rasiejskich PVK», — adznačyŭ u razmovie z belsat.eu Daroŭskich, u jakoha z časoŭ Danbasu zastałosia šmat znajomych siarod vahneraŭcaŭ.
Pavodle Daroŭskich u «Vahnera» vajujuć nie tolki rasiejcy, ale i ŭkraincy ź biełarusami. Pryčym biełarusy adznačylisia ŭ PVK jak «dobryja śpiecyjalisty».
«PVK Vahnera» dziejničaje z 2014 hodu. Śpiecsłužby Ukrainy śćviardžajuć, što vahnieraŭcy datyčnyja da źniščeńnia ŭkrainskaha samalota Ił-76 na Danbasie, udzielničali ŭ šturmie Łuhanskaha aeraportu i bajach za Debalcava. U Siryi vahnieraŭcy adznačylisia pry šturmie Palmiry ŭ sakaviku 2016 hodu i šerahu inšych apieracyj. Pavodle ŚMI, minimalnaja staŭka dla šarahoŭca ŭ «PVK Vahnera» — kala 250 tys. rasiejskich rubloŭ (bolš za 4.300 USD), ale z roznymi bonusami hetaja ličba moža dasiahać 450 tys. (bolš za 7.800 USD). Asobna praduhledžany vypłaty paranienym i svajakam zabitych.
«Asnoŭnaja pryčyna — hrošy». Šlach typovaha «vahneraŭca»
Anton Barysienka z Uładzivastoku prajšoŭ terminovuju słužbu ŭ marskim śpiecnazie. U 2015 hodzie pajechaŭ na trenirovačnuju bazu «Vahnera» ŭ Molkina Krasnadarskaha kraju i praz try miesiacy jaho dasłali na Danbas, u Pieski, dzie tady adbyvalisia najbolš žorstkija bai.
«Paśla zaklučeńnia kantraktu, kopiju mnie nie dali i nikomu nie vydavali na ruki. Usie bačyli ich ciaham 15 chvilin, pakul padpisvali. Kiraŭnictva i tyja, chto vyšej, u tvar i pa proźviščach nas nie viedali. Ale nam było viadoma, što «Vahnera» z Hienštabu hrejuć i kuryrujuć», — raspavioŭ Barysienka karespandentcy belsat.eu.
Na pytańnie, što matyvavała 26-hadovaha chłopca pajści ŭ najmity, toj adkazvaje: «Asnoŭnaja pryčyna — hrošy».
Jon śćviardžaje, što za šturm Piesak atrymaŭ 280 tysiač rasiejskich rubloŭ (4850 USD). Paśla zakančeńnia aktyŭnaj fazy vajny na Danbasie, «vahneraŭcy» nakiravalisia ŭ Siryju.
«Bajcoŭ u PVK kala 1500. Jość i ŭ Damasku, i ŭ Chamie, i ŭ Łatakii dy Alepa. Usie raskidanyja pa rotach. Kamandzir majho ŭzvodu zahinuŭ pry šturmie Palmiry, adarvała nahu, tamu mianie pieraviali na jahonuju pasadu», — havoryć Barysienka.
Acenki kolkaści najmitaŭ adroźnivajucca. Pavodle rasiejskaj «Novaj haziety» ciapier u «PVK Vahnera» uvachodzić niekalki tysiačaŭ čałaviek, padraździaleńnie ŭklučaje ŭ siabie artdyvizijon i tankavuju rotu. Słužba biaśpieki Ukrainy śćviardžaje, što ahułam kolkaść «PVK Vahnera» dasiahaje 5 tys. čałaviek.
Orden ad Pucina — paśmiarotna
Dośvied udziełu ŭ vajnie na Danbasie maje značnaja častka siońniašnich bajcoŭ «Vahnera». Paśla taho, jak aktyŭnaja faza vajennych dziejańniaŭ na paŭdniovym uschodzie Ukrainy zaviaršyłasia, bajevikoŭ pieraaryjentavali na abaronu režymu Bašara Asada ŭ Siryi. U Siryju paśla Danbasu pajechaŭ i rasiejec Alaksiej Saŭko (pazyŭny «Memfis»).
«My paznajomilisia, kali nabiralisia na danbaskuju vajnu, — raspaviadaje belsat.eu jaho tavaryš Śviatasłaŭ Holikaŭ, — Niama vialikaj tajamnicy ŭ tym, što značnaja častka dobraachvotnickich bataljonaŭ farmavałasia ŭ Rastoŭskaj vobłaści faktyčna ŭ vyhladzie «pryvatnych vajennych kampanijaŭ» (to bok padraździaleńniaŭ rasiejskich najmitaŭ — zaŭv. red.). U adnym z takich — bataljonie «Stieṕ» — u červieni 2014 hoda my z «Memfisam» i paznajomilisia».
Paśla leta 2014-ha «Memfis» jašče niekalki razoŭ zachodziŭ na terytoryju Ukrainy ŭ składzie roznych rasiejskich padraździaleńniaŭ, a vosieńniu 2015 hoda adpraviŭsia ŭ Siryju ŭ składzie «PVK Vahnera».
«Ja dakładna nie viedaju, jak jon apynuŭsia ŭ «Vahnera», — raspaviadaje Holikaŭ, — Ale paśla taho, jak my ŭžo patrapili ŭ hetuju sistemu zboru dobraachvotnikaŭ pa linii PVK letam 2014-ha, niejkija zaviazki ŭ chłopcaŭ byli — vyjści na patrebnych ludziej nie było prablemaj».
Holikaŭ raspaviadaje, što zarobak bajcoŭ u «Vahnera» ŭ Siryi byŭ prykładna ŭ dva razy vyšej, čym u rasiejskich najmitaŭ na Danbasie.
«Ničoha drennaha ŭ hetym niama: u armii aficery i kantraktniki taksama atrymlivajuć nadbaŭki za ŭdzieł u bajach. A tut faktyčna — nieaficyjnaje padraździaleńnie ŭzbrojenych siłaŭ Rasiei, jakoje vykonvaje niebiaśpiečnyja zadačy. Ale Loša nia byŭ z tych, chto tupa pajšoŭ za hrošy. Kali radzima płacić za vykanańnie zadačy — heta vydatna. Ale heta nie hałoŭny faktar. Prosta hetaja praca jaho zachapiła», — raspaviadaje Holikaŭ.
U sakaviku 2016 hoda «PVK Vahnera» ŭdzielničała ŭ šturmie Palmiry i padčas hetych bajeŭ 28-hadovy «Memfis» byŭ zabity. Paśmiarotna Pucin uznaharodziŭ jaho i jašče šerah vahneraŭcaŭ ordenam Mužnaści.
«Ja admoviŭsia, tamu što tam nabirali miasa»
Bajcy «PVK Vahnera» zvyčajna nia razdajuć intervju i nie pazirujuć u sacyjalnych sietkach sa zbrojaj. Poŭnaja sakretnaść asobna ahavorvajecca i prapisvajecca ŭ kantrakcie pry pryjomie ŭ kampaniju.
Rasiejec Pavieł Š. raniej vajavaŭ na Danbasie na baku sieparatystaŭ, a viasnoj 2017 hoda znachodziŭsia ŭ Molkina, ale ŭ adroźnieńni ad inšych pra bazu vahneraŭcaŭ kazać moža — u apošni momant kantrakt jon padpisvać admoviŭsia. Pra toje, jak vyhladaje baza najmitaŭ jon zhadziŭsia raspavieści belsat.eu.
Baza «PVK Vahniera» raźmieščana ŭ Molkina na terytoryi 10-j asobnaj bryhady śpiecyjalnaha pryznačeńnia HRU. Kab trapić da «Vahnera» patencyjny najmit pavinien prajści niekalki KPP, pryčym vypadkovamu čałavieku tudy trapić niemahčyma — tolki praz asabistyja znajomstvy i papiarednija damoŭlenaści.
«U Molkina ni ŭ jakim razie nielha kazać, što jedzieš u «PVK Vahnera» — pamiž svajmi ich tak nichto nie nazyvaje. Na KPP ty kažaš, što ty ŭ «kampaniju». Jany vyklikajuć śpiecyjalnaha čałavieka, toj pytaje, adkul daviedaŭsia pra «kampaniju», praviaraje dakumienty. Kali usio narmalna, to ty prachodziš dalej. Kali prachodziš usie KPP — bačyš mužykoŭ, jakija mocna adroźnivajucca ad zvyčajnych vajskoŭcaŭ, u ich ich forma i mašyny piasočnaha koleru, usie z barodami», — raspaviadaje Pavieł.
Aficerskija zvańni ŭ PVK nie zhadvajucca. Jość tolki hrupy i kamandziry hrup. Vahneraŭcy źviartajucca adzin da adnaho pa pazyŭnych, imiony nazyvać nie pryniata navat pry razmovie šarahoŭcaŭ pamiž saboj (čaściej za ŭsio imiony prosta nie viedajuć). Dadatkovyja rospyty nia vitajucca, vyklikajuć padazreńnie.
Patrabavańni da patencyjnych najmitaŭ dosyć prostyja: zamiežny pašpart na rukach, adsutnaść zapazyčanaściaŭ (kredyty, štrafy i h.d.) i dobraja fizičnaja forma. Pažadana taksama mieć dośvied bajavych dziejańniaŭ — vieteranaŭ Danbasu, naprykład, biaruć pa sproščanaj prahramie.
«Kali kantrakt padpisaŭ, to šlachu nazad niama. A kali ty padpisaŭ, a potym zrazumieŭ, što heta nie tvajo, to možaš prosta nie viarnucca, jak nam skazali. Ja tak zrazumieŭ, što prosta ŭ śpinu stralajuć», — raspaviadaje Pavieł.
Sam Pavieł chacieŭ trapić u «PVK Vahnera» u jakaści snajpiera, ale ŭ Molkina nabirali tolki bajcoŭ šturmavych bryhad.
«Ja admoviŭsia padpisvać kantrakt, tamu što tam prosta nabirali miasa. U šturmavikoŭ 70% strat — heta narmalna. U vahneraŭcaŭ u kancy 2016-pačatku 2017 hoda ŭ Siryi palahło kala 300 čałaviek. Praź vialikija straty ŭ PVK padniali apłatu — z 250 tysiač da 350 tysiač rubloŭ (6 tys. USD)», — kaža Pavieł.
Pa słovach Paŭła, vahneraŭcy ŭ śniežni 2016 hoda prymali ŭdzieł u šturmie Alepa sumiesna z vojskami Bašara Asada.
«PVK Vahniera» patrebna, kab schavać rasiejskija straty i aficyjna nie ŭdzielničać u naziemnych apieracyjach. Chłopcy vajujuć za pucinskija hrošy, FSB ich prykryvaje. Nakolki ja viedaju — va ŭsich paralelna jość paśviedčańni rasiejskich vajskoŭcaŭ. Adkaznaść jany paniasuć tolki kali ŭ Rasiei ŭłada źmienicca. A pakul šmat chto ŭ Rasiei maryć tudy patrapić — tam płaciać realnyja hrošy. Ja viedaju chłopcaŭ, jakija pavajavali ŭ «Vahnera» i ciapier vielmi niadrenna siabie adčuvajuć: u Rasiei kryzis, a ŭ ich darahaja mašyna i pa 2-3 kvatery», — tłumačyć Pavał.
Na šlach da lehalizacyi
Varta adznačyć, što jašče 29 śniežnia 2016 hoda Uładzimir Pucin padpisaŭ zakon ab karotkaterminovych vajennych kantraktach (da 1 hoda), jaki moža być zaklučany, u pryvatnaści, u metach «spynieńnia mižnarodnaj terarystyčnaj dziejnaści za miežami terytoryi Rasiejskaj Fiederacyi». Ekśpierty acanili hety zakon jak krok da lehalizacyi «PVK Vahnera». Adnačasova Dźmitryj Utkin («Vahner») byŭ zaŭvažany na pryjomie ŭ Kramli, paźniej źjaviłasia jaho fota razam z Pucinym.
Ale pakul «PVK Vahnera» zastajecca pa-za miežami zakonu. Pavodle rasiejskich ŚMI, u najvyšejšym rasiejskim vajskovym kiraŭnictvie ciapier idzie baraćba pamiž prychilnikami i praciŭnikami lehalizacyi «PVK Vahnera».
Ciapier čytajuć
Były pamočnik Łukašenki Ihar Bryło pryznaŭ, što nabraŭ chabaraŭ na $2 miljony10
Kamientary