«Usio, čaho ja chacieła dasiahnuć u žyćci, ja zrabiła ŭ Polščy». Lehkaatletka Žodzik raskazała pra Biełaruś, pieramohu i svoj hanarar
Maryja Žodzik z Baranavičaŭ pryniesła Polščy adziny miedal lohkaatletyčnaha čempijanatu śvietu ŭ Tokia. Jaje pieramoha stała siensacyjaj. Maryja raspaviała Interia Sport, jak joj udałosia pieramahčy, pra Biełaruś i toj hanarar, što jana atrymała za pieramohu.
«Ja nie chaču viartacca ŭ Biełaruś. Ja ŭžo pryvykła da Polščy. Jašče niejki čas tamu była nadzieja, što niešta źmienicca, ale ciapier mnie zdajecca, što ŭžo niama šancaŭ na heta», — kaža spartsmienka.
Try hady tamu jana pryniała adno z samych ciažkich rašeńniaŭ u žyćci i ciapier atrymała za heta ŭznaharodu. Heta byŭ nievierahodny vystup i adzin z apošnich šancaŭ dla polskaj zbornaj na miedal, piša Interia Sport.
28‑hadovaja spartsmienka z Baranavičaŭ pakazała, jakuju mocnuju psichiku jana maje. Bo spabornictvy ŭ skačkach u vyšyniu, dzie jana stała vice-čempijonkaj śvietu, byli pierapynienyja na hadzinu. Doždž pieraškodziŭ spartsmienkam, vybiŭ ich z rytmu. Adnak heta nie spyniła Žodzik. Tak reahavać na składanuju situacyju mohuć tolki najlepšyja.
Biełaruska, jakaja vystupała za Polšču, kab zabiaśpiečyć sabie miedal, musiła skoknuć u treciaj sprobie 2,00 m. Heta było vyšej za jaje asabisty rekord, jaki składaŭ 1,98 m. Niahledziačy na toje, što doždž usio jašče išoŭ, a raźbieh byŭ mokry, jana zrabiła heta.
Paśla hutarak z žurnalistami i antydopinhavaha kantrolu Maryja viarnułasia ŭ hatel a treciaj ranicy.
— Atrymałasia praspać čatyry hadziny, — raspaviała jana Interia Sport.
«Ja apynułasia pierad vybaram, jakoha, ułasna, nie pavinna była rabić»
Adrazu paśla taho, jak Rasija atakavała Ukrainu, Žodzik vyrašyła źjechać ź Biełarusi.
«Heta sapraŭdy była dla mianie ciažkaja situacyja. Ja apynułasia pierad vybaram, jakoha, ułasna, nie pavinna była rabić. Ciapier, adnak, ja žyvu ŭ Polščy. Tut ja žyvu i tut płanuju svajo žyćcio. Tamu ja ŭžo nie hladžu na heta tak, što niešta straciła. U mianie ŭ Polščy vydatnyja siabry. Usio toje, što ja chacieła dasiahnuć u žyćci, ja zrabiła siarod palakaŭ i ŭ Polščy», — skazała Žodzik.
U Biełarusi jana pakinuła siamju. Ad niadaŭniaha času ŭ Polščy znachodzicca jaje siastra.
Na pytańnie, ci kali-niebudź vierniecca ŭ svaju krainu, jana adkazała:
— Ja chacieła b tudy kali-niebudź pajechać da baćkoŭ. Adnak ja nie dumaju, što ja chacieła b tam žyć.
Jana kaža, što ŭ Polščy ŭžo adčuvaje siabie jak doma.
«Niešta łopnuła ŭ majoj hałavie»
Dla Žodzik miedal čempijanatu śvietu źjaŭlajecca najvialikšym pośpiecham u karjery. Jana kaža, što nie maje namieru spyniacca.
— Ciapier ja chaču zastavacca na pjedestale, — zajaviła jana.
Jana sama nie moža patłumačyć, jak pieraadoleła peŭnyja barjery.
— Niešta, napeŭna, łopnuła ŭ majoj hałavie. Ja skoknuła pieršy raz u žyćci dva mietry i padumała: čamu ja raniej hetaha nie zrabiła?
Na treniroŭkach Žodzik skača ŭ miežach 1,80 — 1,85 m. Tamu jana nie viedaje, na jakija vysokija skački jaje chopić.
Za svoj pośpiech u Tokia jana zarabiła 35 tysiač dołaraŭ.
— Heta moj najvialikšy hanarar u karjery, — kaža jana i dziakuje ŭsim za vinšavańni.
Žodzik rodam z Baranavičaŭ. U 2020 hodzie jana padpisała adkryty list spartoŭcaŭ, u jakim asudžałasia falsifikacyja vybaraŭ u Biełarusi, a taksama hvałt z boku siłavikoŭ. Taksama spartoŭka asudziła vajnu Rasii suprać Ukrainy.
Ciapier čytajuć
18‑hadovy były palitviazień raskazaŭ, što jon svajak Cichanoŭskaj. Jaho zatrymali, kali jon jechaŭ vajavać za Ukrainu2
Kamientary
Čamu na rasiejski i ahulhna rasiejskamoŭnyja krynicy dajacie spasyłki, a na polski i inšyja "niaruskija" niaredka spasyłki adsutničajuć?