40-hadovaja biełaruska Volha Čarnieckaja pamierła 18 listapada ŭ Jehipcie. U jaje nie znajšłosia svajakoŭ, hatovych apłacić pieravoz cieła na baćkaŭščynu.
Tamu jaje pachavali tamsama, u Churhadzie.
Jak paviedamlajecca, na pachavańni prysutničali jaje siabar Machamied, orfi-muž Achmied, a taksama jehipieckaja siabroŭka.
Machamied i Achmied i apłacili košt pachavańnia — 300 dalaraŭ — napałam.
Ale ž chto taki orfi-muž? Heta asablivaść Jehipta — mahčymaść zaklučać časovyja orfi-šluby. U inšych isłamskich krainach takoha niama, raskazała «Našaj Nivie» biełaruska Rajana Volha Čarnych, jakaja žyvie ŭ Kairy.
Słova orfi pa-arabsku značyć «zvyčaj, tradycyja». Taki šlub nidzie nie rehistrujecca, ale dazvalaje mužčynu i žančynie žyć razam i pry hetym nie hrašyć pa normach relihii.
Isnuje dva typy błankaŭ dla afarmleńnia orfi-kantrakta. Pieršy — sproščany, jaho možna kupić u luboj kniharni ŭ Jehipcie, kaštuje jon kapiejki, i zapoŭnić samim. Jość i paŭnavartasny orfi, jaki zaklučajuć u prysutnaści dvuch śviedkaŭ (kali śviedki — žančyny, to čatyroch) i advakata, jaki pavinien pastavić svoj podpis u dakumiencie. Dadzienaja pracedura kaštuje nievialikuju sumu.
U dakumienty zanosiać dadzienyja pašparta, proźvišča, imia baćkoŭ, a taksama pamier viasielnaha padarunka. Praŭda, apošniaje nieabaviazkova.
Orfi-šlub moža być razarvany ŭ luby momant i nie praduhledžvaje nijakich materyjalnych abaviazkaŭ. Mužčyna maje prava adnačasova znachodzicca ŭ niekalkich orfi-šlubach, choć heta i nie vitajecca hramadstvam. «Nie ŭsiudy pary ŭ orfi-šlubie zdaduć kvateru ci dazvolać zasialicca ŭ adzin numar u hateli», — kaža Čarnych.
Zamiežnicy ŭ Jehipcie niaredka zaklučajuć takija orfi-damovy. «Heta daje padstavu dla atrymańnia paŭhadavoj vizy dla nieturystyčnych metaŭ (tak zvanaja «viza maładoj»), patrebnaj dla aficyjnaha šlubu», — raskazvaje biełaruska.
Navat zavierany advakatam orfi-kantrakt nie pryznajecca ŭ jakaści šlubu ŭ inšych dziaržavach, u tym liku i Biełarusi.
Biełaruska Volha Čarnieckaja hadavała dvaich dziaciej, jakich usynaviła jašče ŭ Biełarusi, kali była zamužam u pieršy raz. Jaje były muž ciapier sprabuje pieravieźci małych na radzimu. Ni były muž, ni brat na pachavańnie nie lotali.
Kamientary