Jahor Kančałoŭski napisaŭ list Łukašenku, kab jamu viarnuli $130 tysiač za niaźniaty film
Scenaryst Andrej Kurejčyk raźmiaściŭ na svajoj staroncy ŭ fejsbuku kopii dakumientaŭ, źviazanych sa stvareńniem filma «Ślady na vadzie», — adzinaj karciny, źniataj «Biełaruśfilmam» u 2016 hodzie.
U zabłytanaj historyi razabraŭsia TUT.BY. Miarkujučy pa dakumientach, režysior Jahor Kančałoŭski pavinien byŭ atrymać za zdymki filma kala 140 tysiač dalaraŭ, jaho pamočnica — kala 60 tysiač dalaraŭ. U vyniku karcinu źniaŭ biełaruski režysior Alaksandr Anisimaŭ (ciozka znakamitaha dyryžora), a Kančałoŭski napisaŭ list Alaksandru Łukašenku z prośbaj vypłacić jamu hrošy za film, jaki źniaŭ inšy čałaviek (udakładnim, što ŭ dakumientach fihuruje nie Jahor Kančałoŭski, a Hieorhij Michałkoŭ — heta sapraŭdnaje imia i proźvišča režysiora).
Jakim čynam skłałasia takaja situacyja? Dla hetaha nieabchodna patłumačyć pieradhistoryju stvareńnia filma. Karcina była źniata pavodle ramana Mikałaja Illinskaha «Čužy siarod svaich». Jaho dziejańnie adbyvajecca ŭ Zachodniaj Biełarusi paśla Druhoj suśvietnaj vajny i raspaviadaje pra baraćbu miascovaj milicyi z bandami, jakija teraryzujuć nasielnictva.
Režysior Andrej Hołubieŭ na praciahu vaśmi hadoŭ pisaŭ scenar «pad siabie». Ź im jon u 2015 hodzie vyjhraŭ respublikanski konkurs kinaprajektaŭ. Ale na kinastudyi scenar vyrašyli addać maskoŭskamu režysioru Jahoru Kančałoŭskamu. Pavodle infarmacyi TUT.BY, «Biełaruśfilm» chacieŭ vyjści z hetym filmam na rasijski rynak, i proźvišča viadomaha režysiora mahło dapamahčy ŭ hetym prasoŭvańni.
U intervju TUT.BY Hołubieŭ jašče tady zajaviŭ, što hanarar Kančałoŭskaha ckładzie kala 100 tysiač dalaraŭ, tady jak jamu zapłacili b 5 tysiač, heta značyć u dvaccać razoŭ mienš. Nievialikaja suma, pieršapačatkova prapanavanaja Hołubievu, tłumačyłasia tym, što pastanovaj Savieta ministraŭ byli ŭviedzieny minimalnyja staŭki ŭznaharodžańnia: u tym liku 396 bazavych vieličyń dla režysiora-pastanoŭščyka i 129 bazavych vieličyń dla režysiora. Na toj momant heta składała adpaviedna kala $4 tysiač i $1,3 tysiačy. Heta značyć, mierkavany hanarar Kančałoŭskaha ŭžo tady nie ŭpisvaŭsia ŭ dziejnyja normy.
Miarkujučy pa dakumientach, jakija vykłaŭ na svajoj staroncy ŭ fejsbuku Andrej Kurejčyk, 18 traŭnia 2016 hoda «Biełaruśfilm» zaklučyŭ ź Jahoram Kančałoŭskim dahavor na 160 miljonaŭ 20 tysiač niedenaminavanych biełaruskich rubloŭ (kala 8000 dalaraŭ). Chutčej za ŭsio, na toj momant hetaja suma adpaviadała staŭcy ŭznaharodžańnia.
Łahična, što rasijski režysior ź imiem nie pracavaŭ by za takuju sumu. Tamu ŭ traŭni 2016 hoda było padpisana dadatkovaje pahadnieńnie na sumu 7 526 882 rasijskich rubloŭ (zhodna z dakumientam, heta składała $129 tysiač). Akramia taho, praca asistenta režysiora Aniet Kałpachčjan aceńvalisia ŭ 9 miljonaŭ 415 tysiač niedenaminavanych biełaruskich rubloŭ ($5 tysiač) pavodle asnoŭnaj damovy i 3 225 806 rasijskich rubloŭ ($55 tysiač) pa dadatkovym damovie. Hetyja sumy fihuravali jak «pryciahnutyja niezabaronienyja krynicy». Inakš kažučy, jak sponsarskaja dapamoha, jakuju, kali vieryć listu Jahora Kančałoŭskaha, pavinien byŭ znajści dyrektar kinastudyi Ihar Poršnieŭ.
Ale praca Kančałoŭskaha i jaho kamandy była niepraciahłaj. U siaredzinie vieraśnia 2016 hoda TUT.BY apublikavaŭ ananimny list supracoŭnika «Biełaruśfilma», jaki źviarnuŭsia ŭ Administracyju prezidenta praz «žudasnaje finansava-ekanamičnaje stanovišča kinastudyi». Pavodle infarmacyi śpiecyjalista, «kali pryjšła para płacić pa damovie ŭznaharodžańnie, akazałasia, što płacić niama čym». U vyniku ŭžo tady było viadoma, što «kinastudyi pryjdziecca ŭsio roŭna vypłačvać dziasiatki tysiač dalaraŭ rasijskamu režysioru za vymušanaje skasavańnie kantraktu».
Miarkujučy pa dakumientach, jakija padaŭ Andrej Kurejčyk, jašče ŭ kastryčniku 2016 hoda Jahor Kančałoŭski napisaŭ list Alaksandru Łukašenku, u jakim prasiŭ vypłacić hrošy pa padpisanym raniej pahadnieńni. Jon śćviardžaŭ, što pracavaŭ za svoj košt na praciahu vaśmi miesiacaŭ, a ŭ vyniku «Biełaruśfilm» staŭ zdymać karcinu ź inšaj kamandaj biez tłumačeńnia pryčyn.
Nieviadoma, ci patrapiŭ list da adrasata. Tym časam film u śpiešnym paradku źniaŭ režysior Alaksandr Anisimaŭ, i ŭ lutym 2017 hoda «Ślady na vadzie» vyjšli ŭ abmiežavany prakat. Krytyki acanili karcinu skieptyčna, ale prychavanaja baraćba tym časam praciahvałasia.
Vosieńniu 2017 hoda Kančałoŭski i jaho asistentka adpravili svaje pretenzii ŭ jurydyčny siektar «Biełaruśfilma». Kali daviarać infarmacyi dakładnoj zapiski, jakaja była pradastaŭlena dyrektaru «Biełaruśfilma» Iharu Poršnievu, jurydyčny siektar studyi pryznaŭ fakt pretenzij z boku rasijskich śpiecyjalistaŭ. Kančałoŭski patrabavaŭ vypłacić jamu 3343 biełaruskich rubloŭ ($1,7 tysiačy) pa asnoŭnaj damovie i 3 108 601 rasijskich rubloŭ ($52 tysiačy) pa dadatkovym dahavory (možna vykazać zdahadku, što astatniaja suma była jamu vypłačana). Adpaviedna, jaho asistentcy Anecie Kałpachčjan pavinny byli vypłacić 2 353,35 biełaruskich rubloŭ ($1,2 tysiačy) i 1 332 258 rasijskich rubloŭ ($23 tysiačy).
Kali ličyć kopiju dakumienta praŭdzivaj, Ihar Poršnieŭ pastaviŭ rezalucyju: «Pravieści raźlik pavodle damovy». Ci atrymali ŭ vyniku Kančałoŭski i Kałpachčjan hetyja hrošy, nieviadoma. Pres-sakratar «Biełaruśfilma» Julija Balšakova paviedamiła TUT.BY aficyjnuju pazicyju studyi. Pavodle jaje słoŭ, infarmacyja, jakaja jość u internecie, nie adpaviadaje rečaisnaści. Ciapier supracoŭniki «Biełaruśfilma» buduć vyśviatlać, što heta za dakumienty i jakim čynam jany trapili ŭ adkryty dostup. Na momant publikacyi tekstu Jahor Kančałoŭski nie adkazaŭ na pytańni TUT.BY.
Ciapier čytajuć
Cichanoŭski adkazaŭ Cichanoŭskaj: Čamuści nie zhadvajecca, što reabilitacyja syna adbyvałasia ŭ kvaterach i damach, jakija ja kupiŭ97
Kamientary