U Łatvii vyjšaŭ novy imihracyjny zakon, jaki pastrožvaje ŭmovy dla biełarusaŭ
U Łatvii ŭstupiŭ u siłu novy imihracyjny zakon, jaki istotna źmianiaje praviły znachodžańnia i pracaŭładkavańnia inšaziemcaŭ. Bolš žorstkija abmiežavańni praduhledžanyja tolki dla hramadzian Rasii, piša «Radyjo Svaboda».
Pa novych praviłach, inšaziemcu, jaki atrymlivaje časovy dazvoł na žycharstva ŭ Łatvii mienavita ŭ suviazi z pracaŭładkavańniem, ciapier zvyčajna vydajuć jaho nie bolš čym na adzin hod. Vyklučeńnie praduhledžana dla vypadkaŭ, kali pracadaŭca płacić padatki ŭ režymie mikrapradpryjemstva. Błakitnuju kartu Jeŭrapiejskaha sajuza pry hetym vydajuć na dva hady.
Zakon vyznačaje 23 katehoryi zamiežnikaŭ, jakija mohuć pracavać u Łatvii biez dadatkovych abmiežavańniaŭ. Siarod ich uładalniki pastajannaha dazvołu na žycharstva, mužy, žonki i dzieci hramadzian Łatvii, niehramadzian abo ŭładalnikaŭ pastajannaha DNŽ, naščadki łatyšoŭ i livaŭ, uciekačy, ludzi z alternatyŭnym statusam abo časovaj abaronaj i členy ich siemjaŭ, apiekuny łatvijskich hramadzian i niehramadzian, achviary handlu ludźmi, niekatoryja studenty, daśledčyki i inviestary.
Dla hramadzian Biełarusi ŭ novym zakonie praduhledžanaja asobnaja schiema. Biełarus, jaki pierad paŭtornaj padačaj dakumientaŭ nie mienš za try apošnija miesiacy aficyjna pracavaŭ u Łatvii i płaciŭ padachodny padatak, moža atrymać paŭtorny časovy dazvoł na žycharstva terminam na adzin hod.
Pry hetym hramadzianie Biełarusi vyklučanyja z šerahu pałažeńniaŭ zakona i tamu nie mohuć atrymlivać dazvoły na žycharstva na niekatorych padstavach, dastupnych hramadzianam inšych krain, za vyklučeńniem Rasii.
Asobnyja praviły tyčacca adukacyi. Biełarus moža atrymać DNŽ u Łatvii, kali jaho znachodžańnie ŭ krainie źviazanaje z abmienam studentami pamiž akredytavanymi navučalnymi ŭstanovami.
U vypadkach, jakija niepasredna nie praduhledžanyja zakonam, kali hramadzianin Biełarusi padaje zajavu na časovy DNŽ terminam da troch hadoŭ, dazvoł moža dać ministr unutranych spraŭ. Heta mahčyma, kali vydača dazvołu adpaviadaje mižnarodna-pravavym normam abo źviazanaja z humanitarnymi mierkavańniami.
Dla hramadzian Rasii abmiežavańniaŭ jašče bolš. U pryvatnaści, jany nie mohuć atrymlivać DNŽ u jakaści kiraŭnika kampanii, inviestara, udzielnika startapa abo zvyčajnaha najomnaha rabotnika. Pry hetym dla ich zachoŭvajecca mahčymaść atrymlivać błakitnuju kartu ES, pierajazdžać u miežach hrupy kampanij i ŭdzielničać u navukova-daśledčych prajektach.
Hramadzianie Rasii taksama nie mohuć atrymać vizu z pravam na pracu abo vizu dla addalenaj pracy, za vyklučeńniem siezonnaj pracy.
Adnoj z metaŭ novaha zakona nazyvajecca ŭzmacnieńnie kantrolu za pracaŭładkavańniem i nielehalnaj mihracyjaj. U dakumiencie ŭličvajucca i mihranty, jakija mahli trapić u Łatviju biez zakonnych padstaŭ dla ŭjezdu.
Novy zakon taksama ŭvodzić adkaznaść za dapamohu ŭ niezakonnym pierasiačeńni miažy. Heta tyčycca ŭ tym liku pieravozčykaŭ, jakija za hrošy zabirajuć nielehalnych mihrantaŭ kala miesca niezakonnaha pierasiačeńnia miažy i dastaŭlajuć ich u nasielenyja punkty.
Fizičnaj asobie, jakaja pieraviezła ŭ Łatviju čałavieka bieź nieabchodnych dakumientaŭ, pahražaje štraf ad 200 da 400 bazavych adzinak za kožnaha pieraviezienaha. Dla jurydyčnaj asoby štraf składaje ad 840 da 1400 bazavych adzinak za kožnaha čałavieka.
Ciapier čytajuć
Ceny na kvatery ŭ «Minsk-Śviecie» padajuć, a ŭ Minsku — rastuć. Sumnyja pierśpiektyvy dla rajona?3
Kamientary