Brescki hubiernatar prapanavaŭ pierastać impartavać zamiežnyja jabłyki
Staršynia Bresckaha abłvykankama Piatro Parchomčyk prapanavaŭ nieadkładna spynić uvoz u Biełaruś impartnych jabłykaŭ. Pra heta jon zajaviŭ u efiry telekanała STB, arhumientavaŭšy takuju prapanovu sioletnim dobrym uradžajem i vysokaj jakaściu biełaruskaj sadaviny.
U Bresckaj vobłaści sioleta raźličvajuć sabrać ad 135 da 150 tysiač ton jabłykaŭ. Heta prykładna ŭtraja bolš, čym letaś. Na rehijon tradycyjna prypadaje kala pałovy ŭsiaho zboru jabłykaŭ u Biełarusi.
Jabłynievyja sady ŭ Bresckaj vobłaści zajmajuć kala 8 tysiač hiektaraŭ. Za apošnija piać hadoŭ tut zakłali kala 1,5 tysiačy hiektaraŭ novych sadoŭ. Značnuju častku płoščaŭ addali pad poźniezimovyja sarty, jakija mohuć zachoŭvacca praciahły čas. U 2026 hodzie płanujecca zakłaści jašče 512 hiektaraŭ sadoŭ.
Piatro Parchomčyk adznačyŭ, što biełaruskija jabłyki majuć roznyja sarty i dobryja smakavyja jakaści. Jon zajaviŭ, što pry takich abjomach uradžaju ŭvoz zamiežnych jabłykaŭ u krainu nieabchodna terminova prypynić.
Pytańnie ab skaračeńni impartu jabłykaŭ uzdymajecca ŭładami ŭžo nie ŭpieršyniu. Raniej za pierachod na biełaruskuju pradukcyju vykazvalisia i ŭ Ministerstvie sielskaj haspadarki i charčavańnia.
Sioleta ŭ Biełarusi nie było mocnych hradaŭ i rezkich ekstremalnych vahańniaŭ tempieratury, tamu ŭłady raźličvajuć na dobry ŭradžaj. Tysiačy hiektaraŭ sučasnych sadoŭ z kropielnym palivam i zimovymi sartami, jakija karystajucca popytam, jak spadziajucca čynoŭniki, pavinny dazvolić zabiaśpiečvać biełaruski rynak jabłykami nie tolki z vosieni da maja, ale i da novaha ŭradžaju.
Kamientary