Viktar Prakapienia pra «Chartyju'97»: Škoda imidžu vidavočna ŭsim

Pazaŭčora ŭ Biełarusi byŭ zabłakavany sajt «Chartyja'97». Ja chacieŭ napisać hety zvarot u kancy minułaha hoda, kali byŭ zabłakavany sajt «Biełaruski partyzan», ale nie paśpieŭ dapisać, bo sajt adnaviŭ pracu na praciahu niekalkich dzion. Da hetaha ŭ krainie 20 hadoŭ byŭ całkam svabodny internet, kali nie ličyć karotkaterminovyja błakavańni sajtaŭ padčas pratestnych mierapryjemstvaŭ.

U staražytnahreckaj mifałohii ŭ hidry, kali joj adsiakali adnu hałavu, na jaje miescy vyrastała try. Na moj pohlad, heta samaja ŭdałaja mietafara dla tłumačeńnia taho, što budzie adbyvacca dalej.

1. Niama lepšaj rekłamy sajtaŭ, čym ich błakiroŭka. Dośvied błakavańnia sajtaŭ u dziaržustanovach pakazvaje, što błakavanyja sajty karystajucca ŭ čynoŭnikaŭ vialikaj papularnaściu: prosta dostup da ich adbyvajecca nie z rabočych kampjutaraŭ, a z mabilnych telefonaŭ. Kab abyści błakavańnie, treba pastavić inšuju prahramu dla dostupu ŭ internet, naprykład Tor ci Opera. Navat piensijanier spraŭlajecca z hetaj zadačaj mienš čym za 5 chvilin. Niama sensu ŭ tym, kab siekčy hałovy hidry ci tušyć pažar bienzinam.

Zabłakavany sajt, pavialičyŭšy svoj trafik za košt takoj rekłamy, chutčej za ŭsio, jašče bolš radykalizujecca, hetak ža jak radykalizujecca jaho aŭdytoryja.

Google trends, choć i nie samy čysty instrumient dla vymiareńnia, užo pakazvaje rost papularnaści zabłakavanaha sajta na 20%.

2. Mahčymy pierachod vialikaj kolkaści hramadzian na prahramy nakštałt Tor abo Opera pryviadzie da ŭskładnieńnia pracy pa rasśledavańni złačynstvaŭ, u jakich vykarystoŭvaŭsia internet (ciapier takich usio bolš) — dziaržava nie zmoža bačyć nie tolki kali hramadzianie naviedvajuć zabłakavanyja sajty, ale i lubyja inšyja. Vialikaja kolkaść apieratyŭna-vyšukovych mierapryjemstvaŭ stanie niemahčymym.

Jak vynik — kali raskryvać złačynstvy stanie składaniej, to złačynnaść moža vyraści.

U vypadku, kali sapraŭdy treba budzie zakryć dostup da niejkich sajtaŭ padčas niejkaha «pažaru», a bolšaść hramadzian vykarystoŭvaje Tor dla dostupu da internetu, zakryć dostup da hetych sajtaŭ stanie niemahčyma.

3. Sajty siońnia mohuć vykładvać ŭvieś svoj kantent u sacyjalnych sietkach, naprykład instant articles u FB. U vyniku ŭsio bolšaja kolkaść ludziej pierachodzić u sacyjalnyja sietki dla atrymańnia infarmacyi, što maje supraćlehły efiekt ad taho, što maje na ŭvazie błakavańnie sajta.

4. Błakavańnie ŚMI biez papiaredžańnia i biez adviadzieńnia času na likvidacyju parušeńniaŭ — heta ŭskładnieńnie mižnarodnych adnosin. Škoda imidžu vidavočna ŭsim, pra jaje navat niama sensu pisać. U apošni čas my prarabili vialikuju pracu z amierykanskimi jurystami i łabistami, kab razbłakavać apłatnuju sistemu Paypal u Biełarusi. Biełarusy nie mohuć skarystacca hetaj apłatnaj sistemaj, u hetym śpisie my pobač ź Zimbabve, Libieryja i Paŭnočnaj Karejaj.

Raypal nieabchodny, kab maleńkim kampanijam było lahčej pracavać, a vialikija i tak mohuć pracavać praz svaje filijały. U vypadku praciahu situacyi z błakavańniem sajtaŭ heta niemahčyma.

5. U sacyjalnych sietkach vykazvajuć mierkavańni, što prezident asabista addaŭ zahad ab błakavańni.

Bolš vierahodnym mnie zdajecca nastupny scenar: niejkaje viedamstva pastaviła svoj intares vyšej za intares dziaržavy. Atrymać 100 tysiač dalaraŭ na bałans svajho viedamstva, kali dziaržava straciła 100 miljonaŭ — heta kłasika žanru.

Moža prajści ŭsiaho paru tydniaŭ, i kolkaść naviedvańniaŭ na zabłakavanym sajcie vyraście. Ale hetaja naviedvalnaść nie budzie adlustroŭvacca ŭ spravazdačach biełaruskich pravajdaraŭ. Zatoje hetaje viedamstva zmoža paviedamić pra toje, što pa ich statystycy nichto ŭ Biełarusi zabłakavany sajt nie naviedvaje. U vyniku asobnaje viedamstva ŭ plusie, a dziaržava paniesła značnyja straty. Heta tłumačeńnie mnie zdajecca najbolš vierahodnym.

• 0
• 0
• 0
• 0
• 0
• 0
• 0
• 0