Jak eskortnica z Babrujska nieśviadoma vykryła sumnieŭny adpačynak rasijskaha top-čynoŭnika z aliharcham FOTY
Rasijski apazicyjanier Alaksiej Navalny vykłaŭ novaje rasśledavańnie. Jano pryśviečana suviazi aliharcha Aleha Dzierypaski i top-čynoŭnika Siarhieja Prychodźki, šeraha kardynała rasijskaj palityki. A nieśviadoma vykryła heta ŭsio niejkaja «Naścia Rybka» — dziaŭčyna niezrazumiełaj prafiesii rodam z Babrujska.
Što zdaryłasia?
Navalny znajšoŭ paćvierdžańni sumiesnaha adpačynku aliharcha Aleha Dzierypaski i vice-premjera Siarhieja Prychodźki.
Dzierypaska — miljarder, dyrektar kampanii «Rusał», jakaja zajmajecca aluminijem. Prychodźka — namieśnik staršyni ŭrada, kiraŭnik Aparata ŭrada. Raniej jon byŭ pamočnikam Barysa Jelcyna i Uładzimira Pucina.
Navalny śćviardžaje, što jany razam ź dziaŭčatami z eskort-ahienctva katalisia na jachcie da bierahoŭ Narviehii ŭ žniŭni 2016 hoda.
A pryčym tut dziaŭčyna? A mienavita praź jaje instahram i knihu aktyvisty Navalnaha i vyjšli na historyju.
Chto takaja Naścia Rybka?
Uradženka Babrujska Anastasija Vašukievič daŭno ŭžo robić sabie karjeru ŭ Maskvie, nie hrebujučy ničym. Spačatku jana źviazałasia ź ci to pornarežysioram, ci to «seks-trenieram» Aleksam Łeśli, paśla čaho «pajšła pa rukach».
U ramkach «seks-treninhu» Naścia zajmałasia seksam na nabiarežnaj ź pieršym sustrečnym (za što adsiedzieła 7 sutak). Paśla pikietavała amierykanskuju ambasadu, prapanujučy «pieraspać z Charvi Vajnštejnam».
Naviedvała jana i štab Navalnaha — u miežach «seks-palavańnia», jak kazała sama jana, a praściej farmulujučy — u miežach dyskredytacyi.
Što ž da historyi ź Dzierypaskam i Prychodźkam, to ŭsio banalna. Naścia «spaliła» ich, chvalačysia svaim bahatym žyćciom u sacsietkach.
Dzierypasku i Rybku zaŭvažyli razam užo daŭno. Jana sama kazała, što miljarder ładziŭ kastynh dziaŭčat «nie tolki dla łožka, dla sustreč, dla tusovak». Navat kali jana siadzieła na sutkach, to ŭ instahramie dziaŭčyny źjaviŭsia post z zaklikam znajści Aleha Dzierypasku — maŭlaŭ, joj patrebnaja dapamoha.
Dziaŭčyna apublikavała ŭ instahramie zdymki, dzie jana adpačyvaje na jachcie Dzierypaski.
Akramia taho, jana vykładała i kavałki videa, i aŭdyjozapisy. Pa ich Navalny vyličyŭ nie tolki haściej «kruiza», ale i jachtu, i maršrut, pa jakim padarožničali aliharch i čynoŭnik. Dabiralisia da jachty jany, najchutčej, na pryvatnym samalocie Dzierypaski.
Va ŭsim cyvilizavanym śviecie padobnaje ličycca chabaram.
Paśla aktyvisty Navalnaha pacikavilisia Prychodźkam bolš pilna. Vyśvietliłasia, što čynoŭnik, jaki nikoli nie zajmaŭsia biznesam, maje dom za horadam płoščaj 1500 kvadratnych mietraŭ na ŭčastku 3 hiektary i dźvie kvatery ahulnaj płoščaj 350 kvadrataŭ. Na jakija hrošy jon heta moh nabyć — nieviadoma.
Ale ž mała taho. Jak vyśvietliłasia, u svajoj knizie «Dziońnik pa spakušeńni miljardera, abo Kłon dla aliharcha» Rybka vyvieła i Dzierypasku, i Prychodźku.
Jana paznačyła ich psieŭdanimami, adnak pryviała realnyja bijahrafičnyja źviestki pra kožnaha, zrabiŭšy hierojaŭ paznavalnymi. U vyniku z knihi možna daviedacca padrabiaznaści intymnych adnosinaŭ z «Zołatavym» (Dzierypaskam) i niekatoryja momanty pra seks z «Tatam» (tak nazvany hieroj Prychodźki).
Paśla vychadu raśledavańnia Navalnaha Naścia Rybka padziakavała jamu ŭ instahramie: «Dziakuj, mały! Choć mnie i ŭsio roŭna na tyraž». A taksama zapeŭniła, što Pucin nibyta ŭžo čytaŭ jaje «miemuary».
Žyvahłod pryznała rassyłku praz čat-bot «Sumlennych ludziej» karystalnikam u Biełarusi: Ale nie ŭ pracoŭny čas, paśla 18 hadzin8
Kamientary