Byłyja palitviaźni pra prezydenckija vybary

«Naša Niva» prapanavała adkazać im na nastupnyja pytańni: 1. Ci musić apazycyja ŭdzielničać u vybarach? 2. Jakaja pavinna być schiema vyznačeńnia kandydata (‑aŭ) ad apazycyi? 3. Chto na siońniašni momant padajecca najbolš realnych pretendentam dla ŭdziełu ŭ vybarach?

Mikoła Astrejka: «U vybarach treba ŭdzielničać adnaznačna. Dla nasielnictva prezydenckija vybary dosyć značnaja padzieja i prymusić ich bajkatavać budzie amal niemahčyma. Uvohule, bajkot vybaraŭ moža aznačać śmierć dla palityčnaj apazycyi. Naŭrad ci z boku apazycyi nam atrymajecca pabačyć adzinaha kandydata. Užo siońnia vielmi šmat žadajučych pasprabavać svaje siły. Jak na moj pohlad, to kandydata varta vyznačać praz stupień jahonaj viadomaści siarod nasielnictva. Mahčyma, šlacham sacyjalahičnych apytańniaŭ. Vyznačać kandydata ŭnutry samoj apazycyi mnie padajecca nia vielmi metazhodnym, bo vielmi časta ŭ padobnych vypadkach heta nie adlustroŭvaje realnych nastrojaŭ ludziej. Jak na moj pohlad, to siarod siońniašnich lideraŭ apazycyi naŭrad ci niechta zmoža skłaści realnuju kankurencyju Łukašenku».

Enira Branickaja: «Choć vybary i projduć užo praz dva hady, ale varta pačakać jašče paŭhodu. Pahladzieć, jak budzie raźvivacca sytuacyja za hety čas. Tamu pakul nia budu śpiašacca z peŭnymi paradami».

Źmicier Daškievič: «Biezumoŭna musić być paŭnavartasny ŭdzieł. Prezydenckaja kampanija, u adroźnieńni ad parlamenckaj, daje nadzieju i vieru ŭ kankretnyja pieramieny. Dumaju, što vyjdziem na dvuch mocnych kandydataŭ ad pravaha i levaha flanhu. Najchutčej, što vyznačeńnie adbudziecca šlacham pieramovaŭ tych ludziej, jakija ŭžo zajavili pra svaje ambicyi. Na siońniašni momant jość niekalkich hodnych kandydataŭ — heta i Milinkievič, i Statkievič. Adnak havaryć pra niejkaha kankretnaha čałavieka jašče rana».

Viktar Ivaškievič: «Liču, što siońnia demakratyčnym siłam varta skancentravacca na źmienach vybarčaha zakanadaŭstva. Kali pradstaŭnikoŭ kandydataŭ nia buduć dapuskać va ŭčastkovyja kamisii, kali nia spynicca praktyka daterminovaha hałasavańnia, to sens udziełu takich vybarach moža źniknuć. U hetym planie cisk na režym jašče vyhladaje mahčymym, bo choć Zachad uznaviŭ svaje kantakty ź Biełaruśsiu, ale vybary byli pryznanyja niedemakratyčnymi. Dumaju, što ciaham bližejšaha hodu budzie abvieščany nieaficyjny konkurs siarod mahčymych kandydataŭ ad apazycyi. Hałoŭnym kryterami adboru tut pavinny stać ludzkija i finansavyja resursy. Mahčyma, što ŭžo ciapier varta pačynać farmiravańnie niejkich inicyjatyŭnych hrup. Nia mienš važna budzie, chto zdoleje zdabyć padtrymku presy. Ad BNF siońnia najbolš realny kandydat Lavon Barščeŭski, druhi kandydat ad pravaha flanhu — Alaksandar Milinkievič. Bližejšym časam i pavinna vyznačycca, chto ź ich bolš hodny pradstaŭlać apazycyjnymi siły. Ź levaha flanhu najchutčej budzie Siarhiej Kalakin ci Alaksandar Kazulin, kali z apošniaha zdymuć sudzimaść».

Andrej Kim: «Da ŭdziełu ŭ prezydenckich vybarach varta pačać rychtavacca ŭžo zaraz. Mnie padajecca, što najlepšym musić być varyjant adzinaha kandydata, jaki byŭ minułym razam. Na hetuju rolu siońnia pretendujuć try palityki — Milinkievič, Kazulin i Kalakin. Usie jany dastatkova ambicyjnyja i majuć dastatkova resursaŭ. Vyznačać adzinaha na Kanhresie było b nia vielmi pravilna. Najchutčej, što heta pavinny vyznačyć sami kandydaty, a taksama ich kamandy. Adzinym musić być čałaviek, jaki zadavalniaje, kali nia ŭsich, to bolšaść».

Andrej Klimaŭ: «Eŭrasajuz užo zrabiŭ svoj vybar na karyść Łukašenki, tamu apazycyi łavić užo niama čaho na hetych vybarach. Jak na moj pohlad, to dobryja šancy moh by mieć kandydat, jaki vyjdzie ni ź siońniašniaj abjadnanaj apazycyi, ni z uładnaj namenklatury. Taki sabie česki prykład, jaki byŭ u ich z Vacłavam Haŭłam. Novy kandydat moža vyznačycca tolki šlacham niejkaha novaha stanovišča ŭ krainie. Jašče adzin varyjant — heta mižnarodny arbitar Biełarusi. Taki, jakim siońnia vystupaje Alaksandar Milinkievič. Jon usprymajecca na Zachadzie i ŭ Maskvie nia prosta pradstaŭnikom apazycyi, a pradstaŭnikom apazycyjnaha elektaratu. Jak na moj pohlad, to Milinkievič moh by być dobrym kandydatam, kali b u svoj čas nia staŭ adzinym, a taksama, kab byŭ krychu maładziejšym».

Michaił Marynič: «Najpierš pavinna być źmienienaje vybarčaje zakanadaŭstva. Kali heta dabicca nie atrymajecca, to i ci varta apazycyi iści na pavadku va ŭładaŭ. Milinkievič i Kazulin siońnia vyhladajuć najbolš pryvabnymi. Asabista ja bolš schilny padtrymlivać druhoha».

Siarhiej Parsiukievič: «Udzielničać, kaniečnie, varta. Ciapier prosta treba pačynać vypracoŭvać ahulnuju stratehiju dziejańni, bo bieź jaje tołku budzie mała. Zrešty, na siońniašni dzień nia tak mnoha palitykaŭ zdolnyja pravieści paŭnavartasnuju kampaniju, mabilizavać ludziej, sabrać nieabchodnuju kolkaść podpisaŭ. Pry vyznačeńni kandydataŭ dobryja ŭsie metady: i damova miž samimi palitykami, i sacyjalahičnyja apytańni, i novy Kanhres demakratyčnych sił. Milinkievič i Kazulin praciahvajuć razhladacca mnoju, jak najbolš realnyja kandydaty. Naŭrad niechta padros za hety čas za ichnymi śpinami».

Artur Fińkievič: «Liču, što ŭ prezydenckich vybarach udzielničać treba ŭ lubym vypadku. Jašče nikoli vybary ŭ krainie nie prachodzili nie bazalternatyŭnaj asnovie, biez pradstaŭnikoŭ apazycyi. Kali my havorym pra bajkot parlamenckich vybaraŭ, to heta možna rastłumačyć tym, što pałata ničoha nie vyrašaje ŭ žyćci krainie, maryjanetkavaje ŭtvareńnie. Na prezydenckija vybary treba iści nia tolki dla taho, kab danieści svaju pazycyju ludziam, ale kab pieramahać. Dumaju, što šancy jość. Vyjści na adzinaha kandydata budzie vielmi składana. U nas jość roznyja palityčnyja siły, jakija pradstaŭlajuć roznyja intaresy. Usio ž jašče ranavata vyznačacca pa persanalijach, dva hady dastatkovy termin. Niachaj starejšyja tavaryšy sami vyznačać najbolš hodnych miž saboj, a moładź vyrašyć, ci adpaviadajuć jany ich kryteram. Na siońnia ja baču čatyroch imaviernych kandydataŭ ad apazycyi — Alaksandar Milinkievič, Andrej Sańnikaŭ, Anatol Labiedźka i Siarhiej Kalakin».

• 0
• 0
• 0
• 0
• 0
• 0
• 0
• 0