Ci maje sens vajna z celulitam?
Žyŭ-byŭ na śviecie strašny źvier, jakoha bajalisia ŭsie žančyny, i imia jamu było Celulit. Šmat hadoŭ jany ź im zmahalisia, praklinali, prydumlali roznyja zmovy i antycelulitnyja abrady, navat pa-dobramu prasili syści, ale jon byŭ niazłomny…
Ale adnojčy ludziej asianiła: celulit im nie pahražaje, žyvie sabie cichieńka i nikoha nie čapaje. Tolki paśla hetaha šmathadovaja vajna skončyłasia, usie žyli doŭha i ščaśliva. Kaniec.
Kazki kazkami. Ale davajcie raźbiaromsia z usimi bakami celulitnaj historyi i vyśvietlim, čamu jon, nasamreč, u čałaviečaj pryrodzie, a zmahacca ź im, jak ź niejkaj strašnaj chvarobaj, niedarečna.
Dapamoža nam u hetym piersanalnaja fitnes-instruktarka Valeryja Kazakievič.
Valeryja Kazakievič.
Pra termin
Sam termin celulit źjaŭlajecca ŭ korani niapravilnym vyznačeńniem dla našych buharkoŭ na ściohnach, pakolki maje sufiks «-it». U miedycynie jaho zvyčajna vykarystoŭvajuć dla abaznačeńnia zapaleńniaŭ kštałtu branchitu, sinusitu, hajmarytu i hetak dalej. U pieravažnaj bolšaści celulit — heta prosta tłušč pad skuraj.
Jak heta adbyvajecca? Kolkaść tłuščavych kletak łakalna pavialičvajecca, u tłuščavaj tkancy parušajecca mikracyrkulacyja. Kletki pierastajuć vydzialać pradukty svajoj žyćciadziejnaści, zatoje z padvojenaj siłaj nazapašvajuć tłušč. Ź imi adbyvajecca toje ž samaje, što ŭ takich vypadkach adbyvajecca ź ludźmi, — jany taŭściejuć.
Pa statystycy, celulit u roznych stadyjach jość amal u 80—90 pracentaŭ žančyn. U mužčyn — našmat radziej. Najaŭnaść tłuščavaj prasłojki — całkam narmalnaja situacyja dla žančyny. Padskurny tłušč udzielničaje ŭ abmienie rečyvaŭ, rehuluje pracu repraduktyŭnaj sistemy i źjaŭlajecca paŭnavartasnym endakrynnym orhanam.
Čamu my zmahajemsia z celulitam?
Ideja pra toje, što heta niepryhoža i strašna, źjaviłasia ŭ rozumach žančyn nie tak daŭno — mienš čym paŭstahodździa tamu. Kab pierakanacca ŭ hetym, spytajcie ŭ svaich babul, ci ŭvohule viedali jany pra takuju «prablemu», jak celulit? Adkaz, sto adsotkaŭ, budzie admoŭnym.
Celulit jak prysud «naradziŭsia» ŭ 1973 hodzie ŭ ZŠA, dziakujučy Nikol Ronsar, jakaja zapuściła takuju mahutnuju pijar-akcyju pasłuh svajho sałona pryhažości, što na šmat hadoŭ joj sapraŭdy ŭdałosia pierakanać žančyn u tym, što celulit — heta prablema, ź jakoj treba zmahacca.
Ronsar navat vypuściła knihu «Celulit: hetyja kamiački, šyški i buharki, ad jakich vy nie mahli pazbavicca raniej», znajšła madel bieź cielulitu i jaje fota źmiaściła na vokładku, bo fotašop tady jašče nie isnavaŭ. Volaj losu publikacyja trapiła na vočy časopisu Vogue, supracoŭniki adrazu ž adrecenzavali knižku, a dla miljona žančyn, jak viadoma, heta vydańnie źjaŭlałasia (a dla kahości i zastajecca) ledź nie druhim pa aŭtarytetnaści paśla Biblii.
Vytvorcy kaśmietyki, adzieńnia, elektrapryboraŭ, spartyŭnych trenažoraŭ i inšyja sałony pryhažości — usie, chto svoječasova zrazumieŭ, što ad hetaha piraha treba terminova ŭchapić svoj kavałak, nieadkładna padtrymali i raspaŭsiudzili ideju pra žudasny celulit. Karaciej kažučy, baraćba z celulitam, toje, što siońnia my majem dziasiatki pracedur, kremaŭ i skrabaŭ ad hetaj «chvaroby», — heta čyściejšy pradukt markietynhu.
Rassłabciesia, celulit jość va ŭsich
U bolšaj ci mienšaj stupieni, ale jaho maje i Kim Kardašjan i ŭ Rozi Chantynhtan-Uajtli, i fitnes-madeli, i insta-dzivy. Prosta pracent tłušču ŭ ciele va ŭsich rozny.
Ale celulit — heta nie tolki pakazčyk najaŭnaści tłuščavaj prasłojki ŭ ciele. Heta jašče historyja pra ahulny stan žanočaha zdaroŭja, pravilnuju vypracoŭku harmonu estradyjołu, zatrymku vady ŭ arhaniźmie, pruhkaść i ełastyčnaść skury, najaŭnaść myšačnaj masy, hienietyčnaja schilnaść. Ad usich hetych faktaraŭ zaležyć, jak budzie vyhladać vaš celulit, niezaležna ad strełki na vahach.
Što rabić?
Pa-pieršaje, supakoicca, nie niervavacca, nikudy nie śpiašacca i nie čakać, što vašy ściohny paśla niekalkich pracedur rezka stanuć jak na vokładcy časopisa.
Pa-druhoje, zrazumieć, što heta nie prablema i nie padstava abmiažoŭvać siabie choć u niečym.
Pa-treciaje, adekvatna aceńvać stupień celulitu: kali vy bačycie jaho tolki padčas ściskańnia skury, to rassłabciesia i nie prydumlajcie sabie lišnija prablemy — u vas jaho niama. A voś kali staicie roŭna pierad lusterkam i nazirajecie «kurahu» zamiest «areška», to tut užo maje sens niešta rabić (pa vašym žadańni).
Zajmiciesia sportam
Jak by banalna heta ni hučała, ale heta sapraŭdy pracuje: čym bolš u vas myšcaŭ, tym mienš budzie celulitu.
Akramia taho, fizičnyja praktykavańni palapšajuć limfatok, narmalizujuć krovazvarot, vyklikajuć vykid takich lipalityčnych harmonaŭ, jak somatatrapin, adrenalin i testasteron, nasyčajuć kroŭ kisłarodam i hetak dalej. A ŭsie hetyja pracesy adkaznyja za pravilny abmien rečyvaŭ, tonus skury i pierapracoŭku tłušču z kletak u enierhiju.
Źnižajcie pracent tłušču
U hetym dapamoža vyklučna charčavańnie z deficytam kałoryj, a nie niejkija tam kremy, elektrastymulatary, masažy, čaroŭnyja alei abo jahady.
Ale tut taksama varta być aściarožnaj i viedać mieru: kali zališnie schudniejecie, to razam z tłuščam syjduć myšcy i zdarovy harmanalny fon, a značyć, cieła ŭsio roŭna budzie vyhladać nibyta šaryk, što zduŭsia. Aptymalnaja chutkaść pachudzieńnia, kali vam užo mocna chočacca, heta 1—2 kh u miesiac.
Źviarnicie ŭvahu na vaš racyjon
Pakłapaciciesia pra toje, kab u vašym racyjonie byli tolki naturalnyja pradukty, bo ŭsie pramysłovyja — načynienyja kansiervantami, farbavalnikami i inšymi niepatrebnymi dadatkami, jakija spryjajuć pavieličeńniu tłuščavych kletak jašče i za košt taksinaŭ.
Jak by paradaksalna heta ni hučała, ale dadajcie ŭ svoj racyjon tłuščy: marskaja ryba, arechi, aliŭki, masła, siemki, avakada… Usio heta — krynicy polinienasyčanych tłuščaŭ, dastatkovaje spažyvańnie jakich spryjaje nie tolki pruhkaści i ełastyčnaści skury, ale i tamu, što kletki bolš achvotna buduć addavać nazapašany tłušč.
Taksama ŭsie miedyki, dyjetołahi i kaśmietołahi adnahałosna śćviardžajuć, što dastatkovaje spažyvańnie zielaniny, harodniny, jahad i sadaviny akazvaje dabratvorny ŭpłyŭ na našu skuru za košt najaŭnaści tam raślinnaj klatčatki, vitaminaŭ i antyaksidantaŭ.
Kidajcie škodnyja zvyčki
Usim viadoma, što ałkahol niehatyŭna adbivajecca na pracy piečani. A jana jakraz adkazvaje za vyviadzieńnie praduktaŭ raspadu z arhanizma. Kali hetaha nie adbyvajecca, to arhanizm usio heta adpraŭlaje na zachoŭvańnie ŭ tłuščavyja kletki, jakija pavialičvajucca ŭ pamiery nie tolki za košt tłušču, ale i za košt taksinaŭ.
Nikacin u svaju čarhu spryjaje pamianšeńniu kolkaści kisłarodu ŭ kryvi, a praces pierapracoŭki tłušču ŭ enierhiju adbyvajecca tolki ź jaho udziełam. Adpaviedna, mienš kisłarodu — mienš tłušču syjdzie z kletki.
Zdajcie analizy
Kali vy sapraŭdy daŭno zajmajeciesia sportam, pravilna charčujeciesia, dastatkova śpicie, a celulitu stanovicca tolki bolš, heta moža być surjoznym zvanočkam pra toje, što ŭ arhaniźmie jość harmanalny dysbałans. Nie staŭcie sabie dyjahnaz samastojna, źviarniciesia da endakrynołaha, kab jon adpraviŭ na zdaču analizaŭ i pryznačyŭ lačeńnie.
Dadatkovyja pracedury
Masaž, naviedvańnie łaźni i abhortvańnie — usio heta taksama dabratvorna adbivajecca na limfatoku, tonusie vašaj skury i moža dapamahčy palepšyć jaje źniešni vyhlad. Ale pracent tłušču ŭ skury heta nie źnizić i ciahlicy nie padkačaje, tamu ŭsie srodki dobryja vyklučna ŭ kompleksie.
Hałoŭnaje, pamiatajcie: celulit — heta nie chvaroba, ad jakoj pamirajuć. Heta chitry instrumient manipulacyi. I stavić na sabie kryž tolki tamu, što niechta skazaŭ, što apielsinavaja skurka na vašym ciele — niepryhoža, saromiecca praz heta raspranacca i nasić šorty i kupalniki — jak minimum nierazumna.
Kamientary