Kandrusievič u Budsłavie pryhadaŭ stahodździe BNR i zaklikaŭ da duchoŭnaj pieramieny
Budsłaŭski fest sabraŭ tysiačy ludziej, niahledziačy na praliŭny doždž.
Paśla pracesii sa śviečkami celebracyju Eŭcharystyi apoŭnačy ŭznačaliŭ arcybiskup Tadevuš Kandrusievič, Mitrapalit Minska-Mahiloŭski.
Jaho kazań była pryśviečanaja maralnamu stanu sučasnaha čałavieka i asabliva maładoha pakaleńnia.
«Z adnaho boku, my ciešymsia svabodaj vieravyznańnia, a ź inšaha pieražyvajem novyja prajaŭleńni ateizmu, zaniadbańni ŭ žyćci pavodle ducha Jevanhiella, maralnaj razbeščanaści, skažeńnia paniaćcia Boham ustanoŭlenaha instytutu siamji… Naš narod zdaŭ ekzamien, zachavaŭšy vieru ŭ časy hanieńniaŭ. My vytryvali ŭ vyprabavańni niesvabodaj, ale ci vytryvajem vyprabavańnie svabodaj? Hetaje pytańnie datyčycca kožnaha z nas i asabliva moładzi, jakaja znachodzicca na skryžavańni šlachoŭ i časta nie viedaje, jaki ź ich vybrać», — adznačyŭ Tadevuš Kandrusievič.
Źviartajučysia z Nacyjanalnaha sanktuaryja Apiakunki Biełarusi da ŭsich ludziej našaj krainy, arcybiskup Kandrusievič pramoviŭ: «Nam i našamu narodu, jaki sioleta adznačaje 100-hodździe abviaščeńnia Biełaruskaj Narodnaj Respubliki — faktu, jakoha nielha ihnaravać, bo heta častka našaj historyi, — nieabchodnaja duchoŭnaja pieramiena.
Raspačać jaje nieabchodna ź siabie, nie šukajučy vinavatych. Nieabchodna na šlachu ščyraha dyjałohu šukać šlachoŭ vyrašeńnia isnujučych prablem našaha hramadstva. Nie kampramisu, a dyjałohu, bo kali kampramis maje na mecie atrymać «bolšy kavałak torta», to meta dyjałohu — dasiahnieńnie supolnaha dabra», — cytuje słovy arcybiskupa Kandrusieviča catholic.by.
Śviata Maci Božaj Budsłaŭskaj — adno z najmaštabniejšych i najuračyściejšych relihijnych śviataŭ krainy.
Jano štohod u pačatku lipienia źbiraje da Nacyjanalnaha sanktuaryja ŭ miastečka Budsłaŭ Miadzielskaha rajona dziasiatki tysiač viernikaŭ roznych kanfiesij, siudy iduć pałomniki z usioj krainy.
Asabliva ŭražvaje vidovišča načnoj šmattysiačnaj pracesii z staražytnym abrazom Maci Božaj.
Doždž, darečy, kažuć staryja ludzi, taksama abaviazkovy elemient festu: «Abraz pavinien abmycca».
U Rahačovie try školnicy źbili 11-hadovaha chłopčyka, ściahnuli ź jaho trusy i imitavali seks7
Kamientary