Sud Haradockaha rajona apraŭdaŭ 36-hadovaha aniestezijołaha-reanimatołaha, jakoha abvinavačvali ŭ nienaležnym vykanańni prafiesijnych abaviazkaŭ miedycynskim rabotnikam, što paciahnuła pa nieaściarožnaści śmierć pacyjenta, paviedamiła TUT.BY aficyjny pradstaŭnik Viciebskaha abłasnoha suda Natalla Płatonienka.
— Abvinavačany pryznany nievinavatym i apraŭdany za niedakazanaściu jaho udziełu ŭ ździajśnieńni złačynstva, — dadała Natalla Płatonienka.
Pavodle materyjałaŭ śledstva, doktar, robiačy pacyjentu punkcyju i kateteryzacyju pravaj padklučyčnaj vieny, prakałoŭ vastryjom ihołki druhuju — procilehłuju, ścienku hetaj vieny, a taksama pryścienačnuju pleŭru. Vialikaja strata kryvi pryviała da spynieńnia serca i śmierci pacyjenta.
— Ja dobra viedaju padrabiaznaści hetaj spravy, — raspavioŭ tut.by kaleha abvinavačanaha, doktar Haradockaj centralnaj rajonnaj balnicy, dzie i adbyŭsia latalny vypadak. — Toj pacyjent mieŭ śmiarotnaje atručeńnie lekavym preparatam fienabarbitał, bo prymaŭ karvałoł z metaj uzmacnieńnia efiektu ałkaholu. Jon mieŭ chraničnuju ałkaholnuju zaležnaść i pastupiŭ u balnicu ŭžo ŭ komie i ź ciažkimi ŭskładnieńniami atručvańnia.
Pavodle jaho słoŭ, doktar, jakoha abvinavačvali ŭ śmierci mužčyny, raspačaŭ usie miery pa vyratavańni žyćcia pacyjenta, u pryvatnaści, vykanaŭ kateteryzacyju padklučyčnaj vieny. Ale, niahledziačy na ŭsie namahańni, čałaviek pamior ad śmiarotnaha atručvańnia fienabarbitałam.
— Kateteryzacyja padklučyčnaj vieny — vielmi składanaja manipulacyja, jakaja vykonvajecca ŭślapuju, i tamu pry joj taksama mohuć uźnikać ŭskładnieńni, asabliva ŭ takich pacyjentaŭ, - adznačyła krynica. - Śledčy kamitet, nie raźbirajučysia daskanała ŭ tonkaściach, adrazu paśla śmierci pačaŭ kryminalnuju spravu. Na samaj ža spravie lekar vykanaŭ usie mahčymyja dziejańni pa vyratavańni pacyjenta, vyjaŭleńniu ŭskładnieńniaŭ, ich dyjahnostycy i pa lačeńni. Heta, na ščaście, i było dakazana ŭ sudovym razhladzie.
Ciapier čytajuć
Łukašenka niervova prakamientavaŭ vizit Cichanoŭskaj u Kijeŭ23
Kamientary