Siońnia ŭžo nikoha nie ździviš tym, što ty kaštavaŭ fałafiel i viedaješ, u jakoj z kramak Kamaroŭki jaho robiać lepš za ŭsio.
Mianie samu niekalki hod tamu litaralna začaravała hetaja dziŭnaja i krychu śmiešnaja nazva. Tady ja vyrašyła pasprabavać zrabić fałafiel samastojna. I samym składanym akazałasia nie hatavańnie, a pošuk praduktaŭ i recepta.
Siońnia pradukty znajści nie prablema, a voś receptaŭ raspładziłasia takaja vialikaja kolkaść, što nie viedaješ, jaki ličyć pravilnym i samym smačnym.
Varyjant, jaki vy znojdziecie tut, mnie vielmi spadabaŭsia svajoj kolkaściu zielaniny i abranymi śpiecyjami.
Maleńki słoŭnik
Fałafiel — strava z nutu, jakaja pachodzić ź Jehipta. Ujaŭlaje saboj šaryki sa zdrabnionaha nutu, smažanyja ŭ alei;
Nut, ci turecki haroch — babovaja raślina ź jaskravym arechavym smakam;
Bułhur — vid krupaŭ, jaki vyrablajecca z pšanicy;
Kumin, ci zira — śpiecyja, vyhladam padobnaja da kminu, ale z harkavatym prysmakam. Užyvajecca dla hatavańnia fałafiela, płovu i stravaŭ ź miasa;
Tachinnaja pasta — alejnaja pasta sa smažanaha kunžutu.
Składniki:
- 250 hr. nutu;
- 3 st. ł. bułhuru;
- 1 cybulina;
- 5 zubčykaŭ časnaku;
- pučok piatruški;
- pučok kinzy;
- 1 č. ł. kuminu;
- 1 st. ł. kalandry;
- 1 č. ł. sody;
- 1 č. ł. soli;
- 0,5 č. ł. čornaha piercu;
- 1 č. ł. parašku kary;
- 4 st. ł. muki.
Nut zamačyć na noč. Źlić vadu, zrabić ź jaho piure ŭ kambajnie ci pry dapamozie miasarubki. Cybulu i časnok drobna parezać, zielaninu pasiekčy. Dadać da nutu bułhur, zielaninu, cybulu, časnok i ŭsie astatnija składniki. Dobra pieramiašać. Dadać 3 st. ł. vady i pakinuć u chaładzilniku minimum na paŭhadziny.
Sfarmavać z masy mokrymi rukami 18 šarykaŭ. Na patelni razahreć alej (vyšynia aleju pavinna być kala 1—2 sm). Padsmažyć šaryki z usich bakoŭ da załacistaj skarynki. Pierakłaści na papiarovyja ručniki, kab prybrać zališni alej. Padavać z sousam i śviežaj sałataj.
Sous:
- 200 hr. naturalnaha johurtu;
- 2 st. ł. tachinnaj pasty;
- 1 zubčyk časnaku;
- Źmiašać johurt, drobna parezany časnok i tachinnuju pastu.
Smačna jeści!
Kamientary