Vasiamnaccać. Mienavita stolki hadoŭ Anatol Labiedźka ŭznačalvaŭ Abjadnanuju hramadzianskuju partyju. Za hety čas pamianialisia čatyry prezidenty ZŠA, try papy rymskija, zapuścili Vialiki adronny kałajdar, źjaviŭsia fejsbuk i telehram, źnikli ema, naradziŭsia i vyras Mikałaj Łukašenka.
«Anatol Uładzimiravič, čym budziecie zajmacca biez pasady?»
«Kuplu «Našu Nivu», — Labiedźka, jak zaŭždy, daścipny i imhnienna reahuje na pytańni.
«Naŭrad ci atrymajecca. A kali surjozna?»
«U mianie jość zadumy niekalki prajektaŭ, jakija daŭno chočacca realizavać».
«Heta palityčnyja prajekty?»
«Nie skazaŭ by. Chutčej nie».
«A na prezidenckija vybary pojdziecie?»
«Budu ŭdzielničać u pracedury prajmieryz».
Anatol Labiedźka nie pahadžajecca navat na pasadu namieśnika staršyni AHP, ale ŭsio jašče raźličvaje stać kandydatam u prezidenty.
57-hadovy Labiedźka pa-raniejšamu źjaŭlajecca adnym z najbolš mocnych apazicyjnych palitykaŭ. Jon vydatna adčuvaje publiku, umieje trymać ludziej u tonusie padčas svaich vystupaŭ. Viedaje, kali i jakuju intanacyju prymianić. Labiedźka jak aratar zdolny dać foru mnohim. Na źjeździe Anatol razmaŭlaŭ pryncypova pa-biełarusku. Faktyčna adzin ź niamnohich delehataŭ źjezdu, jaki karystaŭsia mienavita biełaruskaj.
«Nam prapanoŭvali stratehiju papulizmu i skandałaŭ, ale jaje nie padtrymali siabry partyi. AHP zastajecca arhanizacyjaj kaštoŭnaściaŭ i aŭtarytetaŭ. Prašu prabačeńnia ŭ tych, kaho rasčaravaŭ. Rašeńnie mnoj pryniataje», — skazaŭ Labiedźka delehatam.
Pra jaki ž šlach papulizmu havoryć na toj momant jašče staršynia? Jość viersija, što pra deputatku Pałaty pradstaŭnikoŭ Hannu Kanapackuju, jakaja chacieła stać staršynioj. Sama Kanapackaja takoje abviarhaje: «Nie, u mianie jakraz taki kanstruktyŭnyja prapanovy, a taksama za mnoj šerah maleńkich pieramoh, ździejśnienych i pry dapamozie palityčnych partyj i hramadzianskaj supolnaści».
Hanna Kanapackaja starałasia trymacca ŭ ciani. Litaralna za dzień da źjezdu jana pieradumała vyłučacca ŭ staršyni. U kułuarach źjezdu chadziła mierkavańnie, što heta było kampramisam. Zdymajecca Kanapackaja, zdymajecca i Labiedźka. U inšym vypadku Anatol moh pretendavać na jašče adzin termin.
Takaja imaviernaść sapraŭdy isnavała. U šmatlikich vystupach delehataŭ ledźvie nie kožny druhi ŭhavorvaŭ Labiedźku zastacca. Adnapartyjcy sapraŭdy bačyli ŭ im mocnaha lidara.
Zrešty, nie ŭsie. Naprykład, adzin ź niamnohich maładych udzielnikaŭ źjezdu Dźmitryj Kavałhin kazaŭ pra «pravadyrstva», što AHP pryvatyzavanaja struktura. Sam Labiedźka padčas hetaha vystupu ni razu nie padniaŭ vočy na Kavałhina. Zdajecca, nie tamu, što było soramna, a tamu, što nie chacieŭ.
«Ja pavinšuju novaha staršyniu, ale adnačasova paspačuvaju. U AHP vielmi šmat prablem. Ja adkrytaja da supracoŭnictva. Partyja pavinna realizavać mandat deputata», — skazała ŭ razmovie z «NN» Kanapackaja.
Sam źjezd prachodziŭ u hateli «Manastyrski» ŭ Vierchnim horadzie. Na recepcyi ź dziasiatak ściahoŭ. Vjetnam, Vieniesueła, KNDR, Izrail — mienavita ŭ takoj paśladoŭnaści. Na mierapryjemstva sabrałasia bolš za 100 čałaviek. U maleńkim pamiaškańni było dušna, nie pracavaŭ kandycyjanier, nie ratavała vysokaja stol. Ciažka pravodzić takija mierapryjemstvy ŭletku.
Były staršynia Nacbanka Stanisłaŭ Bahdankievič pryjšoŭ z kijočkam. Jon siadzieŭ u pieršym šerahu. U Bahdankieviča pa-raniejšamu vielmi mocny lidarski stryžań. «Idziem pracavać, čaho raśsielisia», — kamanduje jon u faje paśla abiedu. Staryja siabry AHP pačynajuć adyhryvać usio mienšuju rolu ŭ žyćci partyi, ale nie źnikajuć ź jaje całkam.
Što tyčycca hałasavańnia, to intryhi, jak takoj nie było. Usie razumieli, što staršynioj pry adsutnaści Labiedźki i Kanapackaj stanie Vasil Palakoŭ.
Palakoŭ robić uražańnie vielmi ścipłaha i sumlennaha čałavieka. Jon vielmi niaŭpeŭnieny ŭ svaich ruchach, u im całkam adsutničaje niejkaje nachabstva ci panty. Palakoŭ siadzieŭ u pieršym šerahu, pobač z štatyvam videakamiery, dyk Vasil nie pierasieŭ na inšaje miesca, nie pasunuŭ štatyŭ, a cichieńka ŭpluščyŭ nohi miž hetaj žaleznaj štuki. Zdajecca, dyskamfortu praz heta jon nie adčuvaŭ.
Chto taki Vasil Palakoŭ? Jamu 49 hadoŭ. Rodam z Husaraŭki Rečyckaha rajona, tam vučyŭsia ŭ škole. Potym pastupiŭ u Homielski ŭniviersitet na histaryčny fakultet. Skončyŭ aśpiranturu pa śpiecyjalnaści «Palityčnaja navuka». Dvanaccać hadoŭ adpracavaŭ nastaŭnikam u škole, potym syšoŭ u hramadskuju dziejnaść. Palakoŭ — lidar demakratyčnaj supolnaści Homiela.
U AHP jon pryjšoŭ u 1996 hodzie, napiaredadni refierendumu. «Było jasna, što ŭ Biełarusi zhortvajecca navat taja kvołaja demakratyja, što isnavała dahetul, tamu mnie pryncypova stać siabram apazicyjnaj partyi».
Palakoŭ nie vyklučaje varyjantu, što pierajedzie ciapier u Minsk. «Niejkija pytańni možna vyrašyć dystancyjna, a niejkija — nie». Kaža, što siamja padtrymała jahonaje rašeńnie bałatavacca ŭ staršyni partyi.
Palakoŭ volna razmaŭlaje pa-biełarusku, ale ŭ svaich vystupach addavaŭ pieravahu rasijskaj. U novaha staršyni AHP 24-hadovy syn. Jon niadaŭna adsłužyŭ u vojsku, u Piečach. Prysiahu prymaŭ razam z Alaksandram Koržyčam, jaki zahinuŭ vosieńniu, ale słužyli ź im asobna. Syn pa adukacyi juryst.
Niezadavoleny Labiedźkam Kavałhin na pytańnie, ci narmalny mužyk Palakoŭ, adkazaŭ: «Tak, narmalny. Vasil — sapraŭdny libierał».
Supiernikam Palakova byŭ były supracoŭnik milicyi Mikałaj Kazłoŭ. Sam jon matyvavaŭ svajo rašeńnie nie brać samaadvod tym, kab nie było «zusim panyła».
Siensacyj nie adbyłosia. Palakoŭ staŭ novym staršynioj.
Anatol Labiedźka padčas adnaho z vystupaŭ na źjeździe ź lohkim sumam kazaŭ, što za ŭsie vasiamnaccać hadoŭ ni razu nie byŭ u adpačynku. Ciapier takaja mahčymaść u jaho źjaviłasia. Hałava ab prablemach AHP budzie baleć u inšaha čałavieka.
Kamientary