Kab prysudžany da rasstrełu čorny ryełtar z Mahilova nie pamior padčas haładoŭki, jaho ratujuć kropielnicami
Taćciana i Ihar Hieršankovy (u centry) ŭ Viarchoŭnym sudzie. Fota: TUT.by
Praktyčna miesiac, a dakładna z 27 červienia, trymaje haładoŭku ŭ kamiery śmiarotnikaŭ śledčaha izalatara №1 Ihar Hieršankoŭ. Na taki surovy pratestny krok asudžanaha da śmiarotnaha pakarańnia žychara Mahilova padšturchnuła parušeńnie jahonaha prava na pierapisku. Usie skarhi Hieršankova ŭ Hienieralnuju prakuraturu, Departamient vykanańnia pakarańniaŭ, u biełaruskaje pradstaŭnictva AAN, a taksama mnohija listy da rodnych, nie dachodziać da adrasataŭ.
Pad čas čarhovaha karotkaterminovaha spatkańnia, jakoje adbyłosia 25 lipienia, maci asudžanaha Hieršankova — Ludmiła Adamaŭna — nie zmahła paznać ułasnaha syna.
«Jon za hety miesiac haładoŭki schudnieŭ na 18 kiłahram, vočy stali niežyvyja, ledźvie nohi pierasoŭvaje, navat havoryć ź ciažkaściu, zapinajučysia na kožnym słovie», — sa skruchaju raspaviadała jana.
Razmaŭlajučy z synam žančyna daviedałasia, što ŭ pieršyja dni jon trymaŭ suchuju haładoŭku, a potym Iharu prymusova pačali stavić kropielnicy. Pry hetym u kamieru zachodziać milicyjanty ŭ broniekamizelkach i maskach, vidać, dziela taho, kab jon nie supraciŭlaŭsia.
Ihar Hieršankoŭ vymušany byŭ piśmova źviarnucca da načalnika SIZA z prośbaj, kab admianili tyja kropielnicy, bo paśla ich stanovicca jašče horš, pačynajucca sutarhi, kružycca hałava, adnak jahonaja skarha zastałasia biez uvahi. A litaralna dzień tamu z hetaj nahody jon napisaŭ list u Ministerstva achovy zdaroŭja. Tolki voś upeŭnienaści, što skarha dojdzie da adrasata ŭ asudžanaha niama.
Pry hetym maci dastaje listok papiery i pieraličvaje: «Voś syn adpraŭlaŭ listy 23 krasavika, 8 traŭnia, 28 červienia — nivodny ź ich ja nie atrymała».
«My z dačkoj pryvieźli jamu siońnia praduktovuju pieradaču, adnak Ihar admoviŭsia ad jaje, skazaŭ, kab zabrała nazad, bo tady hetaja vymušanaja haładoŭka nie budzie mieć anijakaha sensu. Paviazu ciapier hetuju pieradaču nazad u Mahiloŭ», — kaža maci.
Pa prysudzie Mahiloŭskaha abłasnoha suda 21 lipienia Siamion Bieražnoj, a taksama muž i žonka Ihar i Taćciana Hieršankovy abvinavačvalisia ŭ ździajśnieńni zabojstvaŭ i padrychtoŭcy da ździajśnieńnia zabojstvaŭ, vykradańni čałavieka i padrychtoŭcy da vykradańnia, a taksama ŭ machlarstvie, razboi, vymahalnictvie, kradziažy abo źniščeńni dakumientaŭ. Taćcianu Hieršankovu dadatkova abvinavacili ŭ niezakonnym abarocie narkotykaŭ abo psichatropaŭ. Sudom było ŭstanoŭlena, što złačynnaja hrupa ahułam zarabiła na machinacyjach z čužym žyllom bolš za 2 miljardy niedaminavanych rubloŭ.
Udzielnikam złačynnaj hrupoŭki byli vyniesienyja nastupnyja prysudy: Iharu Hieršankovu — rasstreł; Siamionu Bieražnomu — rasstreł; Taćcianie Hieršankovaj — 24 hady turmy z kanfiskacyja majomaści; Barysu Kaleśnikavu — 22 hady i 1 miesiac kałonii strohaha režymu.
Ciapier čytajuć
Žonka adhavorvała padpałkoŭnika DFR brać chabary, a toj kazaŭ: «Atrymaju pałkoŭnika — i na piensiju». Pieršaja piensija pryjšła ŭžo na aryštancki rachunak2020
Kamientary