MUS paćvierdziła infarmacyju ab zatrymańni Leanida Štejna, načalnika CEC Haradziejskaha cukrovaha kambinata. Kali mašynu Štejna spynili supracoŭniki DAI, u sałonie znachodziŭsia ceły arsienał — ciuninhavany aŭtamat Kałašnikava, pistalety Makarava i TT, vintoŭka niavyśvietlenaj madeli, ručnyja hranaty, vybuchovyja pakiety. U dačynieńni da kiraŭnika zaviedziena kryminalnaja sprava pa č. 2 art. 295 KK Biełarusi (Niezakonnyja dziejańni ŭ dačynieńni da ahniastrelnaj zbroi, bojeprypasaŭ i vybuchovych rečyvaŭ). Akramia taho, zatrymany taksama čałaviek ź blizkaha atačeńnia Leanida Štejna.
U paniadziełak stała viadoma ab zatrymańni 48-hadovaha načalnika CEC Haradziejskaha cukrovaha kambinata Leanida Štejna. Usiu subotu ŭ pasiołku išli pieratrusy: siłaviki pryjšli ŭ kvateru Štejna, u jaho rabočy kabiniet i haraž. Mienavita ŭ ich vyjavili ŭ siejfach ceły skład bajavoj zbroi.
Siońnia na aficyjnym sajcie MUS źjaviłasia infarmacyja ab dadzienaj kryminalnaj spravie.
— U chodzie praviadzieńnia apieratyŭnaj kambinacyi viečaram 7 vieraśnia ŭ ahraharadku Krasnaje Homielskaha rajona supracoŭniki DAI spynili aŭtamabil, jakim kiravaŭ žychar h.p. Haradzieja Minskaj vobłaści. Pry ahladzie transpartnaha srodku pravaachoŭniki vyjavili ciuninhavany aŭtamat Kałašnikava z prystasavańniem dla biasšumnaj stralby, pistalety Makarava i TT, pa niekalki padrychtavanych mahazinaŭ da pieraličanaj zbroi, vintoŭku niavyjaŭlenaj madeli, 4 ručnyja hranaty, 3 vybuchovyja pakiety i sotni patronaŭ roznaha kalibru, — paviedamlaje sajt MUS.
Homielski rajonny adździeł Śledčaha kamiteta raspačaŭ kryminalnuju spravu pa č. 2 art. 295 KK Biełarusi (Niezakonnyja dziejańni ŭ dačynieńni da ahniastrelnaj zbroi, bojeprypasaŭ i vybuchovych rečyvaŭ). Ciapier Leanid Štejn znachodzicca ŭ izalatary časovaha ŭtrymańnia. Siłaviki taksama paćvierdzili infarmacyju ab tym, što ŭ kvatery zatrymanaha, haražy i słužbovym kabiniecie prajšli pieratrusy.
— Vartavyja paradku kanfiskavali tam zarehistravanuju zbroju: dva naraznyja karabiny, čatyry hładkastvolnyja strelby i dva pistalety, a taksama niezakonna zachoŭvalisia kulamiot, 5 aŭtamataŭ, 10 vintovak, 10 pistaletaŭ, 28 hranat, 265 vybuchovych pryład, kala 2 kh vybuchovych rečyvaŭ i kala 10 tysiač patronaŭ roznaha kalibru, — paviedamlaje MUS.
Leanid Štejn nie adziny fihurant kryminalnaj spravy. Taksama zatrymany čałaviek ź jaho blizkaha atačeńnia, u jaho domie ŭ Bresckaj vobłaści vyjaŭleny zarehistravany narazny stary karabin, hładkastvolnaja strelba i 3 vintoŭki, 3 hładkastvolnyja palaŭničyja strelby i 381 patron roznaha kalibra. Usia kanfiskavanaja zbroja i bojeprypasy nakiravany dla praviadzieńnia kompleksnych ekśpiertyz.
— U ciapierašni čas realizujucca apieratyŭna-vyšukovyja i śledčyja mierapryjemstvy pa vyśviatleńni krynic pachodžańnia takoha šyrokaha arsienała i mahčymych saŭdzielnikaŭ fihuranta ŭ niezakonnym abarocie zbroi, — havorycca ŭ paviedamleńni MUS.
Ab Leanidzie Štejnie žychary pasiołka Haradzieja adhukajucca jak pra zamknionaha čałavieka, blizkich siabroŭ u mužčyny niama, z mamaj nie razmaŭlaŭ šmat hadoŭ, znosiny z susiedziami zvodziłasia da «dobry dzień — da pabačeńnia». Zachaplacca zbrojaj staŭ paśla armii.
— Štejn byŭ zachopleny vyrabam chałodnaj zbroi, sam bačyŭ, jak hadoŭ 15 tamu na zavodzie jon rabiŭ nažy i samarobny pistalet. Zbrojaj staŭ zachaplacca paśla vojska, — raspaviadaŭ TUT.BY susied zatrymanaha.
Ciapier čytajuć
Hieroja telefonnych źlivaŭ pałkoŭnika Kisiala, jaki zaklikaŭ kalečyć demanstrantaŭ, raptoŭna apuścili na rajonny ŭzrovień10
Kamientary