Psichołah ładzić u Minsku viečaryny abdymak. Raskazvajem, navošta

Daviedka: cuddle z anhlijskaj movy pierakładajecca jak «abdymać». Pieršaja kadł-viečaryna prajšła ŭ ZŠA jašče ŭ 2004 hodzie paśla taho, jak dva psichołahi pryjšli da vysnovy, što darosłym ludziam nie chapaje miesca, dzie jany mahli b paabdymacca biez seksualnych i lubych inšych padtekstaŭ.

Vijaleta vyrašyła, što takich sustreč brakuje i ŭ Biełarusi. Nieŭzabavie jana abjaviła pra pieršuju minskuju kadł-paci (jana prajšła viasnoj hetaha hoda).

Pavialičyć

Paśla była jašče adna aŭtarskaja abdymalnaja viečaryna, abiedźvie naviedali kala 30 čałaviek.

My raspytali Vijaletu pra toje, navošta biełarusam vučycca abdymacca.

Pavialičyć

— Pryniata ličyć, što dla taho, kab čałaviek siabie dobra adčuvaŭ, jamu pažadana abdymacca chacia b 8 razoŭ u dzień. Nie viedaju, adkul kankretna ŭziałasia heta teoryja, ale najaŭnaść abdymkaŭ u našym žyćci dakładna dapamahaje. Na kadł-paci, jakija ja paśpieła pravieści, adbyłosia šmat rečaŭ, jakija prademanstravali, nakolki hajučymi mohuć być abdymki: my nie prosta pieścimsia, my vučymsia adčuvać svaje miežy, vučymsia stavicca da inšych z pavahaj i ŭvahaj.

Ź fizičnaha punktu hledžańnia padčas abdymkaŭ u adździele našaha mozha vypracoŭvajecca endarfin — harmon radaści.

U knižkach pa psichałohii apisana vielmi šmat historyj pra toje, što dzieci, jakim niedadali ŭvahi i cialesnych kantaktaŭ, adstavali ŭ raźvićci ad svaich adnahodak, byli mienš enierhičnymi, vyrastali z zanižanaj samaadznakaj i drennym adčuvańniem svajho «ja». Kali ŭ dziaciej byli ciopłyja stasunki z baćkami, to jany mieli ŭpeŭnienaść u tym, što ich lubiać, i ŭ vyniku sami byli zdolnyja na heta pačućcio. Praŭda, tut vielmi važna zachavać miažu: nie zalubić, a mienavita padtrymać patrebnaść u lubovi.

Pavialičyć

Ja zaŭvažyła, što kali ŭ maim žyćci adsutničaje taktylnaja padtrymka, to ja adrazu pačynaju chvareć, mnie drenna śpicca.

U toj ža momant, kali mianie abniać, niervovaja sistema supakojvajecca, ja splu našmat lepš. U maim žyćci byŭ pieryjad, kali toje, čym ja vielmi lubiła zajmacca, zabrali. Ja rascaniła heta jak zdradu i paśla zusim pierastała daviarać ludziam. Spatrebiłasia hady try, kab znoŭ pačać dazvalać akružeńniu dapamahać mnie. Na moj pohlad, vielmi važna, kab abdymki prysutničali ŭ našym žyćci. Jość navat teoryja, što niekatorych jany mohuć vyciahnuć z depresii.

Pavialičyć

Dla kahości być adkrytym toje samaje, što być uraźlivym, słabym. Być saboj strašna, ja razumieju, što kudy praściej zakrycca ŭ rakavincy.

Ja sustrakaju vielmi mała biełarusaŭ, jakija hatovyja zaŭsiody zastavacca adkrytymi śvietu.

Zvyčajna jany pracujuć na taki vynik: chodziać na tancy, da psichołahaŭ, u niejkija siekcyi ci prosta šmat kamunikujuć. Jany zrazumieli: adna sprava — być adkrytym i davać siabie ŭ kryŭdu, i zusim inšaja — zrazumieć svaju svabodu i miežy, spaznać svajo cieła i jaho sihnały i skazać «stop», kali vam niešta nie padabajecca.

Pavialičyć

Kali my źbirajemsia na kadł-paci, u samym pačatku ja zaŭsiody raspytvaju ludziej, ź jakimi dumkami i zapytami jany pryjšli. Dla mianie meta hetych sustreč — dapamahčy ludziam rassłabicca, zrazumieć pra siabie niešta novaje. Mnie vielmi padabajecca być pamočnikam, pravadnikom pamiž čałaviekam i jaho adkryćciami pra siabie jak taho, chto važny, varty ŭvahi i kłopatu. Kaniečnie, va ŭsich hetyja adkryćci adbyvajucca z roznym tempam, nie ŭsie mohuć dać siabie abniać: kamuści na toje, kab dazvolić heta, patrabujecca 5 chvilin, a kamuści nie chopić i hadziny.

Pavialičyć

Na kožnaj viečarynie ja sama sutykałasia z novymi dla siabie adkryćciami: mnohija ź ich rasčulili mianie da śloz.

Tak, adna dziaŭčyna, jakuju pačali hładzić pa śpinie, raskazała, što raniej ź joj rabili tak tolki tady, kali jana płakała. Jana navat nie zdahadvałasia, što možna hładzić čałavieka prosta tak.

Inšaja ž dziaŭčyna paśla mierapryjemstva padzialiłasia, što dazvolić dakranucca da siabie dla jaje było paraŭnalna sa skačkom u biezdań. U vyniku, jak mnie zdajecca, usio heta ich vielmi źmianiła.

Ja i dalej płanuju pieryjadyčna pravodzić kadł-paci. U mianie niama mety zrabić prajekt kamiercyjnym: ja chaču, kab usio heta było maksimalna ekałahična i terapieŭtyčna. Kab ja mahła kamuści dapamahčy, bo mnie važna, kab hety śviet byŭ bolš dobrym i ščaślivym.

Pavialičyć

• 0
• 0
• 0
• 0
• 0
• 0
• 0
• 0