Staršynioj Minharvykankama staŭ eks-ministr transpartu Anatol Sivak. «Naša Niva» sabrała niekalki faktaŭ pra novaha kiraŭnika stalicy.
Nie karenny minčuk
Navat zusim nie karenny. Sivak naradziŭsia ŭ vioscy Zavajć. Adsiul 10 kiłamietraŭ da Naroŭli i 30 km da ŭkrainskaj miažy.
Zavajć nie ŭvachodzić u adsielenuju zonu, heta ahraharadok. Ale da Čarnobyla tut byli pad 900 čałaviek, ciapier — dobra kali 300.
Sivak źjechaŭ z małoj radzimy adrazu paśla skančeńnia škoły, ale naviedvajecca ŭ rodnuju viosku. Tym bolš ciapier heta stała trendam i dziaržaŭnaj palitykaj.
«Tut atrymlivaješ mahutnaje enierhietyčnaje padsiłkoŭvańnie. Tut svaja ziamla, pryroda, ludzi. Tut adpačyvaješ dušoj. Patreba pryjechać siudy, pachadzić pa piasku, prosta pabyć tut, isnuje. Heta ja sprabuju pryščapić i svaim dzieciam, kab jany viedali svaje karani. Heta žyćciovaja asnova», — raskazvaŭ jon, pasadziŭšy drevy na subotniku.
Zrabiŭ karjeru ŭ čyhunačnaj sistemie
Amal usia karjera Sivaka kruciłasia vakoł čyhunki. Jon skončyŭ Instytut inžynieraŭ čyhunačnaha transpartu (ciapier — Biełaruski dziaržaŭny ŭniviersitet transpartu) i patrapiŭ u sistemu Darbudmantažtresta. Pracavaŭ budaŭničym majstram u Breście, paśla inžynieram u Mahilovie. Jašče ŭ saviecki čas patrapiŭ u Minsk.
U 2002—2006 Sivak byŭ namieśnikam načalnika Biełčyhunki, a ŭ 2009-2012 — uznačalvaŭ Biełčyhunku.
U pramiežak pamiž hetymi pasadami jon paśpieŭ papracavać pamočnikam Łukašenki pa Minsku. Heta i paspryjała ciapierašniamu pryznačeńniu na pasadu mera stalicy. Łukašenka časta abiraje kiravać rehijonami tych, chto raniej byŭ pamočnikam-inśpiektaram.
Čas bujnych infrastrukturnych prajektaŭ
Kali Sivak uznačalvaŭ Ministerstva transpartu (2012-2018) u Biełarusi było realizavana šmat infrastrukturnych prajektaŭ — za kitajskija hrošy abnaŭlalisia trasy ź Minska ŭ abłasnyja harady, była pabudavana MKAD-2. Pryčym hetyja budoŭli pieravažna zakančvalisia svoječasova, bieź vialikich spaźnieńniaŭ.
Sivak jak čyhunačnik imknuŭsia nadzialać bolš uvahi «svajmu» vidu transpartu. I Biełčyhunka sapraŭdy abnaŭlałasia i ŭdaskanalvałasia.
A voś ź inšymi, asabliva avijapieravozkami, usio było nie nastolki viasiołkava. U pryvatnaści, minski aeraport tak i nie razrośsia da rehijanalnaha chaba.
Łaŭkosty ŭ Biełaruś tak i nie pryjšli — kraina zastajecca adzinaj u Jeŭropie, kudy nie latajuć tannyja avijakampanii. Ale składvałasia adčuvańnie, što ministru Sivaku jany byli nie nadta i patrebnyja. Jon dekłaravaŭ spadzieŭ, što pačniecca raźvićcio biełaruskich rehijanalnych avijakampanij, ale inicyjatyva apynułasia pravalnaj.
Byŭ za krok da adstaŭki
U krasaviku 2018 hoda Łukašenka faktyčna anansavaŭ adstaŭku Sivaka. Jamu mahło dastacca za karupcyju ŭ transpartnaj śfiery. U toj čas za chabar byŭ zatrymany dyrektar departamienta pa avijacyi Uładzimir Kościn.
«U sistemie Mintransa ŭsio čaściej uźnikajuć pytańni karupcyjnych prajaŭ, — zajaviŭ Alaksandr Łukašenka, vystupajučy z pasłańniem da naroda i parłamienta. — Nieabchodna samym kardynalnym čynam navieści tam paradak, pryčym raz i nazaŭždy. Ja ščyra skažu, što ŭžo blizki da taho, kab Sivaka adpravić tudy ž, kudy ministra lasnoj haspadarki. I prama kažu, što vaša ministerstva samym žorstkim čynam znachodzicca ŭ centry ŭvahi pravaachoŭnaj sistemy ŭ cełym. Dziejničajcie!»
Sivak pryznaŭsia, što taja zajava Łukašenki stała dla jaho šokam. Jak i sam fakt karupcyi ŭ śfiery avijacyi.
Pabudavaŭsia ŭ «čyhunačnym» domie
Sivak jak ministr transpartu nie moh pretendavać na ŭčastak u Drazdach. Zrešty, jamu całkam chapaje piacipakajovaj kvatery płoščaj kala 110 m2 niepadaloku ad centra Minska, na vulicy Varanianskaha.
U kancy 1990-ych Biełaruskaja čyhunka budavała tut karparatyŭny dom. Sivak tady byŭ top-mieniedžaram Darbudmantažtresta.
Ceny na nieruchomaść tady byli zusim inšyja, Sivaku było dastatkova ŭziać kredytnyja $12 tysiač u ekvivalencie. Mahčyma, apošnija kapiejčyny ad toj šmatkroć devalvavanaj sumy jon spłačvaje i dahetul.
***
Anatol Sivak
Naradziŭsia 19 lipienia 1962 hoda ŭ vioscy Zavajć Naraŭlanskaha rajona.
Skončyŭ Biełaruski instytut inžynieraŭ čyhunačnaha transpartu (1986), Akademiju kiravańnia (1998).
U 1986-2002 hadach pracavaŭ na roznych pasadach u Darbudmantažtrest Biełaruskaj čyhunki. U 2002-2006 hadach byŭ namieśnikam načalnika Biełaruskaj čyhunki. U 2006-2009 hadach byŭ pamočnikam Łukašenki pa Minsku.
U 2009-2012 hadach — načalnik Biełaruskaj čyhunki. U 2012-2018 hadach — ministr transpartu i kamunikacyj.
U listapadzie 2018 hoda pryznačany staršynioj Minharvykankama.
Kamientary