Raniej Michaił Dziehciaroŭ prapanoŭvaŭ zabaranić u Rasii dalary i Santa-Kłausa.
Imia 37-hadovaha deputata Dziaržaŭnaj Dumy Rasii Michaiła Dziehciarova niečakana stała viadomym u Biełarusi. Sprava ŭ tym, što hety palityk prapanavaŭ našaj krainie dałučycca da Rasii pa krymskim scenary. Mabyć, šmat u kaho heta na rozumie, a voś u Dziehciarova i na jazyku.
«Całkam mahčyma, što narod choča ŭźjadnańnia z Rasijaj. Čamu b nie dać takoje prava — vykazacca? Zrabić sajuznuju dziaržavu nie na pryncypach, jakija nie pracujuć 20 hadoŭ, a na inšych pryncypach. Spytać narod, jak vy chočacie žyć z Rasijaj u sajuznaj dziaržavie? Moža, narod choča ŭźjadnacca, jak krymčanie? Treba spytać biełarusaŭ. Takoje pytańnie, jakoje treba rašyć», — skazaŭ Dziehciaroŭ u intervju telekanału «Dožd́».
Što ž za frukt hety Dziehciaroŭ? Rodam jon z Samary, a deputatam Dziaržaŭnaj Dumy źjaŭlajecca ŭžo dva sklikańni. Uznačalvaje ŭ Dumie kamitet pa fizičnaj kultury, sporcie i spravach moładzi.
Jahonyja baćki — lekary. U pačatku 90-ch vyjazdžali na zarobki va Uhandu i Jemien. Tamu Michaiła pakidali ź dziadulem i babulaj. Dziadula byŭ taksama niaprostym — druhim sakratarom Uljanaŭskaha abkama KPSS.
Michaił Dziehciaroŭ skončyŭ Samarski aerakaśmičny ŭniviersitet. Ad 2005 hoda siabra ŁDPR Žyrynoŭskaha. Znachodzicca ŭ kadravym reziervie prezidenta Rasii. Dvojčy vyłučaŭsia na mera Maskvy, jaho aktyŭna padtrymlivaŭ lidar partyi Žyrynoŭski, ale abodva razy z treskam pravalivaŭsia.
Jak palityk adznačyŭsia zajavami pra zabaronu ŭ Rasii amierykanskaha dalara. «Ja ratuju rasijskuju ekanomiku», — tak prakamientavaŭ jon svaje zajavy. Jon navat unosiŭ zakonaprajekt u Dziarždumu. Praŭda, inšyja deputaty jaho nie padtrymali. Dziehciaroŭ pradkazvaŭ, što ekanomika ZŠA łopnie ŭ 2017 hodzie.
U 2013-m Dziehciaroŭ taksama ŭnios u Dumu zakonaprajekt, jaki b dazvalaŭ žančynam nie chadzić dva dni na miesiac na pracu z pryčyny «krytyčnych dzion». «Mienstruacyja — heta nie tolki miedycynskaja, ale i sacyjalnaja prablema», — kazaŭ deputat.
Što jašče aryhinalnaha prapanoŭvaŭ deputat Dziehciaroŭ? Naprykład, zabaranić homaseksuałam zdavać kroŭ. Potym jamu stała strašna, što Santa-Kłaus moža vycisnuć z Rasii Dzieda Maroza, tamu prapanoŭvaŭ zakanadaŭča zamacavać za Dziadulem čyrvony nos i Śniahurku. Nie śmiejciesia, heta ŭsio było nasamreč.
«Santa-Kłaus padryvaje naš kulturny suvierenitet i suvierenitet duchu», — upeŭniena kazaŭ deputat. Tamu Santa-Kłausa prosta treba zabaranić na terytoryi Rasii.
Dziehciaroŭ źviartaŭsia ŭ Akademiju navuk Rasii, kab jamu dazvolili vykarystoŭvać termin «Małarosija» ŭ aficyjnych dakumientach, a nie tolki Ukraina. Vystupaŭ jon i za viartańnia impierskaha čorna-žoŭta-biełaha ściaha Rasii zamiest sučasnaha.
Možna śmieła kazać, što časta Dziehciaroŭ havoryć aby havaryć, chacia dla rasijskaha deputata takija jakaści jakraz ceniacca.
Ciapier čytajuć
Łukašenka nie zmoža palacieć na Samit miru ŭ ZŠA, bo pavietranaja prastora Jeŭropy dla jaho zakrytaja12
Kamientary