Supracoŭniki transpartnaj inśpiekcyi na trasie ŭ Baranavickim rajonie spynili vialikahruz, kab pravieryć režym pracy kiroŭcy. Ale dalnabojnik pavioŭ siabie nieadekvatna.
Incydent adbyŭsia 3 lutaha na aŭtadarozie Baranavičy—Hrodna. Supracoŭniki transpartnaj inśpiekcyi spynili vialikahruz, zarehistravany ŭ Kazachstanie, jaki išoŭ tranzitam pa Biełarusi. Kiroŭcu paprasili pakazać dla pravierki pakazańni tachohrafa — prybora, jaki dazvalaje adsačyć, ci vykonvaje rabotnik režym pracy i adpačynku.
— Pryboram hetym my nadajom asablivuju ŭvahu, bo ad vykanańnia režymu zaležyć biaśpieka na darohach. U apošni čas u Biełarusi pačaściłasia kolkaść avaryj z udziełam vialikahruznych aŭtamabilaŭ mienavita pa pryčynie stomlenaści kiroŭcaŭ, — rastłumačyŭ Intex-press načalnik rehijanalnaha adździeła kantrolu płatnych daroh u h. Baranavičy Alaksandr Bułyha.
Ale kiroŭca — hramadzianin Biełarusi 1973 hodu naradžeńnia — u adkaz prosta zabłakavaŭ dźviery aŭtamabila. Jon prasiadzieŭ tak prykładna z 10 da 17 hadzin. Uvieś hety čas supracoŭniki transpartnaj inśpiekcyi daremna sprabavali ŭhavaryć jaho vyjści.
Tolki kali na miesca prybyła apieratyŭnaja hrupa i supracoŭniki DAI, kiroŭca adkryŭ dźviery.
Vyśvietliłasia, jamu było, što taić. U kožnaha kiroŭcy jość svaja kartka, jakaja ŭstaŭlajecca ŭ tachohraf i dazvalaje adsačyć šlach čałavieka z dakładnaściu da siekundy. Hety kiroŭca svoj «limit» u darozie za dzień vyčarpaŭ i jechaŭ pa čužoj kartcy.
U vyniku na mužčynu skłali administracyjnyja pratakoły za admovu dać dostup da tachohrafa i za parušeńnie pravił pracy i adpačynku. Jaho abaviazali vypłacić 1020 rubloŭ štrafu (40 bazavych vieličyń).
Kamientary