Instahramnaje voziera na miažy Šviejcaryi i Francyi praz praciahłuju śpioku amal vysachła FOTA
Papularnaje siarod turystaŭ voziera Łak-de-Brene, jakoje znachodzicca na miažy Šviejcaryi i Francyi, amal całkam straciła vadu paśla niekalkich miesiacaŭ zasuchi i troch chvalaŭ ekstremalnaj śpioki, što achapili Jeŭropu, piša vydańnie Independent.
Zvyčajna letam siudy pryjazdžajuć tysiačy adpačyvalnikaŭ, kab kupacca, katacca na kanoe, adpačyvać u kiempinhach i padarožničać na turystyčnych sudnach. Adnak ciapier sudnachodstva praktyčna spyniłasia.
Asnoŭnaj pryčynaj stała rezkaje źnižeńnie ŭzroŭniu vady ŭ race Du, jakaja siłkuje voziera. U vyniku dziasiatki łodak i kataraŭ apynulisia na aholenym hlejkim dnie. Pavodle ŭładalnika adnoj z turystyčnych kampanij, jamu ŭžo daviałosia skaracić častku supracoŭnikaŭ, bo siezon faktyčna sarvany. Uzrovień vady ciapier bolš čym na dzieviać mietraŭ nižejšy za normu i praciahvaje panižacca prykładna na 22 santymietry za dzień.
Pavodle źviestak šviejcarskaj mieteasłužby, z krasavika ŭ hetym rehijonie vypała tolki kala pałovy zvyčajnaj kolkaści apadkaŭ. Pa maštabach ciapierašniaja zasucha ŭžo paraŭnoŭvajecca z najbolš ciažkimi pieryjadami 1976, 2003 i 2018 hadoŭ. Sinoptyki taksama nie čakajuć istotnych daždžoŭ jak minimum da siaredziny žniŭnia.
Miascovyja žychary adznačajuć, što padobnyja zasuchi adbyvajucca ŭsio čaściej. Vada, jakaja jašče zastałasia ŭ voziery, nabyła buravataje adcieńnie i pieratvaryłasia ŭ vuzkuju pałasu, dzie pakul jašče trymajucca ryba i niekalki lebiedziaŭ. Amal całkam vysach i viadomy vadaspad So-dziu-Du, jaki žyvicca vadoj hetaha voziera.
Žychary rehijona kažuć, što ŭ zvyčajnyja hady heta miesca vyhladaje kazačna, tamu siońniašniaja karcina vyklikaje ŭ ich vialiki sum.
Prablemy z zasuchaj nazirajucca i ŭ inšych častkach Jeŭropy. Naprykład, Dunaj taksama mocna abmialeŭ. Asabliva ciažkaja situacyja skłałasia ŭ Vienhryi, dzie raka nastolki straciła vadu, što kruiznyja ciepłachody pačali siadać na miel. Z-pad vady pakazalisia skały, piasčanyja vodmieli i navat zatanułyja sudny, jakija raniej byli schavanyja.
Zirnicie, jak źmialeła Pina sioleta VIDEA
U Vienhryi i Rumynii z-za śpioki i abmialeńnia Dunaja spynili atamnyja reaktary
Na Ziamli zafiksavali samuju nizkuju tempieraturu za apošnija 14 hadoŭ
U Hrecyi lasnyja pažary achapili vakolicy Afinaŭ
Doždž, narodžany ahniom. Što takoje vohniennaja chmara i jak jana robić pažary jašče bolš razburalnymi
Kamientary
Na majoj planecie ŭsio ŭ miežach normy kamfortu. Vada ŭ vadajomie taksama nie pierahretaja, toje, što j treba.
Vysnova: Čym dalej ludzi ad durnoj mituśni, tym dabrejšaja da ich pryroda.